Chaandano 107
1
Mupe kulumba kuliJehova, nkaambo mubotu, alimwi busyomesi bwachizuminano chakwe bulakkala chalyoonse.
2
Ibanunwidwe baJehova ngabaambuule, aabo mbakawunununa kuzwa kujaanza lyasinkondo.
3
Wababungania kuzwa kumanyika aakule, kuzwa kujwe akumbo.
4
Bakeendeenda muchimpayuma mumugwagwa wamunkanda alimwi tebakajana muunzi wakukkala.
5
Akaambo kakuti bakali enzala enyota, bakeezuuka kuzwa kukukatala.
6
Mpawo bakayita kuliJehova mumapenzi, alimwi wakabawununa kuzwa kumafwabi aabo.
7
Wakabazulwida anzila iiluleme kuchitila kuti bakayinke kumuunzi wakukkala.
8
O, kuti bantu bakatembawule Jehova akaambo kabusyomesi bwachizuminano chakwe azintu zigambya nzyaachita kubuleya!
9
Nkaambo ulalumbizya nyota yabaabo bali eenyota, aziyandisyo zyabaabo bali eenzala ulakutya azintu zibotu.
10
Bamwi bakakkede mumudima amubbundibundi, baange mumafwabi amumakketani.
11
Eechi nkukuti bakapapila jwi lyaLeza alimwi bakaka lulayo lwaUusumpukide Kapati.
12
Wakabombya myoyo yabo kwiindila mubuyumuyumu; bakawa alimwi tekwakali naba womwe sikubagwasya kubuka.
13
Mpawo bakiita kuliJehova mumapenzi aabo, alimwi wakabagwisya kuzwa mumapenzi abbo.
14
Bakeenda mumudima amubbundibundi alimwi badunsula makkole aabo.
15
O, kuti bantu batembawule Jehova akaambo kabusyomesi bwachizuminano chakwe azintu zigambya nzyaakachitila buleya!
16
Nkaambo wakatyola milyango yamukuba alimwi wiinda mumilyango yabutale.
17
Bakali bafubafuba munzila zyabo zyabupapu alimwi bakafwabisigwa akaambo kazibi zyabo.
18
Bakasweekelwa chiyandisyo chakulya chintu, bakaswena aafwiifwi kumilyango yalufu.
19
Mpawo bakayita kuliJehova mumapenzi aabo alimwi wakabagwisya mumapenzi aabo.
20
Wakatuma jwi lyakwe wabaponia, alimwi wakabanununa kuzwa kulunyonyooko lwabo.
21
O, kuti bantu batembawule Jehova akaambo kabusyomesi bwachizuminano chakwe azintu zigambya nzyaakachitila buleya!
22
Ngabakape zipayizyo zyabo zyakulumba akwaamba milimu yakwe mukwiimba.
23
Bamwi baleenda mulwizi mubwaato akuchita mabbindawuko kumanyika.
24
Aaba bakabona milimu yaJehova azigambyo zyakwe mulwizi.
25
Nkaambo wakalayilila akubusya kambizi aako kakopakopa lwizi.
26
Maato aabo akanyampwidwa kujulu; alimwi akawaalilwa mukati aansi. Mawumi aabo akayeemuka mukubulikilwa.
27
Bakazungaanisigwa akuzeyaama mbuli bakkolwi alimwi tebakachizi chakuchita.
28
Mpawo bakayita kuliJehova mumapenzi aabo, alimwi wakabagwisya mumapenzi aabo.
29
Wakawumuzya muuwo mukali, alimwi mayuwe akatontobala.
30
Mpawo bakabotelwa nkaambo lwizi lwkatontobala, alimwi wakabatola nkubakali kuyanda kuyooyimikililka.
31
O, kuti bantu batembawule Jehova akaambo kabusyomesi bwachizuminano chakwe azintu zigambya nzyaakachitila buleya!
32
Ngabakamusumpule mumbungano yabantu akumutembawula munkuta yabasilutwe.
33
Usandula milonga kuba chimpayuma, tusensa twamaanzi kuba nyika njumu,
34
anyika iizyalya kuba busena butazyali akaambo kabubi bwabantu bayo.
35
Usandula chimpayuma kuba dambwa lyamaanzi anyika njumu kuba tusensa twamaanzi.
36
Ulakkazika basinzala nkukooko, akuyaka muunzi wakukkala.
37
Bakabyala myuunda akuzikila myuunda yamasaansa yakapa goloka.
38
Ulabalongezya aboobo bakavulisya loko. Talekeli lubono lwabo kuti lucheye mumweelwe.
39
Bakachesegwa akuboozegwa aansi amapenzi aachisa amapenzi.
40
Ulatila bukali kubazululi akubachita kuti beendeende muchimpayuma, ooko kutakwe migwagwa.
41
Pesi ulakwabilila babula kuzwa kukupenzegwa alimwi ulabamba mpuli zyakwe mbuli mbelele.
42
Baluleme bayoochibona eechi akubotelwa, alimwi bubi boonse buyoojala mulomo wabo.
43
Kufumbwa musongoweelede kulangisisya eezi zintu akuyeesesya nchito zyabusyomesi bwachizuminano chakwe.