Yamupati wabasikwiimba. Intembawuzyo yaDeviti. ¹ Ndakalindila Jehova chakukakatila; wakandiswiilizya aimwi wakamvwa kulila kwangu. ² Wakandigwisya aanze kwadindi liyoosya, aanze kwamatope aanamatila, alimwi wabika mawulu angu aabbwe mpawo wasimya kweenda kwangu. ³ Wabika lwiimbo lupya mumulomo wangu, kutembawulwa akube kuli Leza wesu. Biingi bayoochibona alimwi bayoomulemeka akusyma muliJehova. ⁴ Ulilongezegelwe muntu ooyo uchita lusyomo lwakwe alimwi uutalemeki balisumpula na bamufutatila kabaya kumabejo. ⁵ Nzyiingi, Jehova Leza wangu, zichito zibotu nziwakachita, alimwi miyeeyo ili aatala andiswe tikonzyi kubalika; na ndakanana akwaambuula anjiyo, yali kunooli myiingi kwiinda iibalika. ⁶ Tobotelwi muzipayilo na zituuzyo, pesi wajula matwi angu; takwe niwayanda zipo zyakutenta na zyachibi. ⁷ Mpawo ndakati mebo, ''Bona, ndasika; kulilembedwe aatala andime mabbuku livungidwe. ⁸ Ndilabotelwa kuchita luyando lwako, Leza wangu; milawu yako ilimumoyo wangu.'' ⁹ Ndaluula makani mabotu aabululami bwako mumbungano mpati; Jehova, ulizi kuti milomo yangu teyakaka kuchita boobu. ¹⁰ Tendasisa bululami bwako mumoyo wangu; ndaluula kusyomeka kwako alufutuko lwako; tendasisa busyomesi bachizuminano chako na lusinizyo lwako kuzwa kumbungano mpati. ¹¹ Utandiimi nchito zyako zyabuuya, Jehova; leka kusyomeka kwako kwachizuminano alusinizyo lwako kuti zindibambe lyoonse. ¹² Mapenzi aatabaliki alindizyungulukide; zibi zyangu zyandeezya chakuti tandichikonzyi kubona chintu; nzyiingi kwiinda masusu aali amutwe wangu, alimwi moyo wangu wandikachizya. ¹³ Jehova kobotelwa kundivuna; fwambaana kundigwasya, Jehova. ¹⁴ Abafwe nsoni akunyema kumaninide aabo batandaania akubweza buumi bwangu. Abafutatilwe akufwisigwa bweemwe, aabo babotelwa mukundichisa. ¹⁵ Abagambe akaambo kabubi bwabo, aabo bati, ''Aha, aha!'' ¹⁶ Pesi akube kuti boonse aabo bakuyanduula bakondwe akusekelela mulinduwe; woonse uuyanda lufutuko aambe lyoonse, ''Ikaka Jehova atembawulwe.'' ¹⁷ Ndilimuchete alimwi ndilabula; pesi Mwami ulandiyeya. Uli lugwasyo lwangu alimwi ulandivuna; utanonoki Leza wangu.