¹ HI YEHU NAPATEGAHUHA DATOU DAM KATOBU V 1 Anapurukinguka hi Yehu waling tapinu tadulla, natou nam mangojuk attu bollunya anakeri-Ya. ² Mangaka, ittadanyak natou nam katobu anatoma-Nya, mang hinna karadda tahaga-Na, mang winnak, ''Moiri,Amu weaku pakingu, Ouwu enga pategahmuga.'' ³ Manga, pajoalananyaka lima-Na hi Yehu hinna jamiya, Hi winnanya, ''Kuweaku, teggahuya.'' Taladdu nou memma, pategahdajaka katobuna. ⁴ Mangaka, winnanyak hi Yehu, ''Pa'atikinya, abbi mutikki hingumaya tahatou tekka, halakuya patekkanyaya na ihimu ta imam, mang hailanguya manuatung keriya napareahana hi Musa kadda pikki itta hei dudda dam dangu.'' ⁵ Natomaka hi Yehu ta Kapernaum, hatouna na perwira nam aminya lahi Dunna, ⁶ mang hiwinna, ''Moiri, na'atagu engakina anna karakka ta umma, darekka mawillamaya.'' ⁷ Mang, hi Yehu winnanyaka, ''Attudi-Ga Kakkku Pateggahuya.'' ⁸ Jiadinguka, napagaping na perwira winna, ''Moiri, nyouwa danapadoumang, akupatamagu Ouwu ta mawugu, nounamu tikki hingukadiya langka hangi kawodukana enga teggahudina na'atagu. ⁹ Hiwiggu noungu, nyouwakaya tou tabara wawa jellawa, oalideamaka da tentara dapapaleawugu. Jakka akku paleawakayak nam hatouna, 'Huuya awigunya.'enga atunya, mang maiya nimi hawanguk awigukajaka enga amija, mang kerranya nei awigukajaka da atagu, enga kerradanyah.'' ¹⁰ Narangukiyaka hi Yehu atanouna, nahennang tekka mang winnajaka datou dam keriya, ''Nyouwa kakutikkigiminya nam padening, Nyouwa daddi kuittamanguha manning makullih toung nei tatou Israel. ¹¹ Kakku peaka memegimi nyiami enga doku danguya nam aminya waling ta timur jakka ta barat, dam a'dengaja hi Abraham, hi Ishak, jakka hi Yakub ta uma Amada ta Surga, ¹² jakka jiadiha ana madedi tapinu tana pale'ahaka tamakapettang nam akit. Nouhaka ada weimata dam wara ada'akitu mawilla.'' ¹³ Manga,winnanyaka hi Yehu na perwira nou weiga,''Huyaya halakuya''najajika ta tu'amu agananya napa langmannimu.'' Jakka, taladdu nou jella, na atana apategahuya. ¹⁴ Anatomaka hi Yehu ta umana hi Petrus, ittana-Nyaka na ina earana hi Petrus anakadauku. ¹⁵ Jiayaka, hi Yehu hinna jaminanya nalimana hinna alolu tagah. Mangaka, kiddinanyaka analayanya hi Yehu. ¹⁶ Anatikki haridunguka, amijakka adda maraina-Ja datou dam regga moritana, mang Hinna wurutuja damoritana naha dekkapaja anakayekkah, mang ngara dukkada dam kadauku hidda tegah bollu, ¹⁷ kan pikki paletingu napa lang winnangu hi Nabi Yesaya;''Dunnaka nam taggu deitudaja daloja jakka dahamawuluda mang nam tagu tidduja dapadda jakka dahidduda.'' ¹⁸ Mang nou weiga ittanajaka hi Yehu datou dangu dam kaworunya, jiayaka hinna paleawaha pala tahage'a mananga.Datomaka, amijellanya na tou peang taurat mang hi winna-Nya, ''Guru, kukeri-Wu langka baya-Gu am-Mu halaku yangu.'' ²⁰ Mang jiayaka, winnanyaka hi Yehu,''Da'ahu omang eingu go'uda jakka dam wurung ta awang eingu hi'uda. Jiadinguka na Ana Tou Rara, pingi pakala wai'ana-Nya nakatikku-Na damalli eimangu padouna.'' ²¹ Einya hatou namuritu-Na nam winna-Nya, ''Moiri, pahella lettuga nyouwa kakulipitanu lettupanya na amagu nam mati. ²² Napa gaping hi Yehu winnanyak, ''Keri hinguwaya Nyouwa, mattakaja datou mati kadatanuja daoali tou matida. ²³ Mang nadeatanguka hi Yehu tapinu teana, damuritu-Na amijellajaka adakeri-Ya. ²⁴ Mang kiddinanyaka na ngillu bakkul jakka ittadanyaka nangalungu anataungu hinna boaninya nateanada. Jiadinguka hi Yehu juddapananya. ²⁵ Mangaka nou, amijaka damurituna hi Yehu adabangi-Nya, Moiri, gatagama nyiama! matimanyaka!" ²⁶ Jiayaka Hi winnaja,''Ga nyiami himi mange'atoli, nanni nyiami dam maddung pangadanguna?''Manga, dedinanyaka Dunna hinna kayekkaya na ngillu hikeri kawannar hinguna. ²⁷ Jiayaka, natou dangu hinna kabarra denganya mang winnak, ''Ga touyak nam nei Dunna, hinna pakawanaruya na ngillu jakka na tahik hi tiddi kerina-Nya nahatikki-Na?" ²⁸ Natomaka hi Yehu anapala ta Gadara, amijaka dam touma duaha dam regga moritana adda toma-Nya. Ammija walida ta rati mamati adokku ganahuha, jiaya hidda eingu tou maliya na larangi nouw. ²⁹ Manga, ittadajaka dudda adda patiwung, gannanya napa maidenga-Mu Ouw lahi nyiama, nanni Ana Maraba Alla? widdak. Hi ammi-Gu nimmi kakku pikki hukkuja langka daditomakaya narahina wim-Mu gamma nyiama?'' ³⁰ Mang eijaka dawawi majangi talihida dam manyerangu pa'angu. ³¹ Jiayaka damoiritana weiga hidda karei-Ya mang hi widda-Nya, ''Jakka awurutka-Mu gammaka, paleawa nougama kamapiki tama neilauwu tawawi dangu.'' ³² Mangaka, winnajaka hi Yehu, ''Huyay halakuya!"winnaja.Jiayaka lohungdanyaka waling tatou mang hidda tama tawawi dangu, mang jiayaka dawawi hidda le'ang wikkida waling ta ngabang lapakangu ta tahik, mang hidda mati ta wei. Mang ittadanyaka ngaradukana nam einya ta koata analohubollung anaparegga denga-Nya hi Yehu. Adda ittayaka hi Yehu, kareida-Nyaka kanna pikki jijakkunya na loadama awidda.