¹ Porö yabocumä TU̧RU̧HUA̧ Diosmä Israel ttö̧ja̧ ti̧rȩjä̧nä̧ ttö̧jo̧cua̧'a̧nä̧ ja̧'a̧tä̧ topinö, pa̧'a̧nö̧ pä'ö jȩpi̧nö̧ Canaán rȩjȩttö̧ curä ttörohuähui̧nö̧ jerupätörö ka̧cuä̧mö̧ to'a pä'ö. ² (pi̧yȩmä̧ curä jeröpätörö u̧huo̧juȩta̧ pä'ö jȩpi̧nö̧ tä̧do̧tö̧ mi̧nä̧ Israel ttö̧ja̧ törohuähuinö ji̧nö̧.) ³ Pitö ji̧na̧'a̧: Ji̧mö̧tȩnö̧ ruhuotö Filisteosttö'i̧nä̧, o'cato'iönä Cananeos ttö̧ja̧'i̧nä̧, Sidonios ttö̧ja̧'i̧nä̧, ja̧'hua̧ta̧'a̧nö̧ Heveos ttö̧ja̧ Líbano de'iyönä ka̧cuä̧tö̧'i̧nä̧, möä'ca Baal Hermónttö̧ kä̧mä̧dö̧ Lebo Hamat jubö. ⁴ Pitömä juȩnȩtä̧ ka̧cui̧pi̧nä̧tö̧, TTU̧RU̧HUA̧ Dios jahuätönätä kä̧nö̧ ka̧cuä̧mö̧ to'a pä'ö, iso pä'iönä ttöcuotajá pä'ö hueähuä huȩnȩ tä̧do̧tö̧ mi̧nä̧rö̧ chutä Moisenä kä̧nö̧ hueinö ji̧nö̧. ⁵ Ja̧'hua̧nö̧ ja̧'a̧ttö̧ Israel ttö̧ja̧mä̧ Cananeoscu'inä, Hititascu'inä, Ferezeoscu'inä, Heveoscu'inä ja̧hua̧ta̧'a̧nö̧ Jebuseoscu'inä ttö̧'cä̧tȩnä̧ ka̧cui̧nä̧tö̧. ⁶ Jitö tti̧ti̧mö̧ nä̧tö̧rö̧mä̧, Israel ttö̧ja̧mä̧ tti̧rȩcua̧mö̧ päi'önä ȩmi̧nä̧tö̧, ja̧'hua̧ta̧'a̧nö̧ tti̧tti̧mö̧ nä̧tö̧rö̧mä̧ jitö tti̧tti̧mö̧ u̧mä̧tö̧rö̧ tti̧rȩcua̧mö̧ päi'önä iyinätö̧, ja̧hua̧nö̧ jȩpö̧ jahuätömä yapare ttö̧ä̧nä̧hua̧tö̧rö̧ ucuo te'äu jȩpi̧nä̧tö̧. ⁷ Israel ttö̧ja̧mä̧ TU̧RU̧HUA̧ Dios to̧ä̧ro̧mȩttö̧ surojötä jȩpö̧ ka̧cui̧nä̧tö̧ ja̧'hua̧ta̧nö̧ TTÖ̧Ä̧NÄ̧HUÄ̧ Diosrö unichi'inätö̧. Jahuätömä ucuo te'äö jȩpi̧nä̧tö̧ Baal pä̧ttä̧u̧ru̧'i̧nä̧ ja̧'hua̧ta̧nö̧ Aseras pättäu̧ru̧'i̧nä̧. ⁸ Ja̧'hua̧nö̧ ja̧'a̧ttö̧, TU̧RU̧HUA̧ Dios amisurächi'inäcu Israel ttö̧ja̧rö̧, ja̧hua̧nö̧ jä̧cu̧ Aram Naharaim rȩjȩ ru̧hua̧ Cusán Risataimrö̧ iyö icuinäu̧. Israel ttö̧ja̧mä̧ Cusán Risataim hueötä jȩpu̧ ka̧cui̧nä̧tö̧ ochonö a̧'ȩ jo̧mȩnä̧. ⁹ Israel