¹ आपुहून देवा पोयरे ई नाव मिललो हाय देव पित्याय आपुन ओतो प्रीतीदान देदलो हाय आन वेरा आपु तेहडेज हाय तीयाल आपुन जग ओखुतो नहा काहाक तीयाय तीयल आख्यो नाहा. ² आमी आपु देवा पोयरे हय आन भविष्या आपु केहडे रीहु ई आपुन माहीतीनहा तेबी आपुन माहिती हाय का जहा ख्रिस्त फासे आवी ताहा आुप तीया होय रीहु आन तो जेहडो हाय तो आपु तियाल विहु. ³ आन जीयाबी आखय ई आशा ख्रिस्ताप थोवीही जेहकी ख्रिस्त शुध्द हाय तेहकी तो आपुन शुध्द केहे. ⁴ प्रत्येक जा जो पाप केहे तो नियमशास्त्रा उल्लंघन केहे काहाका पाप ई नियमशास्त्रा उल्लंघन हाय. ⁵ तुमाल माहिती हाय का तो पापाल पारवावा तो प्रकट वेयो तीया मोनाम पाप नाहा. ⁶ जो केडो तीयामाजमे रेहे तो पाप केतो नाहा जो केडो पाप केहे तीयाय तीयाल वेयो नाहा आन तीयाल आखुतो नाहा. ⁷ मा पोयराहा तुमामन केडो ठोगावा नाय जोजे तीयाल तो जेहकी नीतीमान हाय तेहकी ख्रिस्त नितीकी चालणारो न्यायसंपन्न हाय. ⁸ जो पाप केहे तो सैताना हाय काहाका सैताना सुरवाती पासुन पाप केतो आवी रीयाहो आन सैताना कामे नष्ट केरावाटो देवा पोयरो प्रकट वेयो. ⁹ जो केडो देवापासुन जन्मुलो हाय तो पाप केतो नाहा काहाका तीया बीज तीया माजमे रेहे तीयाम तो पापाम रेतो नाहा काहाका तो देवा पासुन जन्मुलो हाय. ¹⁰ इयाखातोर देवा पोयरे आन जी सैताना पोयरे उघड देखाय आवतेहे जेा केडो नीतीमात्वाकी वागतो नाहा तो देवा नाहा, आन जो आपु पावुप प्रीती केतो नाहा तोबी नाहा. ¹¹ आपु एकमेकाप प्रीती केरा जोजे ओ संदेश आपुय सुरवाती पासुन ऊनायाहा तो ओच हाय. ¹² काईन त्या दृष्टा आथो आज जीयाय तीया पावुल माई टाक्यो तीया होस आपु नाय रा जोजे, तीयाय तीयाल माई काहा टाक्यो काहाका काईन कृत्ये दृष्ट आथी आन तीया पावु कृत्ये न्यायी आथी. ¹³ मा लोकाहा जर जग तुमा द्वेष केहे ता तीया आश्चर्य माना नाहा.

¹⁴ आपुन मालुम हायका आपु मरणामेने जीवनाम गीये हे काहाका आपु एकमेकाप प्रीती केतेहे जो प्रीती केतो नाह तो मरणाम रेहे. ¹⁵ जो केडो आपु पावुहू द्वेष केहे तो खुनी हाय, आन तुमान माहिती हाय का खुनी माआहा मानाम सार्वकालीक जीवन रेतो नाहा. ¹⁶ ख्रिस्ताय आपु वाटो सोताहा जीव देदो, इया वजसे प्रीती काय हाय तो आपुन होमजाय तियाल आपुबी आपु पावु वाटो जीव दा जोजे, ¹⁷ जर केडा जागे जगिक संपत्ती हाय आन तीया पाुल गरज हाय ई वीन बी तीयाप दया केतो नाहा ता तीया माजमे देवा प्रीती रेती नाहा. ¹⁸ मा आवडता पोयराहा आपु आखुलाकी नाहा ता केरुलाकी नाहा ता खेरापनाकी प्रीती केरा जोजे. ¹⁹ इयापने आपु आखु का आपु खेरापना की हाय आन तीया हुबूर आपु अंतकरणाल धैर्य दीहु. ²⁰ जर आपु अंतकरण आपुल दोषी ठरवेहे ता आपु अंतकरणापेक्षा देव थोर हाय आन तीयाल आखो माहिती हाय.

²¹ मा हेंगात्याहा वाईट खोटो करुला बदल जर आपु अंतकरण आपुन दोष देतो नाहा तर देवाय जावुला वाटो आपुन धैर्य मीले. ²² अन आपु जेा कावी मागताहा तो जीया जागेने आपुन मिलेह काहाका आपु तीया आज्ञा पालतेहे आन तीयाल जो पोटेहे तो आपु केतेहे. ²³ तो आपुल ऐहकी आखेहे का तीया भोरुसो थोवा जोजे आन तीयाय आपुन आज्ञा देदीही इया प्रमाणे आपु एकमेकाप प्रीती केरा जोजे.

²⁴ जो देवा आज्ञा पालेहे तो तीया माजमे रेहे आन देव तीयाम रेहे आन तीयाय जो पवित्र आत्मा आपुन देदोहो तीयापने आपुन होमजाय आवे का तो आपु मोनाम रेहे.