¹ Witi pa ayi panamunguna hi Allah hima ka ya na ngiddi deitu ngiddi tidung ya yi. Nou atouna dama maerrah ati dengamanya. ² Jidinguka tullaruya dukkana napawoluda tama kabuning napa maki dengang dama wolu mangu nama dibbang, dama deki dehamaya na wini na hi Allah. Kali kaina ma pahunganya nama pa tutungu, jiaka tou na ma haraka wikki ma annakaya ta haga ma dangu jiaka tahaga hi Allah ada dihhatagukanya. ³ A matoni jella kanguka na wini kallung na pa boaruna dana mawehhamangu ta ati da nama hagangu ta ma damu. ⁴ Jiaya da tou dama wainya, witi kadi naka einya na marapu nama pahadippaluya na kina pangaddangu da, toma dada itta magu na wahanguna na wini tutu napa dedu ngara waina hi Kristus, jia na hadana hi Allah. ⁵ Kadang da ma peka wikki mangu, jiadinguka jiaya hi Yesus Kristus hi Moiri jiaka tou kanaka nyiama na pali atami keriya na pakabu atina hi Yesus. ⁶ Kadang hi Allah nama patomanya na wini na winna, " Walingu ta ma kapetang, na pahunganya nama wahang." Jia jella ya nama paerrikunya nama wahang ta adi da kana wahang na ati pangaddanguda na lara dedu na na ngara na hi Allah napa itta da ta hada na hi Kristus. ⁷ Jiadinguka na ngawu ma ya ma eingu ta arrung tana ya kana hunga na maddungumadama keri ukku ya ma waling lahi Allah, dama waling ta kulih taguma. ⁸ Biayanya nama jajja ma dama limanya nama kapiatu, ma liya na hadukka pangaddang, jiadinguka dama bata ati dengamanya ⁹ Ma liya na mawilla jiadinguka dana pahellamama limana ma liya nama kapalihama dama damumangu. ¹⁰ Ma iddi marainya na lara matina hi Marabba Yesus ta atima, toma na pata morrikuna hi Yesus ma pahunga jellanya ama patekkanya tadalu morrikuma. ¹¹ Kadang nyiama ya a' einyaha na kaloga morrikuma a' pahaga juama ta mati witi ngarana hi Yesus, kana hunga wainya na pata morrikuna hi Yesus tadalu morrikuma nama eingu dirrana. ¹² Tou nou kadinaka jiapaya na mati nama einya ta pangaddanguna, lappakungu nama morrik jiaya nama einya ta atimi. ¹³ Touna witi mera einya na ati manninguma keriya nama langa einya napatulihu : " Kuwainya, jiakadiya hiku panewinya " jiaya ma waiya wimma, jiaya hima lollukunya. ¹⁴ Ma peanya kadang dunna nama langa pakiddinya hi Moiri Yesus ma haregga pakiddi bali jella gama hi Yesus. lappala na kamaika bollu da nyiama jiaka dimmi ta hagana. ¹⁵ Kadang hina jaji ma toungu, witi kadimika, na kanyuruna kanagga dama keri ukkuya witi ki-ki dangu ya na tou nama keri wainya, jiaya hi da ukku maya ada pamalangu nya na deduna ngarana hi Allah. ¹⁶ Jiakadiyaka dama merrah ati dengamanya jiadingukana ihima langka na ki-ki maloja, nadingi napa bua bali gamanya na atima hangi wehang - hangi wehang ¹⁷ Kadang na mawilla nama halela ya, jiaya nama padedu ngara waingu dama eingu dirrana nama pareihi walingu aganna gannanya na pareihingu waling na mawilla napa lima. ¹⁸ Da jiamaya napa itta ma napa patetinguma jiadinguka gannananya dadi pa itta da jiaya dama eingu dirrana.