¹ Intembawuzyo ya Devidi. Kuli nduwe, Jehova, ndisumpula buumi bwangu! ² Leza wangu, Ndisyoma mulinduwe. Utaleki ndiwusigwe nsoni, utaleki basinkondoma basekelele chakuzunda alindime. ³ Kutabi naba omwe ulangila kuli nduwe uwusigwa nsoni; Abo bachita chabumpenenge katakwe kaambo bawusigwe insoni! ⁴ Ndizibye inzila zyako, Jehova, ndiyiisye inzila zyako. ⁵ Ndenzya mukasimpe kako alimwi undiyiisye, nkambo nduwe Leza walufutuko lwangu; ndilangila mulinduwe zuba lyoonse. ⁶ Koyeeya Jehova milimo yalwetelelo achizuminano chakusyomeka; nkambo zyakakkala kaziliwo. ⁷ Utayeeyi zibi zyabukubusi bwangu nikuba bupanduki bwangu, Kondiyeeya achizuminano chakusyomeka nkambo kabubotu bwako. Jehova! ⁸ Jehova mubotu alimwi uliluleme; Nkamo kaako ulayiisya basizibi nzila. ⁹ Ulenzya babombede mulizezyo ziluleme akubayiisya munzila yakwe. ¹⁰ Inzila zya Jehova zyoonse nzyaluyando lutamani akusyomeka kulibaabo babamba akusyomeka kulibabo babamba chizuminano chakwe amalayilile akwe aasalala. ¹¹ Nkambo kazina lyako, Jehova, lekelela chibi changu, nkambo nchipati loko. ¹² Ngwani muntu uyoowa Jehova? Mwami ulamuyiisya munzila eyo njayelede njasala. ¹³ Buumi bwakwe buleenda mububotu; alimwi lunyungu lwakwe luyokona nyika. ¹⁴ Kumvwanana a Jehova nkukwababo bamulemeka, alimwi ulazibya chizuminano chakwe kulimbabo. ¹⁵ Menso angu alikuli Jehova kwalyonse, nkambo uyogwisya mawulu angu kuzwa kukazamba. ¹⁶ Kondichebuka akundichitila buuya, nkambo ndendikke alimwi ndapenzegwa. ¹⁷ Mapenzi amoyo wangu akomezegwa; ndinuna kuzwa mukkomba! ¹⁸ Langa mapenzi angu akubeleka kwangu, lekelela zibi zyangu zyoonse. ¹⁹ Langa basinkondoma, nkambo mbiingi; balandisulide alusulo lubi. ²⁰ Kwabilila buumi bwangu alimwi ndivune, utaleki ndiwusigwe insoni nkambo ndiyuba mulinduwe! ²¹ Buntu akululama kunditobele, nkambo ndilangila mulinduwe. ²² Futula Izilayeli, Leza, kuzwa kumapenzi aakwe woonse!