¹ Kadang ma penya a' taliwwu mati kadaka na padinyak nadaka padou da ta sorga na padoungi morrik maloddung dama eingu dirrana dapa wolu limma tou rara. ² Tadalu ata morrikuha ta kangirrik, kadang winna na atida ganna panya ngara na kama dounya na padoungu nama reihi jaga ta sorga, walingu ta padoungu napa dou da ta laddu hinna. ³ Kadang a' tou kanaka pakenna danyaka na kopi - kelabi dana toma mada tadalu kalolu da. ⁴ Kadang tadalu ata morrik ya ta pinnu tana, ta kangirrik denga na buatuna na padeitu da, kaku pakenna tikka kinguka na kopi - kalabi bua a' widda jiadingu data buhha mangu pa mattanya nama deingu toma dama eingu dirrana na ho'a ya dama eingu dirrana na morrik maloddung. ⁵ Jiadinguka hi Allah nei yaka nama pagennakuda nama toungu ana hapurunya na hangahu harrina lahi jiata tada hamaddu waingu tora gannananya napa langa paninyak nada. ⁶ Nou jiakadika hina maddung na atima, langka ma penya taliwu morrikuda ta pinni tana, dadi ta eihi manya hi Moiri. ⁷ Kadang na morrikuma ya ma morrik wainya na ati waima da witi gannanya na pa itta ma. ⁸ Jiadingu na maddung na atima. Lappaku na pakalaura hingu ma, gannapanya ngarana kama gehhir waling na morrik ta pinnu tana ya kama kahangi dengugana, kama kadabi lahi Moiri. ⁹ Jiakadiyaka hima kajudanya tadalu ama morrikuha ta pinnu tana lappaka ama doungu ta habalina, kama piaku padeneng ta hagana. ¹⁰ Kadang dukka da hagadanya na pingi pangoduna hi Kristus ana hakkida toma kana kaya na tutu taguna hatou - hatou, keri ya agannananya napa langa woluna tadalu morrikuna nama kallung jiaka nama doku. ¹¹ Ma penya gannanya na ihina mi habuatunya hi Moiri a winna da, jiakadiyaka hima kajuda na tou kadi piaku wainya lappaka kada manninya. Ta hagana hi Allah, na ittu ya na ati wahanguma annakaya tou jellana napa dihha. ¹² Ya atouna kama hailang wikkina da wimma mangu hadekkana ta hagami, jiadingu kama wogimi kaloga mi ami pabakkulunya na atima, kami piaku piak ami haganya da tou nama bakkul ati denganya na pa itta waida mata, da jiamaya nama eingu ta dawa ati. ¹³ Kadang a' dama pattu wikki kamaka witi kami nakana deitu - tiddunguma na tutu taguna hi Allah jiaka ama pattu wikki kamaka, a tou ma witi tutu tagu kadiminya. ¹⁴ Kadang na pa ayi panamunguna hi Kristus nama korru magama, kadang ma penya ama matikaka, nama hatou na tutu taguna madangu ngerangu mati bollu danyaka. ¹⁵ Nadinguka na matika hi Kristus witi ana lumi ha dukka na na tou rara analuminya nama dangu toma tou kamaka nama morrik da duma mehamadanyaka na morrikuda. Jiadinguka tutu nanyaka nama langa matina jiaka nama langa morrik bali tutu tagu da. ¹⁶ Nou atouna dama hilu katutu ma yaha hatou tekka keriya na pakatutu tou rara jiaka ama kali katutu kanyaka hi Kristus waingu katutu na pakatutu waina na tou rara, nou atouna na da hilu tou nou amanguka. ¹⁷ Touna, geara kayaka nama kahangi denganya hi Kristus pata morrik mabuang yaka nama einya, nama madei loppahnanyaka amminyaka nama buang. ¹⁸ Gangatangana ma waling lahi Allah ya, ana paledinya lahi Kristus ana pakallu ati denga daka lappa ana waiga ma ama pahalakunya na winina. ¹⁹ Kadang hi Allah ana pakallu ati denganya na pinnu tana ana paledinya hi Kirstus dana hilu yappu amanguka na pahala da na waingu gamaka kama bo'arunya na wini panamunguna. ²⁰ Nou atouna nyiama ya ana papalewa nagamaka hi Kristus, hi Allah magga panunga peka nagimi ana li paledima. Ta ngarana hi Kristus ma kareimi kami pakallu ati denganya hi Allah. ²¹ Dunna dama doku dama jala ana tagu deitunya na doku - jala witi kadidanya, ka tadalu ngarana na pamannumara hi Allah.