ALEPH ¹ Balilongezezegwe abo baluleme munzila zyabo, beenda mumulawu wa Jehova. ² Bali acholwe babamba chakusungwaala malayilile akwe, bamulangula chamoyo woonse. ³ Tabayisyi pe; beenda munzila zyakwe. ⁴ Nduwe niwatwambila kuti tubambe malayilile aako akaako kuti achitwe kabotu. ⁵ Ooh, aboobo kuti njime kabotu mukuyeeya milazyo yako! ⁶ Aaboobo taakwe ninjowusigwa eelyo nenjeeya yoonse milazyo yako. ⁷ Ndiyopa kulumba kuli nduwe amoyo uyimvwi elyo nenjiya milazyo yako iluleme. ⁸ Njobaamba milazyo yako; utandisiyi andikke. ⁹ Ino uchikula ulibamba biyeni inzila yako kuti isalale? Akulemeka ijwi lyako. ¹⁰ Njokuyandawula amoyo wangu woonse; utandileki ndipambuke kuzwa kumilayizyo yako. ¹¹ Majwi aako ndaabambide mumoyo wangu aboobo kuti nditakakubisizyi. ¹² Ulilongezezegwe iwebo, Jehov; kondiyiisya milazyo yako. ¹² Jehova ulatuchebuka alimwi ulatulongezya; uyolongezya mpuli yaIzilayeli; uyolongezya mpuli yaAloni. ¹³ Uyolongezya aabo bamulemeka, boonse baniini abapati. ¹⁴ Ikaka Jehova ngavuzye myeelwe yanu mubwiingi amubwiingi, yanu ayalunyungu lwanu.' ¹³ Amuulo wangu ndakaamba bululami bwamilazyo eeyo njiwakandiyubunwida. ¹⁴ Njobotelwa munzila yachizuminano chako kwinda buvubi boonse. ¹⁵ Njoyeeya malayilile aako akuswilizya kunzila zyako. ¹⁶ Ndabotelwa mumbeta zyako; Nsikoyoluba ijwi lyako. ¹⁷ Kobamba kabotu mulanda wako aboobo kuti mpone akubamba ijwi lyako. ¹⁸ Jula menso angu kuti ndibone zintu zigambya mumilawu yako. ¹⁹ Ndilimuzwakule munyika; utasisi milazyo yako kuzwa kuli ndime. ²⁰ Ziyandisyo zyangu zilifwide mukusukama kuti ndizibe bululami bwambeta zyako choonse chiindi. ²¹ Wakalayilila basikulisumpula, abo batukidwe, ibaleya kuzwa kumilayizyo yako. ²² Undigwisye kuzwa mumasampu amulunyansyo, nkambo ndalemeka chizuminano chambeta zyako. ²³ Nikuba kuti bendelezi balibambila akundilengelela, mulanda wako ulayeeya milawu yako. ²⁴ Chizuminano chambeta zyako nzezindibotezya, alimwi njindendelezya. ²⁵ Buumi bwangu buli jisilidi kulusuko! Kondipa buumi kwindila mujwi lyaako. ²⁶ Ndakwambila inzila zyangu, alimwi wakandimvwa; kondiyiisya milazyo yako. ²⁷ Kondichita kuti ndimvwisisisye inzila zyamilayo yako, aboobo kuti njeeye injisyo zyako zigambya. ²⁸ Newizuuka abuusu! Kondiyumya ajwi lyako. ²⁹ Gwisya kulindime inzila yabubeji; chaluzyalo kondiyiisya milawu yako. ³⁰ Ndakasala inzila yabusyomesi; ndabamba lyoonse bululami bwambeta zyako kusule lyangu. ³¹ Ndakakatila kuchizuminano chambeta zyako; Jehova, utandileki ndiwisigwe. ³² Njochijanina munzila zyamilazyo yako, nkambo moyo wangu kuchita oobo. ³³ Kondiyiisya, Jehova, inzila zyamilayizyo yako, alimwi noyibamba mane kusikila kumamanino. ³⁴ Kondipa kumvwisisisya, alimwi njobamba ulawu wako; njowubamba amoyo wangu woonse. ³⁵ Kondikwabilila munzila yamilazyo yako, nkambo ndabotelwa kwenda mulinjiyo. ³⁶ Tondeezya moyo wangu kuchizuminano chambeta