ALEPH ¹ Balilongezezegwe aabo baluleme munzila zyabo, beenda mumulawu wa Jehova. ² Bali achoolwe babamba chakusungwaala malayilile aakwe, bamulanguula chamooyo woonse. ³ Tababisyi pe; beenda munzila zyakwe. ⁴ Nduwe niwakatwambila kuti tubambe malayilile aako akaako achitwe kabotu. ⁵ Ooh, aboobo kuti ayime kabotu mukuyeeya milazyo yako! ⁶ Aaboobo taakwe ninjowusigwa eelyo nunjeeya yoonse milazyo yako. ⁷ Ndiyoopa kulumba kuli nduwe amoyo uyimvwi njii elyo nenjiya milazyo yako iiluleme. ⁸ Njoobamba milazyo yako; utandisiyi andikke. ⁹ Ino uchikula ulibamba biyeni inzila yakwe kuti isalale? Akulemeka ijwi lyako. ¹⁰ Njokuyandawula amoyo wangu wonse; uutandileki ndipambuke kuzwa kumilazyo yako. ¹¹ Majwi aako ndabambide mumoyo wangu aboobo kuti nditakubisizyi. ¹² Ulilongezezegwe iwebo, Jehova; kundiyisya milazyo yako. ¹³ Amulomo wangu ndakaamba bululami bwamilayizyo eeyo njwakandiyubunwida. ¹⁴ Njobotelwa munzila yachizuminano chako kwinda buvubi boonse. ¹⁵ Ndayeeya malayilile aako akuswilizya kunzila zyako. ¹⁶ Ndabotelwa mumbeta zyako; nsikoyoluba ijwi lyako. ¹⁷ Kobamba kabotu mulanda wako aboobo kuti mpone akubamba ijwi lyako. ¹⁸ Jula menso aangu kuti ndibone zintu zigambya mumilawu yako. ¹⁹ Ndilimuzwakule munyika; utasisi milazyo yako kuzwa kulindime. ²⁰ Ziyandisyo zyangu zilifwide mukusukama kuti ndizibe bululami bwambeta zyako chonse chiindi. ²¹ Wakkalalila basikulisumpula, aabo batukidwe, baleya kuzwa kumilazyo yako. ²² Uundigwisye kuzwa mumasampu amulunyansyo, nkambo ndalemeka chizuminano chambeta zyako. ²³ Nikuba kuti bendelezi balibambila akundilengelela, mulanda wako ulayeeya milawu yako. ²⁴ Chizuminano chambeta zyako nzezindibotezya, alimwi njiindendelezya. ²⁵ Buumi bwangu bulijisilidi kulusuko! Kondipa buumi kwindila mujwi lyako. ²⁶ Ndakwambila inzila zyangu, alimwi wakandivwiila: kondiyiisya milazyo yako. ²⁷ Kondichita kuti ndimvwisisisye nzila zyamilazyo yako, aboobo kuti njeeye njiisyo zyako zigambya. ²⁸ Newizuuka abuusu! Kondiyumya ajwi lyako. ²⁹ Gwisya kuli ndime nzila yabubeji; chaluzyalo kondiyiisya mulawu wako. ³⁰ Ndakasala inzila yabusyomesi; ndabamba lyoonse bululami bwambeta zyako kusule lyangu. ³¹ Ndakakatila kuchizuminano chambeta zyako; Jehova, utandileki ndiwisigwe. ³² Njoochijanina munzila zyamilazyo yako, nkambo ulakomezya moyo wangu kuchita oobo. ³³ Kondiyiisya, Jehova, nzila zyamilazyo yako, alimwi noyibamba mane kusikila kumamanino. ³⁴ Kondipa kumvwisisisya, alimwi njobamba mulawu wako; njowubamba amoyo wangu woonse. ³⁵ Kondikwabilila munzila yamilazyo yako, nkaambo ndabotelwa kweenda mulinjiyo. ³⁶ Toondezya moyo wangu kuchizuminano chambeta zyako alimwi akuzwa mumpindu zyakutalulama. ³⁷ Kochebusya menso aangu kuzwa kukulangisisya zintu zyabuyo; kondichitulula munzila zyako. ³⁸ Nyumpwida mulanda wako chisyomezyo eecho nchowachita kulibaabo