¹ Ne pata wale a'mawu napa madakage ne buttu ate, takka pata patekki amarettika napa tukkena bani. ² Ne lomma ata manibba napa lousona pa'pande denga, takka ne ngada'na ata kabokko napa lousoge ne kabokko'na. ³ Hidda mata'na Mola Marawi wa'idi nee ngara dukkana padou, Na mattaradi ata dirraka monno ata duwa. ⁴ Ne lomma a'mawu nyadowe pola toleka, takka ne pata mapodeta padakke wekki dengawe. ⁵ Na ata kabokko na'tedekawe ne pa'panungnga nawi ama'na, takka ba garra kugu a'karawawe ne banonggurawu nyadona amaneilo. ⁶ Nee umma'da ata benara wa'idi ngara pote aluwana, takka ne pasusa denga a'wennawi pakolleda ata fasika. ⁷ Ne rowi ata maneilo napa uwarana papande denga, takka dahinna wa'i kiwe ne atena ata kabokko. ⁸ Na pamarakana ata fasika nyabana a'allu bottu barrana Mola Marawi, takka ne sambaya'na ata jujura namawennawe barra'Na. ⁹ Na lara'da ata fasika nyabana a'allu bottu barrana Mola Marawi, takka Na manowara'di ata awolawe ne a'benara. ¹⁰ Panungnga a'mboto nyawe atuba barra'da hidda ata a'dundakawi na lara a'duwa, ba garra kugu a'kamukage ne madonggura enga mate'na. ¹¹ Ne wanno da ata mate monno ne pamodda denga na oudawe ne arona Mola Marawi, na louka capowe ne atena ata pi'a! ¹² Na ata kanissika danna beikige ba tekkinawe, danna beikige bana kako padukkiwi na ata maneilo. ¹³ Ne ate a'senango napa mangewalawe mata, takka ne pamilla ate denga, padakke wekki dengawe. ¹⁴ Ne ate'na ata amangu pangedda'na na ellewe ne papande denga, takka ne ngada'na ata kabokko na ngaa ge ne kabokko'na. ¹⁵ Da'i ponguki iya loddo'na a'nduwa barrana na ata milla dengo, takka ne ate amanunna senango engage ne tunnu. ¹⁶ Na duwapowe mba yodikawi, napa ollewaige mba madautawi na Mola Marawi, daripada mba luwana pote lapata enga ge mbana kadukkukawe ate. ¹⁷ Na duwa powe bata ngaa waina rowe nee padou amangu manowarana, daripada na madoppa takka engage pakamukana. ¹⁸ Na ata a'ngetana bani na ellewe ne parikka denga'na, takka na ata 'da ngettana bani napa kamaddakawe ne pasele denga. ¹⁹ Lara'na ata mawwo napagaina gollu patara. Takka na lara'da ata jujura awutala. ²⁰ Na lakawa amanibba napa senangowa na ama'na, takka na ata kabokko natedekawa inna'na. ²¹ Ne kabokko nyabawe pabeina na ata damangu koba katowana, takka na ata amangu pangeddana na kako luruta. ²² Ngara pakambu ate enga li' lokoda madaiko panungnga, takka mba mangedako ata a'panungngana, enga berhasil ngara kuwa nawe. ²³ Na iya ata enga senango'na oronawe ne pata walena, monno na duwa capowe ne patekki a' tepat waktu! ²⁴ Na lara pa'lina ata maneilo na aro mbodo, nyaka kana eruna wali barra'da lara ata mate nee kabuna. ²⁵ Nee umma'da ata panewe mbodo na pukkage Mola Marawi, takka napa lindaka baliwe dukka wattena mawinne walu. ²⁶ Papangedda ata bokala nyadowe a' allu bottu barrana Mola Marawi, takka ne pata patekki a'mawu nyawe a' murni. ²⁷ Na ata akawippoka denga'na pautu denga da' benara napakawurawe umma katonga'na, takka bagarra kugu a'kamukage ne sogoka enga tolekana. ²⁸ Ate'na ata benara napa ngedda paduwage pata wale'na, takka ngada'na ata fasika napalousana adirraka. ²⁹ Na Mola Marawi na'marrodi ata fasika, takka Na rengngeda'di sambayang 'da ata benara. ³⁰ Hidda mata a'mangewala napa duwage ate, monno lii padukki aduwa napa mawenggalawi ruwwi. ³¹ Na ata apatoowe ne ba tegura enga dukki nawe ne patoleka denga, engnga engawe nee tidi donga'da ata a'manibba. ³² Hidda da'angnga denga ge ne ba'panungngadi a'tedekawe tou dou'da, takka hidda a'rengnge we ne ba tegurawi enga kolle dawe ne pa'pande denga. ³³ Madautawi Mola Marawi nyawe pa'panungnga a'maneilo, monno ne karadaka ate napa ulluwe ne mba pa'akagu.