zyako alimwi akuzwa mumpindu zyakutalulama. ³⁷ Kochebusya menso aangu kuzwa kukulangisisisya zintu zyabuyo; kondichitulula munzila zyako. ³⁸ Kobwezela mulanda chisyomezyo echo nchowakachita kuli baabo bakulemeka. ³⁹ Gwisya matusi mapati andiyoosya kapati, nkambo imbeta zyako nimbotu. ⁴⁰ Bona, ndasukama malayilile aako; kondichitulula mubululami bwako. ⁴¹ Jehova, kondipa luyando lwako lutakachilwi--lufutuko lwako, lwendelene achisyomezyo chako; ⁴² mpawo njooba ansandulo kuli ooyo undininda, nkambo ndasyoma mujwi lyako. ⁴³ Utagwisyi ijwi lyakasimpe kuzwa kumulomo wangu pe, nkambo chilangililo changu chili mumbeta zyako ziluleme. ⁴⁴ Njobamba ulawu wako lyonse, alyoonse mane kukabe kutamani.' ⁴⁵ Njoyenda chakukwabililwa, nkambo ndayandawula malayilile ako. ⁴⁶ Njowambula chabusungu milazyo yako kunembo lyabaami alimwi tandikolowusigwa pe. ⁴⁷ Ndakondwa mumilazyo yako, njeyandisya loko. ⁴⁸ Ndanyampula maanza angu kumilazyo yako, eyo njinjanda; njoyiyeeya milazyo yako. ⁴⁹ Koyeeya chisyomezyo chako kumulanda wako nkambo wandipa chilangililo. ⁵⁰ Eechi chichindumbuulizya mumachise aangu: kuti echi chisyomezyo chako chachita kuti nkechipona. ⁵¹ Basikulisumpula bandisampawula, pele tandina kupiluka kuzwa kumulawu wako. ⁵² Ndayeeya aatala ambeta zyako kuzwa kuchiindi chakale, Jehova, alimwi ndalyubulizya lwangu ndemwini. ⁵³ Bukali bupya bulindijisi nkambo kabasizibi abo bakaka milawu yako. ⁵⁴ Milazyo yako njiyakaba inyombo yng mung'anda yangu omo mwenkala chakayindi kanini. ⁵⁵ Ndayeeya atala azina lyako mansiku, Jehova, alimwi ndabamba milawu yako. ⁵⁶ Ndakali kuchita oobu nkambo kakuyeeya malayilile aako. ⁵⁷ Jehova nchichaabilo changu; ndayeeya kubamba majwi aako. ⁵⁸ Ndakumbilisya luse lwako amoyo wangu woonse; kondibeda aluzyalo mebo, mbuli kusyomezya kwajwi lyako. ⁵⁹ Ndalingula inzila zyangu, akuchebusya mawulu aangu kuchizuminano amalayilile aako. ⁶⁰ Ndafwambana akutachedwa pe kukubamba milazyo yako. ⁶¹ Tukole twabasizibi tulindijisi; nsilubi pe mulawu wako. ⁶² Akkati kabusiku ndabuka akupa kulumba kuli nduwe nkambo kambeta zyako ziluleme. ⁶³ Ndimwenzinyina abaabo bakulemeka, akuli boonse babamba malayilile aako. ⁶⁴ Inyika, Jehova, ilizwide chizuminano chako chisyomekede; ndiyiisye milazyo yako. ⁶⁵ Wachita kabotu kumulanda wako, Jehova, mbuli ijwi lyako. ⁶⁶ Ndiyisye kabotu kusiyanisya akumvwisisisya, nkambo ndasyoma kumilayizyo yako. ⁶⁷ Nkentana kuchiswa ndakapambuka, pesi kwaino ndabamba ijwi lyako. ⁶⁸ Ulimubotu, alimwi nduwe ooyo uchita zibotu; ndiyiisye mulawu wako. ⁶⁹ Basikasampusampu bandilengelela mebo amabejo, pesi ndabamba malayilile ako amoyo wangu woonse. ⁷⁰ Myoyo yabo yayumisigwa pesi mebo ndakondwa mumulawu wako. ⁷¹ Nchibotu kuti ndakawida mumapenzi aboobo kuti njiye milawu yako. ⁷² Malayilile azwa kumulomo wako ayindilila kundibotela mebo kwinda zyazimpanzi zyangolida ansiliva. ⁷³ Maanza ako akandilenga akundisamika; undipe kumvwisisisya aboobo kuti njiye milazyo yako. ⁷⁴ Aabo bakulemeka kababotelwa eelyo nibandibona nkambo ndajana chilangililo mujwi lyako. ⁷⁵ Ndilizi, Jehova, kuti imbeta zyako zililuzi, akusyomeka kwako wakandipenzya. ⁷⁶ Leka chizuminano chako chindumbulizye mukusyomeka, mbuli mbwakasyomezya mulanda wako. ⁷⁷ Konditondezya luzyalo lwako aboobo kuti ndipone, nkambo mulawu wako ndukondo lwangu. ⁷⁸ Leka basikulisumpula bafwisigwe bweeme, nkambo bandibisizya; pesi mebo ndiyoyeeya malayilile ako. ⁷⁹ Abo bakulemeka baze kulindime, abo bazi chizuminano chambeta zyako. ⁸⁰ Moyo wangu ulondoke mukulemeka milayizyo yako aboobo kuti nditawusigwi bweeme. ⁸¹ Ndawizuuka mukusukamina kuti antela ulandivuna! Ndalangilila mujwi lyako. ⁸² Menso angu alisukeme kubona chisyomezyo chaako; ndilili noyondumbulizya? ⁸³ Nkambo ndaba mbuuli chinkuli chawayini chayuminina mubusi; nsilubi milazyo yako. ⁸⁴ Nchindi chilamfu buti kakkalilide mulizeezi mulanda wako; ndilili noyobeteka aabo bandipenzya? ⁸⁵ Basikulisumpula bandisyida malindi, bataswilili mulawu wako. ⁸⁶ Yoonse milazyo yako njalusinizyo; aabo bantu bandipenzya bubi; kondigwasya. ⁸⁷ Bachaazya afwifwi kuti bandimaninsye atala lyanyika, pesi tandikkaki malayilile aako pe. ⁸⁸ Aluyando lwako lutazungaani, ndibambe mpone, aboobo kuti ndemeke milazyo yako. ⁸⁹ Jehova, majwi ako alimvwi kukabe kutamani; ijwi lyako lilibikkidwe lizwide mujulu. ⁹⁰ Kusyomeka kwako kulakkalilila mumazyalani woonse. Wakabambasika nyika, alimwi ilikkede mbwaa. ⁹¹ Zintu zyoonse zilakkalilila asunu, mbuli mbwakaamba mumbeta zyako ziluleme, nkambo zintu zyoonse mbazike bako. ⁹² Nendatali kubotelwa mumulawu wako, nemfwide mumachise aangu. ⁹³ Nsikoyoluba malayilile aako, nkambo kwindila mulinjiyo mumponena. ⁹⁴ Ndiwako; kondivuna, nkambo ndayanduula malayilile aako. ⁹⁵ Basizibi balibambila kuti bandinyonyoone, pesi ndiyanduula kumvwisisisya chizuminano chambeta zyako. ⁹⁶ Zyonse zilondokede nzindakabona zili amamanino; pesi milazyo yako ilikwazeme loko. ⁹⁷ Mbuti mbunjandisya mulawu wako! Nkuyeeya kwangu kwazuba lyoonse. ⁹⁸ Milazyo yako ilandichenjezya kwinda basinkondoma, nkambo milazyo yako ilaandime lyonse. ⁹⁹ Ndimvwisisisya loko kwinda boonse bayiiyi bangu, nkambo ndayeeya chizuminano chamalayilile ako. ¹⁰⁰ Ndamvwisisisya kwinda bapati kulindime; kulibobu nkambo ndabamba malayilile aako. ¹⁰¹ Ndagwisya mawulu angu kuzwa kunzila imbi aboobo kuti njeeye ijwi lyako. ¹⁰² Tandipambukilide kumbali pe kuzwa kumbeta zyako ziluleme, nkambo wakandilayilila. ¹⁰³ Anonesya buti majwi ako nengalabila, iyii manono kwinda buchi kumulomo wangu! ¹⁰⁴ Kwindila mukulayilila kwako njana impindu yakusiyanisya; nkinkaako ndasula nzila yabubeji. ¹⁰⁵ Ijwi lyako nilampi kumawulu angu amumuni wanzila yangu. ¹⁰⁶ Ndakakonkezya alimwi ndakakazuzikizya, abobiya njoyeeya mbeta