¹ Atanga lohunguna hi Yehu wali ta umma, ngodunanya wiwi tahik. ² Manga, kabuangu danyaka datou dangu lahi Dunna. Jiayaka, Dunna hinna deatang ta teana anna ngodu, mang ngara dukada datou dangu tawiwi tahik. ³ Mang nou, doku dangu oataya napa tikkinaja manga hinna dekidanya ngearana hi winna-Ja,''Einya nam hatouna nam halaku lapa ho'arung, ⁴ mang tadalu anna ho'arungu, hawanguk nawini naka nau tawiwi larangi, amijaka dam wurung hidda anya hudda anna dukka. ⁵ Hawanguku nakka nau tajoanga watu dam dangu na tanana, nageaha anna tubu alanga manipihuna na tana napa douna. ⁶ Ammipanyaka na mata laddu, malelinanya anna kennaya. Adda eimemanguka loluna, jiayaka weiga nawini nam tubu hinna mati. ⁷ Nawini hawanguk nakana'u ta libbu ri, mang natubuka nariyi, hinna kadipituya. ⁸ Jiadinguka, ei jellanya nawini nam tubu ta tana nam kabokahu jiayaka nam wua kallung, einya nam pahangahu wuddang, einya nam panamumabulu wuddang mang eijellanya nam patillumabulu wuddang. ⁹ Gearaya nam eingu wuakahiluna annakaya kanna rangu.'' ¹⁰ Mang damuritunna hi Yehu amijaka adda tuturu-Ya, Gawali Ouwu himmu waiwaling hilu hangearang ammu panewi dengaja winna-Nyaka?" ¹¹ Napagapija hi Yehu,''Lahi nyiami langa einyaka nakuhi naha peadengaminya na moriku malodung ta Surga, atouda hei dudda dawoamaja kuhi, winnajaka. ¹² Atonoukana, natou nam einguna jiaya naha woangu mang hitaba danguna naha kollina. Jiadinguka natou dam einguna, huka dekidananya gannanya nam einya lahi dunna. ¹³ Jiayaka hikku dekidanya ngearana,langakadda ittawakanya wuamata magga dam ittaha, langkada rangu waikanya wuakahiluda magga dam ranguha, mulana addada rangu jiayaka hidda eihingung hapeada. ¹⁴ Natu'ad hei dudda, paletinoungu nanyaka napalanga winnangu hi Yesaya, 'ammi kahiluya mirangukadingu, jiadinguka dammi peadoakumanya. Mang mi ittakadiya tahagami, jiadinguka danna tamamang tapangadangumi.' ¹⁵ Na atida datou heiyi nam kapaluka, dawuakahilu dadda hillu rangu waimajaha, nawua matada toadidajaka. Addatanoupada, kadda ittawaingu wuamatada, kadda rangu waingu wuaka hiluda, mang hidda peanya ta atida, jiaya hidda keribali-Wa mang hipategahuha.' ¹⁶ Jakka atonoukanaka, dammariringu dawuamatami ammi ittawaija, jakka wuakahilumi ammi rangu waija. ¹⁷ Kutikkigiminya nam padening lahi nyiami enga dokku danguha da nabi jakka datou keri makallung dam buhang paittaya agannanya napaittami, jiadingu dadda ittamaya, jakka agannanya napa rangumi dabuhang paranguya jiadinguka dadda rangumaya.'' V 18 Atonoukanaka, kahilu ranguya naha wukkuna na hilu hangearang tam hoarung. V 19 Toukana natou nam ranguya winin hi Moiri danna tamamang tapa ngadangunna, mulana namoritana nam parimanya nawini nam langa tamana ta atina natou nei. Natou nei jiayaka nawini nam kanau tawiwi larangi. ²⁰ Nam kanau tajoanga watu, nei jiayaka natou nam ranguya nawini hinna tama ta atina adokku dehhaya, ²¹ jiadinguka danna kullihmang ta ihina jiaya hidana tarrung mang hidanna malli madei. Jakka amminyaka nam pam nge'attuya