bakulemeka. ³⁹ Gwisya matusi mapati aandiyoosya kapati, nkaambo mbeta zyako nimbotu. ⁴⁰ Bona, ndasukama malayilile aako, kondibukulusya mubululami bwako. ⁴¹ Jehova, kondipa luyando lwako lutakachilwi-lufutuko lwako, lwendelene achisyomezyo chaako; ⁴² mpawo njobasandula ansandulo kuli yooyo undininda, nkaambo nsyoma mujwi lyako. ⁴³ Utagwisyi ijwi lyanchoonzyo kumulomo wangu pe, nkaambo chilangililo changu mumbeta zyako ziluleme. ⁴⁴ Njobamba mulawu wako lyoonse, alyoonse mane kukabe kutamani. ⁴⁵ Njoyeenda chakukwabililwa, nkaambo ndayanduula malayilile aako. ⁴⁶ Njowaambuula chabusungu milazyo yako kunembo lyabaami alimwi tandikoyowusigwa nsoni pe. ⁴⁷ Ndakondwa mumilazyo, njiwandiyiisya loko. ⁴⁸ Ndanyampula maanza aangu kumilayizyo yako, njenjanda; njoyiyeeya milazyo yako. ⁴⁹ Koyeeya chisyomezyo chako kumulanda wako nkambo wandipa chilangililo. ⁵⁰ Eechi chichindumbuulizya mumachise aangu: echiya chisyomezyo chako chachita kuti mpone. ⁵¹ Basikulisumpula bandisampawula, pesi tandina kupiluka kuzwa kumulawu wako. ⁵² Ndayeeya aatala ambeta zyako kuzwa kuchiindi chakale, Jehova, alimwi alimwi ndalyuumbulizya lwangu. ⁵³ Bukali bupya bulindijisi nkambo kabasizibi bakaka mulawu wako. ⁵⁴ Milazyo yako njiyakaba nyimbo zyangu mung'anda oomo mwenkala chakayindi kaniini. ⁵⁵ Ndayeeya atala azina lyako mansiku, Jehova, alimwi ndabamba mulawu wako. ⁵⁶ Ndakali kuchita oobu nkambo kakuyeeya malayilile aako. ⁵⁷ Jehova nchechaabilo changu; ndayeeya kubamba majwi aako. ⁵⁸ Ndakumbilisya luse lwako amoyo wangu woonse; kondibeda aluzyalo mebo, mbuli kusyomezya kwajwi lyako. ⁵⁹ Ndalingula nzila zyangu akuchebusya mawulu aangu kuchizuminano amalayilile aako. ⁶⁰ Ndafwambaana akutachebuka pe kukubamba milazyo yako. ⁶¹ Tukole twabasizibi tulindijisi; nsibulide pe mulawu wako. ⁶² Akati kabusiku ndabuka akupa kulumba kulinduwe nkambo kambeta zyako zililuleme. ⁶³ Ndimweenzinyina abaabo bakulemeka, akuli boonse babamba malayilile aako. ⁶⁴ Inyika, Jehova, ilizwide chizuminano chako chisyomekede; ndiyiisye milazyo yako. ⁶⁵ Wachita chibotu kumulanda wako, Jehova, mbubonya mbuli jwi lyako. ⁶⁶ Ndiyiisye kabotu kusiyanisya akumvwisisisya, nkaambo ndasyoma kumilazyo yako. ⁶⁷ Nkintana kuchiswa ndakapambuka, pesi lino ndabamba jwi lyako. ⁶⁸ Ulimubotu, alimwi nduwe ooyo uchita zibotu; ndiyiisye mulawu wako. ⁶⁹ Basikasampusampu bandilengelela mebo amabejo, pesi ndabamba malayilile aako amoyo wangu woonse. ⁷⁰ Myoyo yabo yayumisigwa pesi mebo ndakondwa mumulawu wako. ⁷¹ Nchibotu kuti ndakawida mumapenzi aboobo kuti njiiye milawu yako. ⁷² Malayilile azwa kumulomo wako ayindilila kundibotezya mebo kwinda zyuulu zyazimpanzi zyangolida ansiliva. ⁷³ Maanza aako akandilenga akundisamika; undipe kumvwisisisya aboobo kuti njiiye milazyo yako. ⁷⁴ Aabo bakulemeka balabotelwa eelyo nibandibona nkambo ndajana