zyako ziluleme. ¹⁰⁷ Ndimvwide machise loko; kundiponia, Jehova, mbuli mbwakasyomezya mujwi lyako. ¹⁰⁸ Jehova, ndakukomba kotambula inkumbilizyo zyamulomo wangu, alimwi kondiyiisya mbeta zyako ziluleme. ¹⁰⁹ Buumi bwangu bulimujanza lyangu kwalyoonse, nikuba tandilubi pe mulawu wako. ¹¹⁰ Basizibi banditeya kakole, pesi nsinakusowa pe malayilile aako. ¹¹¹ Ndayandisya chizuminano chambeta mbuli lukono lwangu kukabe kutamani, nkambo ngabotezya moyo wangu. ¹¹² Moyo wangu ulibikidwe kukulemeka milazyo yako mane kukabe kutamani. ¹¹³ Ndasulayika abo basimyoyo yobile, pesi ndayanda mulawu wako. ¹¹⁴ Ulibusena bwangu bwakuyubila alimwi ulintobo yangu; ndabulangizi mujwi lyako. ¹¹⁵ Amunditantamuke, inywebo nobasikuchita chibi, aboobo kuti nkayeeye milazyo ya Leza wangu. ¹¹⁶ Konditabilila mebo ajwi lyako aboobo kuti ndipone akutawusigwa bweeme muchilangililo changu. ¹¹⁷ Undikwabilile mebo, alimwi njofutuka; noyeeya milawu yako lyoonse. ¹¹⁸ Ulabakaka boonse abo bapambuka kuzwa kunzila yako, nkambo bantu abo balyeena akutalulama. ¹¹⁹ Ulagwisya basizibi baanyika boonse mbuli makwisila; nkambo kaako ndilayandisya milazyo yako chabusungu. ¹²⁰ Mubili wangu wakankama mukuyoowa nduwe, alimwi ndayoowa mbeta zyako ziluleme. ¹²¹ AYINI Ndachita ziluzi azilomene; utandisiyi pe mukupenzegwa kwangu. ¹²² Kusyomezya makkalilo amulanda wako; utaleki balisumpula bandipenzye. ¹²³ Menso angu akatala nendangila lufutuko lwako akambo kajwi lyako liluleme. ¹²⁴ Tondezya mulanda wako chizuminano chako chisyomekede, akundiyiisya milumbe yako. ¹²⁵ Ndimulanda wako; ndipe kumvwisisisya aboobo kuti ndizibe chizuminano chambeta zyako. ¹²⁶ Chaba chiindi cha Jehova kuti azuzikizye amichito, nkambo bantu batyola mulawu wako. ¹²⁷ Ndiyandisya mulazyo wako chakasimpe kwiinda ngolide, kwinda ngolide ntuloko. ¹²⁸ Nkinkaako ndatobelezya kabotu mbukwelede malayilile ako woonse, alimwi ndisulide inzila zyonse zyabubeji. ¹²⁹ Milawu yako ilagambya, nchinchicho nchenjilemeka. ¹³⁰ Kupandululwa kwejwi kupa mumuni; lipa kumvwisisisya kuli batezi. ¹³¹ Ndajula mulomo wangu akufwekemba, nkambo ndisukeme milazyo yako. ¹³² Kondichebuka akundibeda aluzyalo mebo, mbuli mbochita lyoonse kuli baabo bayanda zina lyako. ¹³³ Lanzya ntaamo zyamawulu angu ajwi lyako; utaleki chibi kuti chindendelezye. ¹³⁴ Kondinununa kuzwa kulupenzyo lwabantu aboobo kuti nkayeeye malayilile aako. ¹³⁵ Komunikila mulanda wako abusyu bwako, akundiyiisya imbeta zyako. ¹³⁶ Tulonga twamisozi tuleenda kumenso angu nkambo bantu tabayeeyi mulawu wako pe. ¹³⁷ Uliluleme, Jehova, ambeteko zyako zililuzi. ¹³⁸ Wakapa chizuminano chiluleme akusyomekana. ¹³⁹ Bukali bwandinyonyoona mebo nkambo basinkondoma baluba majwi aako. ¹⁴⁰ Ijwi lyako lyakasalazigwa loko, aboobo mulanda wako ulaliyanda. ¹⁴¹ Ndimunini alimwi nsikonzyi, nekuba boobo nsilubi malayilile ako. ¹⁴² Bululami bwako mbubotu