¹ Dodona Daud patulisana bana kedu wali Absalom, anana. MORI, luwadi gobbagu. Luwana ata a kedde bagobbaga. ² Luwana a panewe tubana tougu, "ALLAH danna paselamatakiaga!" Sela ³ Takka WO'U, MORI, perisaiwu a linddungiaga. WO'U kemuliaangu, monno a keketaga katouwagu. ⁴ Kukadengawi MORI waige li'igu, monno NA waleaga wali ne lete-NA a mbi'ya. Sela ⁵ Ku beikaga monno kuduraga, ku keddeaga orona MORI papaandegu. ⁶ Dakku mandautaki ngau rata ata, a woletaga. ⁷ Keddewu, MORI! Patolekawaga, o MORI! Orona, WO'U mupaladadi ngara ruwi po'oda ngara gobbagu, monno WO'U mupubbukabawi ngundu ata fasik. ⁸ Toleka douna MORI! Berkat-MU wa'ige barana umat-MU. Sela