¹ TTU̧RU̧HUA̧ Dios huȩ'ä̧hua̧ angelmä Gilgalttö rä'opö Boquimra̧'a̧ rȩbȩu̧ pä'inö: "Egiptottö rä'epö pi̧jä̧ rȩjȩra̧'a̧ chi'cächinäu̧juä̧ cu̧tä̧mö̧mi̧nä̧rö̧ chi̧yä̧cuä̧jä̧ pädinäjä̧ra̧'a̧". Jahuätörö pä'inösä̧: ucutucu chesecumä yorö'iso unichi'ocösä. ² Ucutumä pi̧jä̧ rȩjȩnä̧ ka̧cuä̧tu̧cu̧ cuesecuätucua pä'ömä jui'ätöjä. Ttöäre ku icu iyäcuome pparöcuicuätöcua pä'ötä ja̧'a̧. Ja̧'hua̧'a̧nö̧ ja̧'a̧nä̧ chi̧huȩnȩmä̧ a̧ju̧cuo̧co̧tö̧jä̧. ¿Tta̧'a̧nö̧ pä'ö pa̧'a̧nö̧ ja̧'a̧ttö̧? ³ Pä̧'a̧nö̧ ja̧'a̧ttö̧ pä'ösä: "Ttömä ucutu cuä'catucu jo̧mȩttö̧ Cananeos ttö̧ja̧rö̧mä̧ rä'epu icuocösä, jähuätötä jä̧cua̧'a̧ so̧ö̧ i̧sa̧ri̧ tti'esubänä ka̧'a̧ jä̧'i̧nö̧'a̧nö̧ ttö̧jä̧cuo̧tö̧, Ja̧'hua̧ta̧'a̧nö̧ tti̧ä̧nä̧huo̧tö̧mä̧ ucuturu u ku̧tȩ kä̧'i̧nö̧'a̧nö̧ ttö̧jä̧cuo̧tö̧. ⁴ TTU̧RU̧HUA̧ Dios huȩ'ä̧hua̧ Angel Israel ttö̧ja̧ o'catoinärö̧ pi̧yȩ huȩnȩ ucuocuäji o'ca'a, jahuätömä pä̧i̧cu̧nä̧ huopunö ajuähuinätö̧. ⁵ Ja̧'hua̧nö̧ 'cuä'opinomemä Boquim pä'ö oinätö̧. Juorötä TTU̧RU̧HUA̧ Diosrö ku icu iyähuä iyinätö̧. ⁶ Ja'huanö ja̧'a̧ Josué ahuaruhuärö röjí te'ähui'äji o'ca'a; Israel ttö̧ja̧mä̧ 'chi̧nä̧tö̧ tti̧rȩjä̧ päi'önä ttȩma̧ pä'ö, jitörötä iyähui'inomecu̧. ⁷ Israel ttö̧ja̧mä̧ TTU̧RU̧HUA̧ Dios hueö jȩpö̧ Ka̧cui̧nä̧tö̧, Josué ö̧ji̧nö̧ pänä'i̧nä̧ Ja̧'hua̧ta̧nö̧ böäcuächätö ja̧u̧cu̧tä̧ ka̧cui̧pi̧nä̧tö̧ ttö̧ji̧nö̧ pä̧nä̧'i̧nä̧. Jahuätötä ji̧na̧'a̧ TTU̧RU̧HUA̧ Dios israel ttö̧ja̧rö̧ öädihuä ujuru i̧jȩpa̧'a̧ topinätömä. ⁸ TTU̧RU̧HUA̧ Dios u̧mö̧huä̧ya̧, Nun i̧tti̧ Josuémä ciento diez a̧'ȩ u̧ju̧nä̧ra̧'a̧ 'corujuhuo'ächinö. ⁹ 'Turu tticuinäcu̧ chutä i̧rȩjä̧ ko̧ro̧jä̧cu̧ beipome Timnat Sera pä'ö micuome, Efrain rȩjȩ de'iyö päi'ome, Gaas mö'ä'ca ka̧hua̧ u̧huo̧jua̧'a̧cu̧. ¹⁰ O'ca toi'önä ja̧u̧nu̧ ka̧cui̧nä̧tö̧mä̧ ttä̧do̧tö̧ mi̧nä̧cu̧ ji̧nä̧ yo̧mȩtȩ pä'i'inätö̧. Jahuätö ttö̧ji̧nö̧ o'ca'a yo'äö ka̧cui̧nä̧tö̧mä̧ TTU̧RU̧HUA̧ Diosrö'inä ja̧'hua̧ta̧'a̧nö̧ Israel ttö̧ja̧rö̧ ppädinö'inä jerupinätö̧. ¹¹ Israel ttö̧ja̧mä̧ TTU̧RU̧HUA̧ Dios to̧ä̧ro̧mȩttö̧mä̧ surojutä jȩpö̧ ka̧cui̧nä̧tö̧, korotö ttö̧ä̧nä̧huo̧tö̧ baal pä̧ttä̧u̧ru̧tä̧ ucuotö jȩpi̧nä̧tö̧. ¹² Jähuätömä̧ ttä̧do̧tö̧mi̧nä̧ TTU̧RU̧HUA̧ Dios Egipto rȩjȩttö̧ ra'epinörö̧mä̧ u̧ni̧chi'inätö̧. Ja̧'hua̧ta̧nö̧ ttö̧jo̧mȩ jäyä ka̧cuä̧tö̧ ttö̧ä̧nä̧hua̧tö̧rö̧ usu 'chi̧nä̧tö̧, po̧cui̧pö̧ jahuätö tä'ca jo̧mȩ ja̧rȩyu̧nu̧ pä'i'ö ucuo te'ähuinätö̧. Ja̧'hua̧nö̧ jȩttä̧'chö̧mä̧ TTU̧RU̧HUA̧ ö̧ro̧huä̧rö̧nä̧ jȩpi̧nä̧tö̧. ¹³ Ja̧'hua̧nö̧ TTU̧RU̧HUA̧ Diosttö 'cä̧'i̧pä̧chö̧mä̧ baal pä'ö mi̧cua̧rö̧'i̧nä̧, Astarot pä'ö micuajuru'inä ucuo te'ähuinätö̧. ¹⁴ TTU̧RU̧HUA̧ Diosmä Israel ttö̧ja̧rö̧ rö̧ä̧nä̧ ra̧huä̧ri̧pi̧nö̧, ja̧hua̧nö̧ ra̧huä̧ri̧pö̧mä̧ hue'inö 'cho̧i̧pä̧rä̧cuä̧huä̧ ttö̧ja̧rö̧ ttöäre ttö̧nä̧cui̧ya̧tö̧ pä'ö. Ja̧u̧mä̧ ttaboiyotö ttipeyänä ka̧cuä̧tö̧ ttöjurunä ttömöhuäyotö jö̧nä̧ 'chö'ädö ttȩpö̧nä̧ iyö i̧cui̧nä̧u̧, ja̧'hua̧nö̧ ja̧'a̧ttö̧ ttaboiyotöcumä yorö'iso ttörohuäu juiyönätä̧ hui̧nä̧tö̧. ¹⁵ Israel ttö̧ja̧ rohuäu rä'opö tti̧'cho̧mȩpö̧nä̧mä̧, TTU̧RU̧HUA̧ Diosmä rohuäu isojuhuottepönämä ppä̧do̧co̧u̧ pi̧nä̧tö̧, ja̧'hua̧nu̧ jȩ'chä̧cua̧sä̧ päinöta'anötä̧ . Ja̧'hua̧nö̧ ja̧'a̧ttö̧ jahuätömä rö̧ȩnä̧ tta̧'cua̧ tta̧'ȩcui̧nä̧tö̧. ¹⁶ Ja̧'hua̧nö̧ ji̧yä̧cu̧ TTU̧RU̧HUA̧ Dios ttöröhuotörö hue'inö, ttaboiyotö 'chu̧ttä̧ro̧mȩttö̧ ttö̧ji̧pö̧nä̧ ppättädatö pä'ö . ¹⁷ Ja̧'hua̧nö̧ ja̧'a̧nä̧'i̧nä̧ jahuätö ttöröhuotö pättömä ä̧ju̧cuo̧co̧tö̧ pi̧nä̧tö̧. Ttä̧ju̧cuajueimä TTU̧RU̧HUA̧ Dios päinö järodi'ö kidepä micuänä iyähuäju jä̧'i̧nu̧'a̧nu̧ korotö ttö̧ä̧nä̧hua̧tö̧rö̧tä̧ iyäcuähuö ucuo te'ähuinätö̧. Ttä̧do̧tö̧mi̧nä̧ ttö̧ja̧cui̧nö̧ttö̧'i̧nä̧, TTU̧RU̧HUA̧ Dios hueö ucuotö ttö̧ji̧nö̧ttö̧'i̧nä̧ 'cä̧'i̧pä̧chö̧ jahuätö jȩtti̧nö̧'a̧nö̧mä̧ jȩpo̧cö̧ pi̧nä̧tö̧. ¹⁸ Ji̧yȩnö̧ TTU̧RU̧HUA̧ Dios Israel ttö̧ja̧ttö̧ micuähuächönä pä'ätörö cä'epö kö̧nu̧mä̧ jahuätörö ppä̧'ä̧dä̧ri̧nö̧, ttabo'iyotö huetta'anä ttö̧jo̧mȩttö̧ ttö̧ji̧pö̧nä̧ ppä̧'ä̧dä̧ri̧nö̧ jähuätö tta̧'cua̧ro̧mȩ jubömä. Jitörötä pä̧i̧cu̧nä̧ ttaditönä cuä'önö huȩttä̧u̧ jä̧ttȩpä̧rä̧cu̧, TTU̧RU̧HUA̧ Diosmä jahuätörö rȩrö̧jö̧nä̧ topinö. ¹⁹ Ja̧'hua̧nö̧ ja̧'a̧nä̧ micuäunä pä'ö 'corujuoächomenämä, jahuätömä jȩttä̧'i̧jö̧tä̧ jȩpi̧nä̧tö̧, ja̧'hua̧nö̧ jȩpö̧mä̧ ttä̧'o̧tö̧ jȩtti̧no̧mȩttö̧'i̧nä̧ abonänö rö̧ä̧nä̧ surojötä jȩpi̧nä̧tö̧. Jahuätömä korotö ttö̧ä̧nä̧huo̧tö̧ tto'ca'anä 'chi̧nä̧tö̧ huettö jȩpö̧ ucuotö tettähua pä'ö. Jahuätömä surojö jȩttö̧'i̧nä̧ ja̧hua̧ta̧'a̧nö̧ ttö'arodö'inä jarotti'a pä'ocotö pi̧nä̧tö̧. ²⁰ Ja̧'hua̧nö̧ ja̧'a̧ttö̧ TTU̧RU̧HUA̧ Diosmä Israel ttö̧ja̧rö̧ amisurächi'önä topömä, pä'inö: "Pitömä ttä̧do̧tö̧mi̧nä̧rö̧ jȩchä̧cua̧sä̧ pä'ö chötodecuinö ji̧nö̧ jȩtto̧ca̧'a̧ttö̧; ja̧hua̧ta̧'a̧nö̧ ttö pädinö ji̧nö̧'i̧nä̧ tta̧ju̧cuo̧ca̧'a̧ttö̧; ²¹ Porö yabocumä, Josué 'corujuhuo'ächö tti̧jȩrȩjä̧ pö̧nä̧ u̧ju̧ni̧'i̧nä̧u̧rö̧mä̧ rä'epöicuocösä. ²² Pa̧'a̧nö̧ jȩchä̧cua̧sä̧ Israel ttö̧ja̧rö̧ ka̧cuä̧mö̧ topömä, isopäi'önä ttöcu ti̧'chö̧'a̧nö̧ ja̧ pä'ö, ttä̧do̧ttö̧mi̧nä̧ ti̧'chi̧nö̧ta̧'a̧nö̧." ²³ Pa̧'a̧nö̧ ja̧'a̧ttö̧ TU̧RU̧HUA̧ Diosmä jahuätö ttö̧ja̧rö̧mä̧ o'ca pä'inämä rä'epö icuocö pinö tti̧rȩjä̧ttö̧mä̧, ja̧hua̧ta̧'a̧nö̧ Josuérö'inä rä'epö icua pä'ömä hue'ocö pinö.