¹ Lima langu weling lai Yakobuhu, papa liawanai Ala dangui Miri Yehu Karitu, hanggang la haka mbulu dambu kabihu dama ninja la bulu halana pinu tana. Kamang Papawai Pangalangu Pamanonuku ² Angu dedi-angu dedinggu, hama biana djaka nyimi kanabu dala la matu pakamang. ³ Kanadu, nyimi pinya napa kamangu hanggang la kanandingumu hinga langu pamanangu ruku. ⁴ Matawa nama nunuku hingalanya wundana babinu kiha nyimi hi ngandi pamatu dangu mbulungu, ndaningu a makurangu nggara-nggara. ⁵ Kanadu, djaka la djuwangami ningu makurang pangadangu, malawa katakarai lai Ala, dangu kia daru eti pawuanya bulu halana tawu dangu dapa angu, dang nuna pawua dumana. ⁶ Kataka, nyuna lupangu pakaraingu dangu pawai dangu dapa djo malangu kanadu natawu nama pa djo malang beri hamana ngaling tehiku, napa ngandi ngilu lainai-lainu. ⁷ Natawu hama tungunu matangu pawamu nangalangu nggara-nggara weling lai Miri. ⁸ Tau nama kadambungu eti ndamuda namandangu da la anda lurina. ⁹ Matawa angu dedi maluri mayila hanangu la rehi padjanggana, ¹⁰ Dangu tau wulu na mbu djakai Ala napa wawaya, kanadu beri hamana wala rumba, wala munju. ¹¹ Kaba, namata lodu bana hunga nabanana na tamba bana, dangu napamalai ha da rumba, walana na munju, dangu na lanyapu na manandanguna. Tuna nu mbu, natau wulu na lanyapu lapadua ramana. ¹² Nakanyurunya natau namanunuku lapakamangu kanadu la hambelina nuna napalatang natorunguna lapakamangu, nyuna na ngalanya na tanda luri napa randi nama namuya Nyuna. ¹³ Djaka naha atu nakamanya, ambu wana dunya, '' Nyungga kamananggai Ala.'' ¹⁴ Kanadu na tau na kamanya nama akatu napa mbuhana, na ruruhuya nyuna dang na honduya nyuna. ¹⁵ Kadjaka napa rinjuna ningu wuana, nyuna napa anangu ma akatu dang kadjaka nama akatu nama tua, nuna pa dediya namulung. ¹⁶ Angu dedi-angu dedi panamunggu, ambu djarangu du. ¹⁷ Bulu hala napa wuana nama hamu dang bulu halana pa wuana nama manandangu namaingu weli ditangu, napa purunyai Ama la mbulu halana mahambila, lai-Nyuna daningu a pahilungu dang panjiyapangu narupana. ¹⁸ Lapawuku wikina-Nya, Na panjadita nyuta dang pulungu* mapadeningu kapeku na nyuta djadi wua kawungana weling bulu halana papadoyi-Na. ¹⁹ Angu dedi-angu dedi panamunggu bulu, panauya yiana: malawa ha atu mara ha atu tapa rianggang lapa patingingu, kataka dada riangga a papani, dangu dada riangga a pambeni. ²⁰ Kanadu, na mbeni na natau dada rama aya na pulung nai Ala. ²¹ Kaba tunanu, warunya bulu halana mandayahangu dang dangu nama akatu, dang katakuya nama malai malijangu na pulung nai Ala napa bada patondung lawikimu, dangu nama maka pamalundunya na ndiawamu. ²² Djadi wa papalakuya napulung dang ambu patingi djuwa anya, djaka ndia, nyumu lapiya nawikimu. ²³ Kanadu, Djaka tau nama rongu pulung, kataka ndada palaku aya, nyuna beri hamana tau nama patandanya na wikina la kaninu. ²⁴ bana halaka papatandanya nawikina dangu hina lakuya, nyuna namaruwambanya nawikina la mangiluna. ²⁵ Kanadu, natau nama pinya na hukung nama padeningu, djiya na hukung nama pamananya, dang marana lawikina nyuna, ndana djadi a mapatingingu mamaruwambangu, ktakaa na djadi m palaakuya na pulung. Nyuna na kanyurunya nggaraya napa palakuna. ²⁶ Djaka ha atu tau napa tandanya na wikina djiya na tau nama tuturu pahambayangu, kataka nyuna ndana rima anya na lamana, nyuna na lapiya na eti wikina. Na tuturuna kahiwa anaka. ²⁷ Hambayanga nama tanji dang dana manggawang la hangganai Ala dang na Ama nda nyuta djiya nama luwa tuamaha da anakiada-anakiada mila kawini meti lei la mayilada nyuda, dang nda manggang wikida ka ambuda kanyari la pinu tana.