¹ Paheling nammu laddu, hi Yehu kamaikanajaka hi Petrus, hi Yakobus, jakka hi Yohanes na anguwuana hi Yakobus, mang hinna maraija ta tadulla nam jaga hijia meahaha. ² Nouyaka hi Yehu anna paheapang nahada-Na tahagada. Nangoara-Na nabillaku mearana nawahanguna, jakka nakoapin-Na kaka kapuka tekka. ³ Mang ittadajaka, hi Musa jakka hi Elia adda hunga, adda panewi denganya hi Yehu. ⁴ Winnanyaka hi Petrus hi Yehu, ''Moiri, Nadehha oata aeida yayi, kuwolu hinguya tillu padoung ya, hangi Ouw, hangi hi Musa, jakka hangi hi Elia.'' ⁵ Atanga panewina hi Petrus, aminya na robbang nam wahang tatu'adda, mang einya nam panewi waling ta robbang nam winna,''Nei jiayaka na Ana-Gu napa buha-GU, lahi Duuna-Ya Akku tauya napa napangadangu-Gu. Rangu nou hingunyaya Dunna.'' ⁶ Adda ranguyaka damurituna neiyi, karraddadanyaka lappak ta tanaha dangoarada mula adokku mangeatuha. ⁷ Jiayaka hi amminya hi Yehu anna tuddakuha, ''Kiddiya abbi mange'atmang hi winnaja.'' ⁸ Dahawellajaka dawuamatada, hidda tangaraya hi Yehu nam jiameahakiya damalli eimang oali-Na. ⁹ Tanga kaburrunguda waling tangabang, woanajaka hilu hi Yehu, winnaja.''Abbi lollukmaya tatouwu, kagearakaya agananya napa itami nei hudda atomaya baru anna kiddi bali na Anana hi Moiri waling tatou mati.'' ¹⁰ Mang Jiayaka damuritu-Na hidda tuturu-Ya,''Mang gawali dam peangu Taurat dudda hi widdali, hi Elia jiaya nam ammi moulunya hi widdali?'' ¹¹ Napagapingu hi Yehui winnaka,'' Hi Elia nammu ammi moulu tekkanya mang hinna patiddinya nam kaleagu. ¹² Jiadinguka Nyouwa wiggugimmi, aeianya hi Elia jiadinguka dadda peamanya manga hidda woluya jakka adda ge'anya adda keriya naha wukkuda. Tanou jellana na Ana pahapuru-Na enga mawillana ta limmada dudda.'' ¹³ Menganouwu, damuritu-Na peadanyaka napa panewi-Na ajiaya hi Yohanes Mapaihhu. ¹⁴ Natomabalijaka hi Yehu jakka damuritu-Na datouw dangu, amilnyaka hatou namoani lahi Yehu anna karadda tahaga-Na mang hiwinna, ¹⁵ ''Moiri, namukiganya na anagu nam wutu manu dokku mawillakiyak. Napatutungu anna kana'u ta api jakka ta wei. ¹⁶ Kumaraijellanyaka tamuritu-Mu, jiadinguka dadda bihamang adda pategahuya.'' ¹⁷ Napagaping hi Yehu winna,''Heh, nanni nyiami labbi mamalatung jakka tou jallur! Pirra dounguha madei-Gu ammi oali-Ga? Pirra dounguha Nyouwa Akku tarrung tahagami nyiami? Marainya nimmi nalakeda ta haga-Gu.'' ¹⁸ Jiayaka hi Yehu hinna kayekkaya namoritana hi keri lohunguna waling talakeada moani lappak hinna teggah memma nei nalakeada. ¹⁹ Mangaka amijaka damuritu-Na hi Yehu adda tomanya, atanga meaha dengada-Nya hidda tuturu-Ya,''Ga nyiama dam bihakang amma wurutunya namoritana nei?'' ²⁰ Nahilu-Na winnaja,''Mulana ahakuddukina na manningumi jiaya. Kakku tikkigiminya nam padening lahi nyiami, na manningumi jakka ahawatu roawi hingu kaddina, langaka tiddi panewiminya, nei na ngabang kanna gehhir wali yanguya lappak neiya lauw ! awimmi enga gehhirunna. Daeimangu dappa bihami. ²¹ [Atonoukanaka, nei namoritana awurutukanyaka waidanya habayang jakka puaha.''] ²² Atanga pakehhangudda hi Yehu jakka damuritu-Na ta Galilea, panewina-Nyaka awinnaja,''Na Anana hi Moiri enga harakadanya ta lima tourara, ²³ mang hidda hamati-Ya, nakiddi bali taladdu katilluna.''Mang jiayaka damuritu-Na hidokku millaya na'atida. ²⁴ Datomaka ta Kapernaum, dam tagi hikatiku dam dubba dirham ammija lahi Petrus adda tuturuya,''Ga nagurumi hidanna woakang hikatiku dubba dirham? awidda'' ²⁵ Napagaping hi Petrus winna, ''Oa'a'' Mang natamaka taumma, moulunanyaka hi Yehu anna panewi denganya winnanya,''Gikkinouna napangadangumu ouw Simon? Mawaling lahi gearaya nei dam tiddang tapinu tana adda karei kaheawa jakka hikatiku? Waling ta'anada penya nam waling tatou hawangukang?'' ²⁶ Atanga pagapinguna hi Petrus waling tatou hawanguk awinna, panewi nanyaka hi Yehu winnanyaka, atanoukanaka, da'anada dadda woamang. ²⁷ Nounam, abbi tawoluja huddada, huyaya ta tahik kammi le'ang kawua. Dekiyaya nakaboku napa kenna moulu kammi wehhananya na a'ana, peala mikolinya ta a'ana na ommah mang kammi dekiya nariti, kammik woaja tagu-Gu jakka tagumi dummi.''