lyoonse, amulawu wako ulisyomekede. ¹⁴³ Nikuba mapenzi amafwabi alindijisi, milazyo yako ichindibotezya. ¹⁴⁴ Chizuminano chambeta zyako chililuleme lyoonse; kondipa kumvwisisisya kuti mpone. ¹⁴⁵ Ndakwila amoyo wangu woonse, ''Kondivwiila, Jehova, ndabamba imbeta zyako. ¹⁴⁶ Ndakwiita webo; Kondivuna, alimwi ndabamba chizuminano chambeta zyako.'' ¹⁴⁷ Ndilabuka kubuchedo akulilila kugwasigwa. Ndilangila mujwi lyako. ¹⁴⁸ Menso angu alijukide ndaba achilabila aboobo kuti ndiyeeye ijwi lyako. ¹⁴⁹ Koswilila ijwi lyangu muchizuminano chako chisyomekede; Kondiponia, Jehova, mbuli mbuwakasyomezya mubeta zyako ziluleme. ¹⁵⁰ Aboobo basikundipenzya basika afwifwi andime, pesi balikule kumulawu wako. ¹⁵¹ Uli afwifwi, Jehova, amilazyo yako yoonse ilisyomekede. ¹⁵² Kuzwa kale ndakayiya kuzwa muchizuminano chambeta zyako nziwakabikka kuti zikkalilile lyonse. ¹⁵³ Kolanga machise angu akundigwasya, nkambo tandilubi mulawu wako pe. ¹⁵⁴ Umaninsye milandu akundinununa; kondibamba, mbuli mbwakasyomezya kujwi lyako. ¹⁵⁵ Lufutuko lulikule kuli basizibi, nkambo tabayandi imbeta zyako pe. ¹⁵⁶ Kuchita kwako nkwabuuya nkupati, Jehova, kondibamba mpone, mbuli mbochita kale kwalyonse. ¹⁵⁷ Basikundipenzya bangu abasinkondoma mbiingi, nikuba boobo tandipambuki pe kuzwa kuchizuminano chambeta zyako. ¹⁵⁸ Nimbona basilweno ndasesemwa nkambo tabababi ijwi lyako pe. ¹⁵⁹ Kulanga mbwenjandisya malayilile ako; Kondibamba mpone, Jehova, mbuli mbuwakasyomezya muchizuminano chako chisyomekede. ¹⁶⁰ Mweelwe wajwi lyako ngwakasimpe; boonse bululami bwambeta zyako bulakkalilila kwalyonse. ¹⁶¹ Bana babaami bandipenzya nkintakwe mulandu, pesi moyo wangu ulimvwi mukuyeeya jwi lyako. ¹⁶² Ndakondwa kujwi lyako elyo mbuli umwi ujana mbono inyingi. ¹⁶³ Ndilasula akusesemwa bubeji, pesi ndayanda mulawu wako. ¹⁶⁴ Zyiindi zili musanu azibili abuzuba ndakulumbayizya nkambo kambeta zyako ziluleme. ¹⁶⁵ Bali aluumuno lwiingi, aabo bayanda mulawu wako; takwepe chibakankamya. ¹⁶⁶ Ndalangilila lufutuko lwako, alimwi ndalemeka milazyo yako. ¹⁶⁷ Ndatobelezya milawu yako mibotu, alimwi ndiyanda kampatila. ¹⁶⁸ Ndilabamba malayilile ako akutobelezya milawu mibotu, nkambo webo ulizizi kale zyonseni nzyenchita. ¹⁶⁹ Koswilizya kukukwila kwangu nenjanda lugwasyo, Jehova; kondipa kumvwisisisya kujwi lyako. ¹⁷⁰ Chikumbizyo changu kachisika kunembo lyako; Kondigwasya, mbuli mbuwakasyomezya kujwi lyako. ¹⁷¹ Milomo yangu itila indumbayizyo, nkambo undiyiisya mbeta zyako. ¹⁷² Leka lulimi lwangu lwiimbe atala ajwi lyako, nkambo milawu yako yoonse ililuleme. ¹⁷³ Ijanza lyako lindigwasye, nkambo ndasala malayilile ako. ¹⁷⁴ Ndisukeme lufutuko lwako, Jehova, amulawu wako ndukondelelwa. ¹⁷⁵ Nkandichipona alimwi ndumbayizye nduwe, alimwi imbeta zyako zililuleme kazindivuna mebo. ¹⁷⁶ Ndaleyawuka mbuli imbelele isweekede; langula mulanda wako, nkambo nsilubide pe milawu yako.