ttö̧ja̧ TTU̧RU̧HUA̧ Diosrö huopönö jättepomenä, TTU̧RU̧HUA̧ Diosmä ya̧tȩrö̧ cä'epö huä̧ni̧nö̧ Israel ttö̧ja̧rö̧ ppädö'anö hua̧rö̧, ja̧u̧tä̧ jä̧cua̧'a̧ rä̧hua̧pi̧jö̧nä̧ ttö̧jo̧mȩttö̧ ppä̧dä̧rä̧cua̧mä̧: Otoniel, Quenaz i̧tti̧ (Caleb i̧jä̧hua̧ röji i̧sa̧). ¹⁰ TTU̧RU̧HUA̧ Dios A̧cua̧rö̧hua̧mä̧ ppä'ädö iyinäcu ucuo ru̧hua̧ ö̧jö̧nä̧ ja̧hua̧ta̧'a̧nö̧ ja̧u̧mä̧ Israel ttö̧ja̧rö̧ hue'ö kä̧nö̧mä̧ curä rohuäu'inä rä'opinö. TTU̧RU̧HUA̧ Dios iso juohuepönä iyinö Cusán Risataimrö, Aram rȩjȩ ru̧hua̧rö̧. Otoniel u̧mö̧nä̧ ji̧na̧'a̧ Cusán Risataimrö röhuäu iso juohuepina'amä. ¹¹ Ju̧huä̧jä̧ rȩjȩnä̧mä̧ cuarenta a̧'ȩ jo̧mȩnä̧ huȩnȩ juiyunä ka̧cui̧nä̧tö̧. Ja̧'hua̧nö̧ jö̧ mo̧ro̧ Quenas i̧tti̧ Otonielmä 'corujuo'ä chinö. ¹² Ja̧'hua̧nö̧ ji̧nö̧ o'ca'a TU̧RU̧HUA̧ Dios to̧ä̧ro̧mettö̧ pä'äji ta'anö Israel ttö̧ja̧mä̧ surojutä jȩpö̧ ka̧cui̧nä̧tö̧, ja̧hua̧nö̧ ja̧'a̧ttö̧ TU̧RU̧HUA̧ Diosmä moab ötahuiyä ru̧hua̧ Eglonrö̧ ujuru iyinö Israel ttö̧ja̧rö̧ ujurucu huea pä'ö. ¹³ Eglónmä ppä'ädäcuähuinö amonitas ttö̧ja̧cu̧ ja̧'hua̧ta̧'a̧nö̧ Amalecitas ttö̧ja̧cu̧'inä, ja̧'hua̧nö̧ jȩpö̧ 'chä̧nö̧ Israel ttö̧ja̧rö̧ rohuäu juruhuinätö̧, ja̧hua̧nö̧ 'Cho'ipö juhuätötä ruhuo hueö ka̧cui̧nä̧tö̧ Palmeras (Jerico) ötahuiyänä̧mä̧. ¹⁴ Ja̧'hua̧nö̧ ja̧'a̧ttö̧ Israel ttö̧ja̧mä̧ Moab ru̧hua̧ Eglón hueötä jȩpö̧ ka̧cui̧nä̧tö̧ 18 a̧'ȩ jo̧mȩnä̧. ¹⁵ Israel ttö̧ja̧ TTU̧RU̧HUA̧ Diosrö pä̧i̧cu̧nä̧ huopö jättepomenä̧ TTU̧RU̧HUA̧ Diosmä̧ ya̧tȩrö̧ cä'epinö ttu̧ru̧hua̧ päi'önä̧ ppä̧dä̧rä̧cua̧rö̧, ja̧u̧mä̧ Aod ji̧na̧'a̧ Gera i̧tti̧ Benjamita ttö̧ja̧ i̧sa̧, ja̧u̧mä̧ pohuepinö. Israel ttö̧ja̧ huettinä̧cu̧, Moab ru̧hua̧ Eglónrö̧ micuäu juäi iya pä'ö. ¹⁶ Aodmä̧ aditinö curä'chu