¹ Hi Paulus na ata papaleawana hi Yesus Kristus napa kabu atina hi Allah, jaka hi Timotius na oali beida iata. ² Ngala dukana huhu anana jaka na oali beida ana huhu anada lahi Yesus Kristus nama eingu ta Kolose. Tennang nakanyuru naga kana oali maraigimi, ta egi ati loyi koku nama waling lahi Allah Ama da iata. ³ Jiama pamalanguwu ou Allah Ama nama waling Yesus Kristus, jaka jiama engama ama kahuda ana habaya tutu tagumu ou. ⁴ Marangu yaka na witi manningumu lahi Kristus Yesus jaka na milla atimu amu namuya ngala nama maouha waling lahi Allah. ⁵ Jimi waingu panamumi kadang ami manni tekkanya agannanya napa kollimi peala ta surga. Mi rang nguyaka agannanya napa kalaurami nutu ta wini kallunguna, ya jiaya na Injil, ⁶ napa langa rangumu na wini kallung jiaya nama tubu jaka nama wua ta hagubul pinnu tana. Jia jellaya nama jaji ta ihimu waling ami ranguya jaka ami wainya a eingu kanyuru waling lahi Allah ata pahalakuya nama patu'a. ⁷ Ya jiaya na wini kallung napa langa peami waling lahi Epafras, na oalima ana wihi limmagama ta milla atina, jiaya na ata papaleawa nama manudu lahi Kristus napa jaji papa akama ⁸ Hi Epafras jiaya hina peanya amu namuma waingu hangahu harrina. ⁹ Kadang napa namuna, waling kawunga ranguma da eimanya ama hangahu ama habayang tutu tagumi jimi. Enga taguna ama karada ama kareiya tennang jimi kana woagimi pangadang toungu napa kabu atina kami pea bollunya jaka himi penya nama patu'a. ¹⁰ Jiama habaya pangala gimi kami pahalakuya nama patu'a waingu pata jinyak ma habaya pangalagimi ka eingu wuami ami woluya nama kallung jaka kana matua waingu napa pangadamu lahi Allah. ¹¹ Ma habayagimi tennang jimi kana pakullihumi agannanya napa hagami waingu biaha madina tadalu ami hamattarunya jaka ami nadinya. ¹² Ma habayagimi tennang jimi pamalanguya, waiwu Moiri kawinni nama tulu gatagimi himi kullihu himi kollinya napa tagumi ngala tou nama keriya jaka nama wainya nama nouya tama wahang. ¹³ Jiaya nama woada manu mara jiata waling tama kapetang hina louhu idida hi eida ta padouna na Anana napa namuna. ¹⁴ Ta Anana, kollinya na manumara ana lihu nyongada ana pohi poddah huha da doku jala. ¹⁵ Jiaya na Anana, jiaya na hadana hi Allah dapa ittada. Jiaya nama kawunga waling ngala dapa pa jajina. ¹⁶ Kadang dunna jiayaka hi keri pa jajinanya ngala dukana, einya nama eingu ta awang jaka tapinnu tana, napa itta jaka dapa itta. Toungu na kerajaan anang mapareaha anang napa pahikana, ngala dukana napa pajajina jaka tutu tagunanya. ¹⁷ Ei moulunyaka adadi einguha agannanya, jaka ngala nama eingu lahi Dunna hapeana-Nya. ¹⁸ Dunna jiaya nama reihi waling ta ihina. Jiaya na huhu anana. Jiaya nama ei moulung jaka nama kawunga waling ta joanga tou mati, jiaya hi einya ta barra deaha waling ngala dukana. ¹⁹ Kadang hi Allah jaya nama patu'a nama padeneng napa kareida eeinya lahi dunna ²⁰ Jaka napa kabu a bolluda lahi dunna keriya na anana. Allah nama woluya napa buhang wiki bollu waingu wie ra na ta ai ha rika. Hi Allah napa kahanginya agannanya ta ihina, waingu agannanya nama eingu ta pinnu tana jaka ngala nama eingu ta surga. ²¹ Jaka jimi jella, nimi pirrang ami jaji tou dapa peana hi Allah, jaka jiami muhuna tapa pangadang jaka ngala napa wolumu nama jurrak. ²² Anading nou atouna hi langa hoddaruna gu waingu ihina ana liya na mati. Jiaya na papa li nou danya hipa higiluwu, hi damu manyarik, jaka himu tara bani ta hagana, ²³ Ana maddu pangaladingu na manningumu, damu bebat, jaka kullih, dana hilu habaring agannanya napa langa mannimu jiapaya na wini kallung napa langa rangumu. Ya jiaya na wini kallung napa langa patomadanya ngala na na tou napa pajajina ta wawana na awang. Ya jiaya na wini kalung, nyouwa, hi Paulus hiku jaji ata papaleawana. ²⁴ Nou atouna ku egi ati denganya a nou awa tama willa tutumi jimi. Jaka napa einaganya na ihigu agannanya dapa peagu lahi Kristus na tutu ihina. Jiayaka na huhu anana ²⁵ Waling ta huhu anana jiaya nyouwa hatou ata papaleawana, keriya na deitu tidung waling lahi Allah napa woanaga jaka jimi, ka pinnu ya na winina hi Allah. ²⁶ Ya jiaya nama padeneng einya napa kabuning napa bia - bia douna jaka tadalu ana muri - ana muri. Jidinguka ya atouna pa hungadanyaka lahi duda dama wainya Dunna. ²⁷ Lahi dudaka hi Allah hina peakaya na dedina nama binnu nama padeneng napa kabuning ya waling ta joanga da tou Yahudi. Kadang hi Kristus a einya lahi jimi, a einya napa mannimi nama reihi buatu nama aming. ²⁸ Jiayaka ya napa patomama. Jiama ma panamuja ngala na tou, jaka hima peakaja ngala da tou waingu peaguna jiaya hima oali marainya ngala na tou lahi Kristus. ²⁹ Ya jiaya nama hawiting hiku kerra tetekang jaka daku peangu joili toungu ana woaga kullih nama tama lahi nyouwa waingu biaha madina.