anna heiirunya paranguya nawini, alolu kana'u tanananyaka. ²² Nawini nam kanau talibbu ri dunna natou nam ranguya nawini, jiadinguka taha balina nouwu nadadar oata mang nam nge'at oata abbi najappuga hawaingu awinna, jiaya hidanna tubu nawini ta atina. ²³ Jiadinguka dunna, nawini nam kennang ta tana nam kallung, jiayaka natou nam ranguya nawini napatamanya ta atina mang hinna hamannuya. Nei jiayaka nam wua padangu, einya nam hangahu wuddang, einya nam panammum buluwuddang, mang einya nam tillu mabulu wuddang.'' ²⁴ AHANGEARANYA NALIBBU WITU JAKKA NAPARI V Napatomadanya nahilu hangearanguna hi Yehu, win-Na, ''Namorrik ta Surga ahangeara waikanyaka mearana natou nam hoarunya nawini pari ta kahibu jakka ta talaka. ²⁵ Jiadinguka, atanga juddanna, ammijaka damuhuna adda hoarunya na walla witu ta joanga wini pari, namengaka pahoarunya na walla witu halakupananyak. ²⁶ Anna tomayaka napa lua waina itta jelladanyaka na luana na witu. ²⁷ Jiayaka, ammijaka daatana namoiri kahibu hidda tuturuya, 'Moiri, dadonnang dinna nawini pari kallung napa hoarum takahibumu? Mang bayaka wali yana nei nawitu? ²⁸ Winnaka dunna anna pagapija, 'Einya hatou namuhu nam woluya.' Mang widdanya da atana,'Muweakudingu nammu kamma piki halaku nyiama amma kangahuja?' ²⁹ Jiadinguka, namoiri kahibu winnaka, mattang! Ammi kangahukanya peala nawitu, biha ammi batu pamarainya tapari. ³⁰ Matta kadija kadda tubu pamaraingu lapak atomaya naharobu hi hikkakah. Mangaka, atomakayaka naharobu, peala wiggukanya nam hoarung,''Kanpakehha moulunya nawitu, kanna nahiya anna pinya mang hinna tunuya. Jakka jiadiya na pari mupakehhanya kammu tauya ta leppitugu. V 31 Mangalika, hi Yehu hinna hangeara waiwalidanya, hiwinnaja,''Namorrik ta Surga mearana na watu roawi napa hoarung touwu ta kahibuna. ³² Na watu roawi namerrahki waling ta roawi hawanguk, jiadinguka anna tubuka, reihi bakkuluya walingu ta roawi hawanguk, lapakang hinna jai pingi ai, amija dam wurung wali ta awang hidda wolu hi'uda takahangana nam dangu.'' ³³ Mang nouwu natikkeldanya hi Yehu na hilu hangearang hawanguk lahi dudda,''Namorrik ta Surga mearana na ragi, napa dekida dam winni adda paha'urunya ta tepung nam tillu kiluna lapak ludda anna kenna bolluya ragi adda woluya adonan. V 34 Ngara dukana napapatomana hi Yehu tatou dangu waingu hilu hangearang bollunanya, jakka daeimang panewi-Na lahi dudda dapawaina hilu hangearang. ³⁵ Atonoukanaka, tomadanyaka narahina anna paletingu napapatomada da nabi,''Nyouwa Kuwehhaya na a'agu waingu hilu hangearang, Nyouwa kutikkiya nam kabuning walingu nakawunga jelli tana jakka nakka wunga jelli awang.'' V 36 Mangaka nouwu, dijaknajaka hi Yehu datou dangu, tamananyaka ta roangu umma. Jakka ammeljaka da muritu-Na mang hi widda-Nya, ''Palarapagamanya nyiama natu'ada da witu ta kahibu.'' ³⁷ Mang winnajaka, na wini nam kallungu jiaka na Anana hi Moiri, ³⁸ jakka na kahibu jiayaka napinu tana. Nawini nam kallung jiayaka na anana hi Moiri, mang na walla witu jiayaka na anana dam