¹ Tangaya najaji rajana hi Herodes anna ranguya nalarana hi Yehu. ² Mang kamaikanajaka da atana,''Nei jiayaka hi Yohanes Mapa'ihhu. Kiddi balinanyaka walingu tatouw mati na waddi-Na hinna biaha oata. ³ Tomadanyaka narahina hi Herodes anna appaya hi Yohanes Mapa'ihhu, anna pinya mang hinna patamanya ta gallu mulana hi Herodias na araweina hi Filipus, na anguwuana hi Herodes. ⁴ Balli anna kayekkawa hi Yohanes winna,''Dan kallu mang ouwu ammu dekiya hi Herodias winnanya.'' ⁵ Mangaka nahawukkuna dunna kakku hamatiya hi Yohanes winna, jiadinguka nam nge'atunya nam dangu alanga peadanyaka hi Yohanes anabiya. ⁶ Atomaliyaka, na laddu rahi jajina hi Herodes, neagunanyaka na lakeada mawinni na anana hi Herodias tahagada, jiayaka hi hennanguya hi Herodes, ⁷ hikeri parunguna langkagananya napakareina nalakeada mawinni nam neagu nei enga woahingunanya. ⁸ Alanga dehaknanyaka na innana nalakeada mawinni dunna, winnaka, woahinguganya yayi, nakatikkuna hi Yohanes Mapa'ihhu tapingi paneagugu hi winna.'' ⁹ Namilla kadingu na atina na raja, jiadinguka langa parungunaka, mangali hei datouw dangu da oali anguna eijaka jiayaka hinna paleawa touwu kapikki hamatiya. ¹⁰ Jiayaka hinna paleawaha lippi hellinanya naka tikkuna hi Yohanes ta gallu. ¹¹ Mang iddidanyaka naka tikkuna hi Yohanes ta pingi paneaguna nalakeada mawini, hi woananya mang hinna iddinanya na innana. ¹² Mang nouw, ammijaka damurituna hi Yohanes, hidda lappa dekinanya na ihina mang hidda tanunya. Damengaka patanunya halakudanyaka adda iddiya nawinina hi Yehu. ¹³ Anna rangu tanounanyaka hi Yehu, purruh wikkinanyaka wali noungu nou hinna deatang teana, hinna hagang tapadoungu nam kahika ajia meahaya. Darangyaka atanouna attolijaka datou dangu dam keri-Ya adda halaku tana tapadouda. ¹⁴ Nalohunguka hi Yehu, ittanajaka datou majangi adda kabuang, jiayaka hinna milla ati dengaja, mang hinna pategahuha. ¹⁵ Natikki hariddunguka, ammijaka damuritu-Na adda toma-Nya hi Yehu widdak, ''Napadoungu yayi makahikaya mang riddung winnaka. Paleawa luruhuha kadda bali kadda pikki manyerang pa'angu nutuwawa taparaingu. ¹⁶ Napagaping hi Yehu winnaja,''Abbi pahelladija adda halaku. Nyiaminguha nam woaja pa'angu.'' ¹⁷ Mang widda-Nyaka, ''Daeimang ganaananyak ya jiata, tiddi jia tekkakiha da kababa dam limmada jakka damma deida dakaboku.'' ¹⁸ Iddiha himmi lahi Nyouwa, winnajaka.'' ¹⁹ Mang nou, paleawanajaka datouwu ngodu tapinu rutu, dekinajaka dakababa dam limada jakka dakaboku dam dubbada,tangarananya ta awangu anna habayangu mang hinna bearaha weiga dakababa.Mangalika nouweiga, woanajaka tamuritu-Na, mang damuritu-Na hidda woaja datouw dangu. ²⁰ Ngara dukana natou dangu na abollung hudda anna bihhu. Dakollinguka pakka ngoaliha dam reihi dakababa habulu dubba boalada. ²¹ Ngaradukana nam angu eingu lima ribuya na moani , dadimaha da mawinni jakka dalakeada merrah. ²² Nadehakuha damuritu-Na hi Yehu deatangu ta teana anna hamouluja adda pala tahabali nei, mang Dunna hinna paleawaya natou dangu bali. ²³ Namengaka papaleawaya bali natouwu, Dunna deatananyaka tapinu tadulla ajiameah-Ya anna habayang. Gigiring hinguyaka, Dunna jiameha kiya nutu lauw. ²⁴ Nei natena weiga nam rouka waling ta tana mara, aminyaka na ngalung anna toduya mang hinna ko'ittuya ngilu ta hagana. ²⁵ Tomayaka na jam patu rani dammu, amminyaka Dunna anna tomaja, halakunanyaka tapinu wei. ²⁶ Daittayaka damuritu-Na anna halaku tapinu wei, mange'at oatadanyaka jiayaka hidda patiwung, ''moritana neiye widakka.'' Mang patiwungdanyaka adda mange'atunya. ²⁷ Jiayaka hi Yehu alolu panewinanyaka, winnajaka, pamadduja da atimi nei Nyouwawa, abbi mangeatmang.'' ²⁸ Mang jiayaka dunna hi Petrus hi winna-Nya,''Moiri, jakka a'Ouw tekkadi-Wu, maiwimmuga ka'attuga lahi Ouw kakku halaku tapinu wei.'' ²⁹ Jiayaka hi Yehu '' Maiyaya!'' Jiayaka hi Petrus hinna lohung waling ta teana, mang hinna halaku tapinu wei, anna tomanya hi Yehu. ³⁰ Jiadinguka, naittayaka anna ngillu, mange'atnanyak mang hinna tabubal. Patiwung nanyaka anna dangu,''Moiri gataga!'' ³¹ Jiayaka hi Yehu hinna pajoalanya limma-Na, naha mannuya hi Petrus, mang winnanyak, ''Nyiami damma maddung pangaddanguna gahimmi dokku momolim?'' ³² Datamak ta roangu teana, kawannarnanyak na ngillu. ³³ Mang jiayaka hidda hali-Ya adda manuatu-Nya mang hi widda,''Napadening, Ouw jiawuka na Anana hi Allah!'' ³⁴ Mangaka paladanya hidda toma ta Genesaret. ³⁵ Adda peanyaka datouw dam eija tapa doungu nouwu, ammijaka adda maraija ngara dukkada dam kadauk lahi Yehu. ³⁶ Dapa ohha tekka-Nya hi Yehu kamma pikki kerrananya na hupu koapi-Na awidda, jakka natou dangu nam kerranya na hupu koapi-Na hi Yehu nateggah memma.