Mangaka nouwu ameljaka datou parihi jakka datou Haladuk kam kakaya hi Yehu awidda. Dakareiya hi Yehu kanna patekkagama tada waling ta Surga awidda-Nya. ² Jiadinguka, hi Yehu anna pagapija winnaja,''Kakku riddung awinnakaka, wahangnanya wimmi ammi ittaya na awang anna rara.' ³ Mang ababaru, 'naladu yayi kiddinya na ngilu bangat kaddang na awang anna rara mang nakapettang.'Mipeanya na hadana na awang jiadinguka dammi peamanya nahadana na laddu nam aminya. ⁴ Natou nam bokkal jakka nam manyarikmanyerra oatanya na tada jiadinguka daeimang mapa ittananya jiapaya na tada lahi Nabi Yunus. ''Mang jiayaka hinna halaku anna jijjakuja. ⁵ Datomaka damurituna taha ge'a tahi tamananga dengang danyaka paiddi roati. ⁶ Mang winnajaka hi Yehu, ''Kammi ranguha jakka mipa'atija datou Parihi jakka datou Haduki.'' ⁷ Mang jiayaka hidda lollukuya nei weiga atanga jia meahaha widdak, ''Yajiata adatta iddi roati jiaya.'' ⁸ Atonouda napeaja hi Yehu mang jiayaka hi winna, ''nanni nyiami dam kullih na manningummi, gahimmi panewi meahalinya nouwu nadaeingu roati? ⁹ Atonoukanaka nyiami daddi mipea jellamanyah mang dammi hillu namumayaha damma limmada daroati anna a'ja lima ribu touw, jakka dam reihi dam dokku danguh apakehhaja taboala? ¹⁰ Jakka dam pituda daroati naaja tou patu ribu, mang pirra boalada dam reihi dappa pakehhami? ¹¹ Gikki nounaka nyiami dammi peaduaku hingukanya, Akku panewi dajiamang roati papanewi-Gu lahi nyiami? Jiadinguka kadda paatija daragida datou Parihi jakka datou Haduki wiggugimi.'' ¹² Awinna nounguka jiayaka hidda peanya adda jiamangu ragi roati papaatida, datou Parihi jakka datou Haduki ajiaha daha widdang. ¹³ Natomaka hi Yehu ta tana Kaisarea Filipi, tuturnajaka damuritu-Na,''Gannanya winna natou ammiranguya natu'ana na Ana pahapuruna hi Moiri?'' ¹⁴ Dudda dapagaping widda,''Hawanguk hi Yohanes Mapaihhuya widda, mang hawangukli hi Elia widda, jakka hawanguk jellali hi Yeremia widda, adakaka jiayaka na nabi nahawiddang.'' ¹⁵ Mang natuturliha hi Yehu, atonoukanaka nyiami gearaya wimmi-Ga Nyouwa?'' ¹⁶ Pagapingnanyaka hi Simon Petrus, Ouw jiawuka Mesias, na Ana pahapuru-Na hi Moiri na pingi morrik?'' ¹⁷ Jiayaka hi winnanya hi Yehu,''mumaririkangu dummu, Simon anana hi Yunus, dam waling takatiroumamunya jakka damma waling tawei ra'mamunya nam peakagunya'ya, jaidinguka mawaling ta Ama-Gunya nam einya ta Surga. ¹⁸ Mang wiggu jellagimi nyiami jiamika hi Petrus. Tapinu watu neiyi, nouya napingi papakiddigunya na jemaatu-Gu jakka jiadiya na kaleana mati danna talumangu. ¹⁹ Kuwoagiminyaha nyiami na kuhina nabinna tama ta Surga. Aganakananya napalanga hamaddumi tapinu tana enga maddung jellana ta Surga. Jakka ganakananya napa paloajami tapinu tana naloaja jella ta Surga. ²⁰ Mangaka nou peakanajaka damuritu-Na abbi dalollukuya taha tou tekka ajiaya Dunna na Mesias. ²¹ Walinounakana hi Yehu anna peakaya ta muritu-Na, naha laku hinguha ta Yerusalem jakka nakollingu mawilla waling tatou peangu, ta imam kapala daha widdang, lappak dam peangu Taurat, daha mati-Ya mang hinna kiddi bali taladdu katilluna. ²² Jiayaka hi Petrus hinna wealaya ta karahana, natagoru-Ya awinna-Nya, Moiri, anakaya hi Allah kanna pamaroukanya waling lahi Ouw! ²³ Nagilakuka hi Yehu winna-Nyaka hi Petrus,''Helling ta haga-Gu, he Moritana! Abbi mijael watu mapanyibang lahi Nyouwa, nanni ouw dammu haraimanya napa ngadangumu nou deaha nam waling lahi Allah, jiapaya napangadang nam wali tatourara napa hamannumi. ²⁴ Mengaka nou hi Yehu Winnajaka damuritu-Na,''Jakka aeikanguka makeriwa Nyouwa, namatta bollunyaha nahitouna, nadeituya na aiharikka, mang hinna keriwa. ²⁵ Ageara nam kadawung wikkina tapinu tana enga danna luputmang. Jakka agearakayaka nam mati lumidengaga mula-Gu nyouwa jiaya nam kollingu mapatu'a. ²⁶ Gannakanya napa utuwaidanya akolli bollunya naihina napinu tana, adda eikanguka padouna nadeawada? Mang gannakanyaka napa paheapa waidanya? ²⁷ Hiamminya tapinu tana na Anana hi Moiri, wainanya nabiahana na Ama-Na jakka dam malaikat da pamaraina-Nya, mangaka nouwu hipag'ananya hatou-hatou agananya naha woluna. ²⁸ Kupanewinya nam padening lahi nyiami, eijellanya hawanguku nam einya yayi damma haria hudda mati lappakang adda ittaya na Anana hi Moiri a'ammi-Nya anna puruwaingu biaha jakka dedi-Na.''