chilangililo mujwi lyako. ⁷⁵ Ndilizi, Jehova, kuti imbeta zyako zililuzi, amukusyomeka kwako wakandipenzya mebo. ⁷⁶ Leka cizuminano chako chinduumbulizye mukusyomeka, mbuuli mbwakasyomezya mulanda wako. ⁷⁷ Konditondeezya luzyalo lwako aboobo kuti mpone, nkambo mulawu wako ndukondo lwangu. ⁷⁸ Leka basikulisumpula bawusigwe bweeme, nkaambo bandibisizya; pesi mebo ndiyeeya malayilile aako. ⁷⁹ Aabo bakulemeka baze kulindime, aabo bazi chizuminano chambeta zyako. ⁸⁰ Akube kuti moyo wangu ulondooke mukulemeka milayizyo yako aboobo kuti ndtawusigwi bweeme. ⁸¹ Ndawizuuka mukusukamina kuti antela ulandivuna! Ndalangilila mujwi lyako. ⁸² Menso aangu alisukeme kubona chisyomezyo chaako; ndiilili noyonduumbulizya? ⁸³ Nkaambo ndaba mbuli nkomo yawayini yayuminina mubusi; nsilubi milayizyo yako. ⁸⁴ Nchiindi chilamfu chulibuti kakkalilide muli zeezi mulanda wako; ndiilili noyobeteka aabo bandipenzya? ⁸⁵ Basikulisumpula bandisyiida malindi, bataswilili mulawu wako. ⁸⁶ Yoonse milazyo yako njalusinizyo; aabo bantu bandipenzya abubi; kondigwasya. ⁸⁷ Bachaazya afwifwi kuti bandimaninsye aatala lyanyika, pesi tandikaki malayilile aako pe. ⁸⁸ Aluyando lwako lutazuungaani, ndibambe mpone, aboobo kuti ndemeke milayizyo yako. ⁸⁹ Jehova, majwi aako aliimvwi kukabe kutamani; ijwi lyako lilibikidwe lizulide mujulu. ⁹⁰ Kusyomeka kwako kulakkalilila kumazyalani aako woonse; wakatalika nyika, alimwi ilikkede mbwaa. ⁹¹ Zintu zyoonse zilakkalilila asunu, mbuli mbwakaamba mumbeta zyako ziluleme, nkambo zintu zyoonse mbazike bako. ⁹² Nendatali kubnotelwa mumulawu wako nemfwide mumachise aangu. ⁹³ Nsikyooluba malayilile aako, nkaambo kwindila mulinjiyo mumponena. ⁹⁴ Ndiwako; kondivuna, nkambo ndayaanduula malayilile aako. ⁹⁵ Basizibi balibambila kuti bandinyonyoone, pesi njoyanduula kumvwisisisya chizuminano chambeta zyako. ⁹⁶ Zyoonse zilondokede nzindakabona zili amamanino; pesi milaazyo yako ilikwazeme loko. ⁹⁷ Oh mbuli mbuyandisya mulawu wako! Nkuyeeya kwangu kwazuba lyoonse. ⁹⁸ Milaazyo yako ilaandichenjeezya kwinda basinkondooma, nkaambo milaazyo yako ilandime lyoonse. ⁹⁹ Ndimvwisisisya loko kwiinda boonse bayiiyi bangu, nkaambo ndayeeya chizuminano chamalayilile aako. ¹⁰⁰ Ndamvwisisisya kwiinda bapati kulindime; kuli boobu nkambo ndabamba malayilile aako. ¹⁰¹ Ndagwisya mawulu aangu kuzwa kunzila imbi aboobo kuti njeeye ijwi lyako. ¹⁰² Tandipambukilide kumbali pe kuzwa kumbeta zyako ziluleme, nkaambo wakandilayilila. ¹⁰³ Anonesya buti malayilile aako nengalabila, iiyi, manoono kwiinda buchi kumulomo wangu! ¹⁰⁴ Kwindila mukulayilila kwako jana mpindu yakusiyanisya; nkiinkaako ndasula inzila yabubeji. ¹⁰⁵ Ijwi lyako nilampi kumawulu aangu amumuni wanzila yangu. ¹⁰⁶ Ndakakonkeezya alimwi ndakakazuzikizya abobiya ndoyeeya mbeta zyako ziluleme. ¹⁰⁷ Ndimvwide machise loko; kondiponia Jehova, mbuli