¹ Mang, Dunna hi Yehu kamaikanajaka dam tou mahabulu duaha damuritu-Na anna woaja kuaha adda wurutunya na moritana jakka adda pategahu bolluya nam eingu panyakituna nam kapiala. ² Eijaka ha dangarada dam touma habulu duaha da murituna weiga; Nam moulu, hi Simon na ngara heakana hi Petrus widda jellanya, mang hi Andreas na anguwuana, mang hi Yakobus na anana hi Zebedeus, mang Yohanes na anguwuana, ³ hi Filipus jakka hi Bartolomeus, hi Tomas, jakka hi Matius na kapala hi katiku, mang Yakobus na na anan hi Alfeus, mang hi Tadeus, ⁴ mang hi Simon nam tou Zelot, jakka hi Yudas Iskariot nam pakoung anna daga-Nya hi Yehu. ⁵ Anna paleawaha hi Yehu da murituna mang hinna panouha, ''Abbi kerimaya na lara ngi nam hagang ta loada tou Samaria, ⁶ mi halaku noungu tapa douda da beabu dam jalur dam ittangu larangi kallung ta padua tana Israel. ⁷ Mangaka, tadalu halakumi, mi patomanya ammi tikiya, ''Maraninanyaka na aminya hi Moiri ta Surga wimmi hi winaja. ⁸ Pategahuha dam kadauku, pamorikuha dam mati, pawarahuha dam katobu, wurutunya na moritana.Nyiami kolli kaluang minya, peala mi woa kalua jellangu. ⁹ Abbi mi iddimang omah rara, perak jakka tabaga nam eingu ta kalaru bagimi, ¹⁰ tou jellana kareara tadalu halakumi, mang abbi kaduabella dingu koapimi jakka tarawihimi, tou jellana takkungumi jiadinguka nyiami napa dou memanguka ami tomang pa'angumi. ¹¹ Jakka ammi tomakaka beinya naloada nouw napa tamami, mihalidikiya gearaya namma pia ammi enga noungu lappakangu ami halakoli. ¹² Ammi tamakaka ta umma nouwu, miwoangu limma. ¹³ Jakka amma luruhkayaka na uma nouwu, anakaya kammi ididanya kanyuru, jakka adanna luruhkaka, nakanyuru napaidimi nabalika lahi nyiami. ¹⁴ Agearakaya damma tarimami dam ranguya napa tikkimi, ammi lohukanguka waling ta uma nouwu jakka taloada nouwu, kobahuja dakubbur tabala wihimi. ¹⁵ Kakku tikkigiminya nam padening lahi nyiami, peala taladu rahi pahakinada, na tana Sodom reihi halealaya napa taguna walingu ta loada nouw. ¹⁶ Patetinguha, Kupaleawami nyiami mearangu beabu nam einya tapadua ahu bani. Jiakadiya nyiami mipadaga maddung jakka mipamurah mearapating. ¹⁷ Mipaati jellaja hei datou dam harakagimi peala lahi Sanhedrin jakka dam koajami ta uma pingi pahabayanguda. ¹⁸ Mang damaraigimi tahaga toubani nam hamannu kuaha jakka tahaga raja mula-Gu Nyouwa, adda jaji hakhi tapinu tana. ¹⁹ Jiadinguka, adda harakaagimi nyiami, abbi momumang agananya napa tikimi, peala atanga patomaminya nouyanguha hiwoagiminya gananya napatikimi. ²⁰ Hitanouna, danyiamimang nam panewi, jiadinguka na Amami nam biaha madi nam panewi tapangadangumi nyiami. ²¹ Mapaangwuangu pahamati wiki, mang maanang maamang. Jakka da lakeada dudda dageaja da amada manga hidda hamatiha. ²² Nyiami nahukka bollugimi ati mulana na ngara-Gu, jiapaya natou nam tarrung lappa tahupu dukkana jiapaya nam moriku malodung. ²³ Adda taukamika adda pamawillami tahangi padoungu mihalaku tapa doungu hawanguku. Kakku tikkigiminya nam padeningu nanni nyiami dammi mengamaya naloada Israel amiletiya lapak hudda aami-Nya hi Moiri tapinu tana. ²⁴ Damurit dada reihimaya na guruda, toujellana dunna na ata danna reihimaya na moirina. ²⁵ Rekkanaka na muritu anna hameara denganya na guruna, jakka na ata anna hameara denganya na moirina.Touna na moiri umma hi Beelzebul awiddakanyaka, reihi dakallung hinguyaka natou ta roangu ummana.'' V 26 ''Jiakadiyak , abbi mimange'atmaja,daeimangu napatoadi dam taweha, toujellana daeimang napakabuning daha peangu. ²⁷ Gannanya napa tikki-GU lahi nyiami tam kapettang, tikki hingukadiya tam wahang. Manga, gananya napa rangumi awainya kabuttik ta wuakahilumu, eigimi tapinu kabungu umma ammi patomanya. ²⁸ Abbi mange'atmaja amma hamati touha, nadeawada dadapiakumanya adda hamatiya, mimange'at nou-Nya nam hamatiya natu'a tou lapakang nadeawada anna le'ada ta neraka. ²⁹ Penya nam da manginnu adagakaja da tiddi hawella riti makidda adeida? Manga,daeimang heingu tekka dudda makana'u ta tana adaha wukkunanyaka na Amami. ³⁰ Lappak narou loagim taka tikumu natama bollu tayapu. ³¹ Jiakadiyaka, abbi mange'atmang, nyiami reihi mangu himi waling ta manginnu dam wurung.'' ³² Atonoukana, gearaya nam pawaiwa Nyouwa tahaga tourara, peala Nyouwa Kupawai jellaya tahaga Ama-Gu nam einya ta Surga. ³³ Jiadinguka, gearaya dam ihli-Ga tahaga tourara, peala Nyouwa dakku ihlijellamanya tahaga Ama-Gu ta Surga. ³⁴ ''A'ammi-Ga tapinu tana iddi madehhananya abbi wimmikang. Hi ammi-Ga daiddi madehhamagunya jiadinguka iddi matama-Gunya. ³⁵ Naha ammi denga-Ga, kakku pahikkaja dalakeada moani waling ta amada wig-Gu, jakka dalakead mawinni waling ta innada, da wiada waling ta yanuda mawinni, ³⁶ mang nam hatouna namuhungu oali roangu ummana. ³⁷ Gearaya nam reihi buhhanya na amana jakka na innana waling lahi Nyouwa, danna kennamangu ta ati-Gu. Mang, agearakayaka nam reihi buhhaja da anada moani jakka da anada mawinni waling lahi Nyouwa danna kennamang ta ati-Gu. ³⁸ Jakka agearakayaka dam jaungu wikkina mang hinna keri-Wa, danna kennamang ta ati-Gu. ³⁹ Gearaya nam kaleli hinguya na morrikuna enga dekidananya, mang gearaya dam hilukaleliya na morrikuna mula-Gu Nyouwa jiaya nam kollinya na morrik.'' Gearaya nam tarimami nyiami, tarimanagaka Nyouwa. Mang agearaya nam tarimawa Nyouwa, trimanyaka Dunna nam paleawa Nyouwa. ⁴¹ Gearaya nam tarimaha da nabi anapabuatadaja dangarada nakoling upana mahamearang ta nabi. Mang agearaya nam tarimaya natou nam idiya nam kallung hinna pabuatuya nangarana nakolingu upa tou kallung. ⁴² Mang agearaya nam woaja wei painung langa kahatou hingukana natou milla, kahangi kaahingukakina naweimaringu anapabuat wainya na ngarada da muritu, Kutikkigiminya nam padeningu dam hillu marobamayaha na upana.''