pätecu soä'chu öotomä̧ 46 centímetros jo̧mȩnä̧ otoä'chu; äcä u̧huo̧jua̧'a̧cu̧nä̧ ö̧'ca̧tä̧huä̧ta̧ dȩa̧'a̧ yacocu ku̧ni̧nö̧. ¹⁷ Aodmä ru̧hua̧rö̧ mitähuä micuäu juäi iyinö Moab rȩjȩ ru̧hua̧ Eglónrö̧. (Ja̧u̧ ttö̧ja̧'i̧sa̧mä̧ juiyo bärepinö.) ¹⁸ Aodmä micuäu juäi iyäji'ca̧, churutä cue'ädäjätucutä rä'opächinö. ¹⁹ Aod ötö'cömä̧, ja̧'hua̧nö̧ ja̧'a̧ Gilgal tö'cö yapare ttö̧ä̧nä̧hua̧ o'ca aditö ku̧nä̧huo̧mȩ rȩbȩhui̧pö̧, o'ca'acu kärächi'ö topö ppa̧'a̧chi̧'ö̧ pä'inö̧: Ttömä̧ yä̧huä̧i̧nä̧ huȩnȩ ku̧nä̧rö̧sä̧ ucuru jidähua pä'ö, chu̧ru̧hua̧. Eglónmä̧ pä'inö: "¡'Coruchi'i!" Ja̧'hua̧nö̧ päa'a a̧ju̧cu̧ u̧mö̧huäyotömä̧ chutä ä̧'o̧ca̧ttö̧ o'catoi'önä̧ rä'opächinätö̧. ²⁰ Aodmä̧ ja̧u̧ ö̧jo̧mȩcu̧ 'chä̧hui̧'i̧nö̧. Ru̧hua̧mä̧ ä̧'o̧ca̧ ju'toju i̧so̧ca̧ ttinö̧ jo̧ca̧nä̧ pinö̧. Aod pä'inö: Ji̧yȩtȩ ku̧nä̧rö̧sä̧ ucuru Dios hueäji huȩnȩ. "ja̧u̧ ru̧hua̧mä̧ ideäcättö ä̧rä̧mi̧'i̧nö̧. ²¹ Aod pohuepa̧mä̧ äcä u̧huo̧jua̧'a̧nä̧ttö̧ curä'chu 'cho'ähuo'ö ru̧hua̧ u̧cuä̧ba̧nä̧ ta'inö̧. ²² Ja̧'hua̧nö̧ tahuome curä'chumä̧ do'ächi'ina̧'a̧, do'ächi'ömä̧ aboja'anä̧ päjure'chutä räo'ina̧'a̧, ja̧'hua̧nö̧ pä'i'ö ö̧a̧dȩttö̧ a̧ttächi̧'i̧na̧'a̧ curä'chumä̧, ja̧'hua̧nö̧ ja̧'a̧ttö̧ Aodmä̧ curä'chumä̧ 'cho'ö icuocö pinö u̧cuä̧ba̧ttö̧mä̧. ²³ Ja̧'hua̧nö̧ ja̧'a̧ Aodmä̧ äpate ä'ca i̧so̧ca̧'i̧nä̧ ju'tojunä̧ i̧so̧ca̧'i̧nä̧ äpate mö̧'ȩpö̧, 'quiyönä̧ ppe'tädö ku̧ni̧pinö̧. ²⁴ Aod räopächäji o'ca'a, ru̧hua̧ u̧mö̧huäyotö ichi'inä̧tö̧; jahuätömä̧ topinä̧tö̧ ju'toju i̧soca̧ äpate 'quiyönä̧ mö̧ȩcua̧'a̧, ja̧'hua̧nö̧ ji̧yä̧u̧ "Ju'toju i̧so̧ca̧ tti jo̧ca̧ttö̧ öacuäjähuä barocu pö̧ 'cua̧ra̧'a̧ pä'ö a̧mö̧cuädinä̧tö̧." ²⁵ Jahuätömä̧ rö̧ȩnä̧ tta̧'cua̧ ro'ecuipinä̧tö̧, jȩta̧ pä'ö jö̧'i̧nä̧ jȩtö̧ juiyönä̧ huotöjä tä̧ji̧ pä'ähuinätö̧, juhua'amä̧ ru̧hua̧ ju'toju i̧so̧ca̧ äpate ji̧nä̧ bahuepiyo̧co̧u̧. Ja̧'hua̧nö̧ ji̧yä̧u̧ llave ȩmo̧po̧'ö̧ äpate battepomenä̧, juenetä̧ rȩjȩ tebabanö pi̧nö̧ ttu̧ru̧hua̧ päjimä̧, 'corujuo'ächäjitä. ²⁶ U̧mö̧huäyotö pätö tta̧'a̧rö̧ kä̧nö̧ jȩtta̧ pä'ö jö̧ jä̧'ȩpä̧rä̧cuä̧u̧ ttö̧ja̧cua̧'a̧nä̧, Aodmä̧ tö'ipächö isotö tta̧'ö̧cuä̧ 'co̧'ö̧ adicuä o'ca ka̧cuo̧mȩttö̧mä̧ yabonä̧nö̧ 'cuä'o'iö, Seirat ötahuiyäcu tö'ipächinö̧. ²⁷ Rȩbȩhui̧pö̧mä̧, Efraín de'attö trompeta ppu'inö̧. Ja̧hua̧nö̧ ja̧'a̧ meje'ca po̧ri̧yä̧'tä̧ jo̧mȩttö̧ kä̧mä̧dö̧ Israel ttö̧ja̧mä̧ chutäcu mȩjä̧hui̧nä̧tö̧ ja̧u̧tä̧ oipa'anä̧ tti̧'cha̧ pä'ö. ²⁸ Ja̧u̧mä̧ pä'inö jahuätörö: "Cho'ca'anä̧ ichätucui, Täcö TU̧RU̧HUA̧ Diosmä cuaboiyotö Moabitarö örohuähuometä̧ ja̧'a̧." Jahuätömä ja̧u̧ o'ca'anä 'chä̧nö̧ Jordán aje jäyoto Moabitas ttö̧ja̧cua̧'a̧cu̧nä̧ kä̧mä̧dö̧ aje ttöjähua pä'ömä̧ ya̧tȩrö̧'i̧nä̧ hue'ocotö pinätö̧. ²⁹ Ja̧u̧nu̧ pä̧nä̧ Moab rȩjȩnä̧ ka̧cuä̧tö̧ u̧mä̧tö̧rö̧mä̧ diez milnö jo̧mȩ tö'cöhuächi'önä cuä'äu icuinä̧tö̧, jahuätömä o'catoi'önä̧ ttöjuruttö'inä, curä rohuäcuähuättö'inä jo̧mȩnö̧ huotö ji̧na̧'a̧; jahuätöttömä ya̧tȩ'i̧nä̧ tö'ipächocö pinö. ³⁰ Ja̧'hua̧nö̧ ja̧'a̧ttö̧ ja̧u̧nu̧ mo̧ro̧mä̧, Moab rȩjȩnä̧ ka̧cuä̧tö̧mä̧ Israel ttö̧ja̧ huetta'anätä̧ ka̧cui̧nä̧tö̧. Ja̧'hua̧nö̧ ja̧'á̧ttö̧ juä̧jä̧nä̧mä̧ 80nö̧ a̧'ȩ jo̧mȩnä̧ curä juiyönä ka̧cui̧nä̧tö̧. ³¹ Aod o'comenä micuäunä̧ pähuä i̧sa̧ pinömä̧ Anat i̧tti̧ Samgar ji̧na̧'a̧, ja̧u̧mä̧ päcäyärö ta̧huä̧huo̧'quȩnä̧ filisteos ttö̧ja̧rö̧ 600nö̧ huotörö cuä'äu icuinö. Ja̧'hua̧ta̧'a̧nö̧ ja̧u̧mä̧ Israel ttö̧ja̧rö̧ ra̧huä̧pi̧jo̧mȩttö̧'i̧nä̧ rä'epö icuinö̧.