¹ Ndamuyanda Jehova nkaambo ulamvwa ijwi lyangu alimwi ankumbizya zyangu zyaluse. ² Nkaambo wakandiswilila, ndiyoyita kuli nguwe kwabuumi bwangu boonse. ³ Yukole twalufu twakandizyungulukila, mapenzi amukabanda akandizida; ndakajana mapenzi akuusa. ⁴ Mpawo ndakiita izina lya Jehova: ''Ikaka Jehova, futula bumi bwangu.'' ⁵ Jehova ula luse alimwi aliluleme; Leza wesu ngusiluzyalo. ⁶ Jehova ukkwabilila babombe mumyoyo; ndakaliwizukide alimwi wakandifutula. ⁷ Muuya wangu ulakonzya kubweda kuchilyokezezyo chacho, nkaambo Jehova mubotu lyoonse. ⁸ Nkaambo wakavula buumi bwangu kulufu, menso angu kuzwa kuminsozi, alimwi zituta zyangu kuzwa kukudadalika. ⁹ Ndiyobelekela Jehova munyika yabuumi. ¹⁰ Ndakalikusyoma mulinguwe, nikuba eelyo ndakati, ''Ndapenzegwa kapati.'' ¹¹ Mukubulikilwa kwangu ndakati, ''Boonse bantu balabeja.'' ¹² Ndiyomupilusizya byeni Jehova izyoolwe nzyandipede? ¹³ Ndiyonyampula nkomeki yalufutuko, alimwi ndiyoyita izina lyaJehova. ¹⁴ Ndiyozuzikizya chikonke changu kuli Jehova kunembo lyaboonse bantu bakwe. ¹⁵ Chibotu kumenso aJehova nkufwa kwabasalali bakwe. ¹⁶ Jehova, nchobeni, ndilimulanda wako; ndilimulanda wako, mwana mulombe wamulanda wako mwanakazi; wandangununa kuzyanzyo zyangu. ¹⁷ Ndiyokupa chipayizyo chukulumba alimwi ndiyoyita izina lyaJehova. ¹⁸ Ndiyozuzikizya chikonke changu kuli Jehova kunembo lyabantu bakwe, ¹⁹ mumbeta zyenganda ya Jehova, akati kako, Jelusalemu. Tembawula Jehova