mbwakasyomezya mujwi lyako. ¹⁰⁸ Jehova, ndakakomba kotambula inkambilizyo zyamulomo wangu, alimwi kondiyiisya mbeta zyako ziluleme. ¹⁰⁹ Buumi bwangu buli mujanza lyangu lyoonse, nikuba tandilubi pe mulawu wako. ¹¹⁰ Basizibi banditeya kakole, pesi nsinakusowa pe malayilile aako. ¹¹¹ Ndayandisya chizuminano chako mbuli lukono lwangu kukabe kutamani, nkaambo ngaabotezya moyo wangu. ¹¹² Moyo wangu ulibikkidwe kukulemeka milaazyo yako mane kukabe kutamani. ¹¹³ Ndasula aabo basimiyeeyo yobile, pesi ndayanda mulawu wako. ¹¹⁴ Ulibusena bwangu bwakuyubila alimwi ulintobo yangu; ndalangilila mujwi lyako. ¹¹⁵ Amunditantamuke, inywe nobasimuchita zibi, kuchitila kuti nkayeeye milayizyo yaLeza wangu. ¹¹⁶ Konditabilila mebo ajwi lyako aboobo kuti mpone akutawusigwa bweeme muchilangililo changu. ¹¹⁷ Uundikwabilile mebo, alimwi njoofutuka; noyeeya milawu yako kunzila yako. ¹¹⁸ Ulabakaka boonse aabo bapambuka kuzwa kunzila yako, nkaambo bantu aabo balyeena akutalulama. ¹¹⁹ Ulagwisya basizibi baanyika boonse mbuli mankwisili; nkambokaako ndilayandisya mulaazyo yako chabusungu. ¹²⁰ Mubili wangu wakankama mukuyoowa nduwe, alimwi ndayoowa mbeta zyako ziluleme. ¹²¹ Ndachita ziluzi azilomene; utandisiyi pe mukupenzegwa kwangu. ¹²² Kusyomezya makkalilo amulanda wako; utaleki basikulisumpula bandipenzye. ¹²³ Menso aanguakatala nindangila lufutuko lwako akaambo kajwi lyako liluleme. ¹²⁴ Tondeezya mulanda wako chizuminano chako chisyomekede, akundiyiisya milumbe yako. ¹²⁵ Ndimulanda wako; ndipe kumvwisisisya aboobo kuti ndizibe chizuminano chambeta zyako. ¹²⁶ Chiindi chaJehova kuti achite, nkaambo bantu batyola mulawu wako. ¹²⁷ Ndiyandisya mulayizyo wako chakasimpe kwiinda ngolide, kwinda ngolide ntuloko. ¹²⁸ Nkiinkaako ndatobelezya kabotu kabotu malayilile aako woonse, alimwi ndisulide inzila zyoonse zyabubeji. ¹²⁹ Milawu yako ilagambya, nchinchiicho ncheyilemeka. ¹³⁰ Kupandululwa kwajwi lyako kupa mumuuni; lipa kumvwisisisya kuli bateezi. ¹³¹ Ndajula mulomo wangu akufwekemba, nkaambo ndisukeme milaazyo yako. ¹³² Kondichebuka akundibeda aluzyalo mebo, mbuli mbwenchita lyoonse kulibaabo bayanda zina lyako. ¹³³ Lulamika ntaamo zyamawulu aangu kujwi lyako; utaleki chibi kuti chindeendelezye. ¹³⁴ Kondivuna kuzwa kukupenzya kwabaantu aabobo kuti nkayeeye malayilile aako. ¹³⁵ Komunikila mulanda wako abusyu bwako, akundiyiisya imbeta zyako. ¹³⁶ Tulonga twamisozi tuleenda kumenso aangu nkaambo bantu tabayeeyi mulawu wako pe. ¹³⁷ Uliluleme, Jehova, ambeteko zyako zililuzi. ¹³⁸ Wakapa chizuminano chambeta ziluleme akusyomeka. ¹³⁹ Bukali bwandinyonyoona mebo nkaambo mbasinkondoma baluba majwi aako. ¹⁴⁰ Ijwi lyako lyakaslazigwa loko, aboobo mulawu wako ulaliyanda. ¹⁴¹ Ndimuniini alimwi nsikonzyi nikuba boobo nsilubi malayilile aako. ¹⁴² Bululami bwako mbubotu kwalyoonse, amulawu wako ulisyomekede. ¹⁴³ Nikuba mapenzi amafwabi alindijisi, milayizyo yako ichindibotelezya. ¹⁴⁴ Chizuminano chambeta zyako chililuleme lyoonse; kondipa kumvwisisisya kuti nkapone. ¹⁴⁵ Ndaakwiila amoyo wangu woonse, ''Kondivwiila, Jehova, ndabamba imbeta zyako. ¹⁴⁶ Ndakwiita webo; kondivuna, alimwi ndabamba chizuminano chambeta zyako.'' ¹⁴⁷ Ndabuka kubuchedo akulilila kugwasigwa. Ndalangilila mujwi lyako. ¹⁴⁸ Menso aangu alijukide ndaba achilabila aboobo kuti njeeye jwi lyako. ¹⁴⁹ Koswilila ijwi lyangu muchizuminano chako chisyomekede; kondiponia, Jehova, mbuli mbwakasyomezya mumbeta zyako ziluleme. ¹⁵⁰ Aabo basikundipenzya basika afwifwi andime, pesi balikule kumulawu wako. ¹⁵¹ Uuli afwiifwi, Jehova, amilayizyo yako yoonse ilisyomekede. ¹⁵² Kuzwa kale ndakayiya chizuminano chambeta zyako nziwakabikka kuti zikkalilile lyoonse. ¹⁵³ Kolanga machise aangu akundigwasya, nkaambo tandilubi mulawu wako pe. ¹⁵⁴ Umaninsye milandu akundinununa; kondibamba, mbuli mbwakasyomezya kujwi lyako. ¹⁵⁵ Lufutuko lulikule kuli basizibi, nkaambo tabayandi mbeta zyako pe. ¹⁵⁶ Kuchita kwako kwabuuya nkupati, Jehova, kondibamba mpone, mbuli mbochita kuzwalili kwalyoonse. ¹⁵⁷ Basikundipenzya bangu abasinkondoma mbiingi, nikubaboobo tandipambuki pe kuzwa kuchizuminano chambeta zyako. ¹⁵⁸ Nimbona basilweeno ndasesemwa nkaambo tababambi ijwi lyako pe. ¹⁵⁹ Kulanga mbwenjandisya malayilile aako; kondibamba mpone, Jehova, mbuli mbuwakasyomezya muchizuminano chako chisyomekede. ¹⁶⁰ Mweelwe wajwi lyako ngwakasimpe; boonse bululami bwambeta zyako bulakkalilila kwalyoonse. ¹⁶¹ Bana babaami bandipenzya nkintakwe mulandu, pesi moyo wangu uliimvwi mukuyoowa ijwi lyako. ¹⁶² Ndakondwa kujwi lyako eelyo mbuli uumwi ujana mbono nyiingi. ¹⁶³ Ndasula akusesemwa bubeji, pesi ndayanda mulawu wako. ¹⁶⁴ Zyiindi zili musanu azibili abuzuba ndakulumbayizya nkambo kambeta zyako ziluleme. ¹⁶⁵ Bali aluumuno lwiingi, aabo bayanda mulawu wako; taakwe pe chibakankamya. ¹⁶⁶ Ndalangilila lufutuko lwako, Jehova, alimwi ndatobelezya milazyo yako. ¹⁶⁷ Ndibamba chakusungwala milazyo yako, aboobo ndiyandisya kapati. ¹⁶⁸ Ndabamba malayilile aako akubamba milawu yako chabusungu, nkambo ulizi zyoonse nzinchita. ¹⁶⁹ Koswilila kulila kwangu kwakuvunwa, Jehova; ndipe kumvwisisisya mujwi lyako. ¹⁷⁰ Chikumbizyo changu kachisika kunembo lyako; kondigwasya, mbuli mbuwakasyomezya kujwi lyako. ¹⁷¹ Milomo yangu koyitila intembawuzyo, nkaambo ulandiyiisya milayizyo yako. ¹⁷² Leka lulimi lwangu lwiimbe aatala ajwi lyako, nkambo milawu yako yoonse ililuleme. ¹⁷³ Ijaanza lyako lindigwasye, nkaambo ndasala malayilile aako. ¹⁷⁴ Ndisukeme lufutuko lwako, Jehova, amulawu wako ndukondelelwa. ¹⁷⁵ Nkandipona akukutembawula, alimwi imbeta zyako zililuleme kazindivuna mebo. ¹⁷⁶ Ndalewuuka mbuli mbelele iisweekede; languula mulanda wako, nkaambo nsilubi pe milawu yako.