Yamupati wabasikwiimba. Intembawuzyo yabana balombe baKkola. Malembe. ¹ Twakamvwa amatwi esu, Leza, bamataata besu bakatwaambila milimo njiwakachita mumazuba aabo, mumazuba achiindi. ² Wakatanda masi ajanza lyako, pesi wakabyala bantu besu; wakapenzya baisya, pesi wakayanzabika bantu besu munyika. ³ Nkaambo tebakajana pe nyika yakuvuba kuzwa kupanga, nikuba luboko lwabo telwakabafutula pe; pesi aluboko lwako lwalulyo, akuboko kwako, amumuni wabusyu bwako, nkaambo wakalimubotu kulimbabo. ⁴ Leza, uli Mwami wangu; layilila Jakkobbu azunde. ⁵ Kwiindila mulinduwe tuyotontela aansi basinkondoma; kwiindila muzina lyako tuyobalyatuukila aansi, aabo babuka akutulwana. ⁶ Nkaambo nsikoyoosyoma kavwi kangu, nikuba panga lyangu talikoyondifutula pe. ⁷ Pesi wakatuvuna kuzwa kuli basinkondoma besu, alimwi wakabanjizya mubuusu aabo batusulide. ⁸ MuliLeza tulalikankayizya bweeni bwezuba boonse, alimwi tuyoopa kulumba kwalyoonse kuzina lyako. Sela ⁹ Pesi lino watusowa akutuusya nsoni, alimwi toyinki aanze ampi zyesu. ¹⁰ Utuchita kuti tufutatile basinkondoma; alimwi aabo batusula alalibwezela lwabo beni. ¹¹ Watuchita ,buli mbelele ziya kukujayigwa alimwi watumwayiisya aakati kamanyika. ¹² Ulawuzya bantu bako kuchintu chitakwe nchinchaamba; takwe niwakayungizya kubuvubi bwako akuchita oobo. ¹³ Utuchita kuti tusampawulwe kuli basimayakilane besu, nsesya akuniakwa kulibabo batuzyungulukide. ¹⁴ Utuchita chisampi aakati kamanyika, kugunuusya mitwe aakati kabantu. ¹⁵ Mubweeni bwezuba lyoonse insoni zyangu zilikunembo lyangu, alimwi bweeme buvumbide busyu bwangu ¹⁶ akaambo kajwi lyawooyo uusampawula akutukila, akaambo kasinkondoma asikulya nkoto. ¹⁷ Zyoonse eezi zyatusikila; pesi tatunakukuluba pe nikuba kukubisizya chizuminano chako. ¹⁸ Moyo wesu tewafutatila musule pe; antaamo zyesu takwe nizyapambuka munzila yako pe. ¹⁹ Pesi watunyonyoona chakasimpe mubusena bwabamwaaba alimwi watuvumba amweenzule walufu. ²⁰ Na twakaluba zina lyaLeza wesu na kutandabika maanza esu kulileza uumbi, ²¹ sa Leza takoyoozilingula eezi? Nkaambo ulizi nsiswa zyamoyo. ²² Nchobeni, akaambo kako tulajayigwa bweeni bwazuba lyoonse; tubonwa mbuli mbelele ziyanda kujayigwa. ²³ Sinsimuka, nkaambonzi nowona, Mwami? Buka utatusowi kwalyoonse. ²⁴ Nkaambonzi notusisila busyu bwako alimwi waluba kupenzegwa kwesu amafwabi esu? ²⁵ Nkaambo twabbila aansi mulusuko; mibili yesu ilijiswi anyika. ²⁶ Buka utugwasye alimwi utuvune nkaambo kabusyomesi bwachizuminano chako.