kallung, ³⁹ jakka na muhu nam hoarung jiayaka namoritana, jakka narahi harobu jiayaka naladdu pahakking nam aminya, mang nam harobu jiahaka dam malaikat. ⁴⁰ Jiayaka, mearana nawitu napakangahungu mang hileaya ta api hitunuya, tonounaka peala taladdu kaweadana na tana. ⁴¹ Hi Moiri peala paleawanajaka dam malaikatu-Na, mangaka dudda hidda pakehha bolluja dawatu dapahawiddang, lappakangu ngaradukada datou dam woluya nam jurrak tahaga-Na hi Moiri, ⁴² jiayaka peala hinna ta api joanga tullar.Tapadoungu nouwu jiayaka napingi paittangu mawilla dam eingu dikkina. ⁴³ Mangaka nouwu, natou nam keri makallung nawahang mearana na mata laddu adda morrik ta umma Amada. Gearaya nam eingu wuaka hiluna anakaya kanna rangu.'' ⁴⁴ NAMORRIK TA SURGA MEARANA NA OMMAH RARA NAPATANUNG V 44 ''Namorrik ta Surga mearana na ommah napa tanungu takahibu, napaitta touwu manga hinna kabuni balinya. Mang, adda rekkayaka nareaha dengananya, halakunanyaka anna dagabollunya naihi ummana, jiaya hinna hiya nakahibu nouw weiga. ⁴⁵ Wiggu jellagimiha hadekka, Namorrik ta Surga mearana natou dagang nam manyerang ommah rara. ⁴⁶ Anna kolikanyaka hangi na ihi ommah rara, halakunanya anna dagaja ihi roangu ummana, manga hinna hiya naihi ommah rara nei.'' V 47 ''Toujellana namorriku ta Surga mearana najala napawolarungu ta tahik hinna kehhaha hamamattu kaboku. ⁴⁸ Anna tomayaka nabinnuna na jala, hidda wealaya najalada takorrah mang ngodudanyaka adda hikkaha dakka boku makallung adda tauha ta kareara bakkul, mang hidda leaha dam kallung. ⁴⁹ Jiayaka peala nam jai taladdu nam aminya anna kaweada na tana. Dudda dam malaikat amija adda kalikiya natou jurrak walingu tatou nam kallung, ⁵⁰ mang hidda leaya natou jurrak ta api. Nouhaka adda ittangu mawillada ahukkuja. ⁵¹ Mang nouwu nyiami mipea bollukadinyaka nei?" Jiayaka dudda oa hiwidda-Nya.'' ⁵² Mang winna jellapah hi Yehu lahi dudda, ''Atonoukanaka, ngaradukada dam peangu taurat, jiaha dam jai murit ta morriku ta Surga, dunna peala mearana namoiri umma nam palohu bolluja daihi ummana da ommah rara dei jakka dam buangu.'' HI YEHU DABUHAMANYA TAPINGI HAWALINA V 53 Namengadika papapeakangu waingu hilu hangearangu, halakunanyaka hi Yehu wali noungu nouwu. ⁵⁴ Mang anna tomaka tapingi hawali-Na, halakunanyaka ta sinagoge anna ajaruha datouw manga hidda kabarra denga-Nya hiwidda,''Bayaka anna kolli yangu natou neiyi hidokku peangu-Ya jakka mang hinna biaha tekka nahawolu-Na nei? ⁵⁵ Mang nei dajiadiya nammu na anana nam taggu pogu ai? Hi Maria nahawiddang dajiadiya na in-Nan, jakka da anguwua-Na hi Yakobus, hi Yusuf, hi Simon jakka hi Yudas? ⁵⁶ Dajiadiha da anna wini-Na hammu dam eija lahi jiata? Bayaka wali yana na Touw nei anna kollinya nam tonoungo?'' ⁵⁷ Mang jiayaka hiddada hukka ati denga-Nya. Jiayaka hi Yehu hiwinnaja,''Nam hatouna na nabi dalara dapa'akamadanya, jiadinguka anna bali noung tapingi hawalina jakka ta umma wikkina jia'aya.'' ⁵⁸ Mang dan patekka padamanya na biaha-Na nou lauwu weiga mulana addada wainya.