1
Wa Paulus, Yesus Kristus bapuke, keloko keketila hahake pa notewe feko Tata Pifeke kewekakale.
2
Pifekekei Ke-loko wa bapuha-Ke mo rupu-tu,
3
Oke noparake, kei neba noparane kepetaha Daud pipafeke,
4
pa Letukeke lokoja-tu kei keloko Ke-lefute tebabi aha, kei Kei Tata Oke navewekotu, Yesus Kristus Tata nene.
5
Wa Kea pipate newe pa hahake fujete ko tebapapa neronananene, u-ketejiji pa telatakeke bati-Keke.
6
Era kerokole tebafai, eba keloko ekerelala Kristus.
7
Te-ebafa le-ele Roma, Tata e-kepule, e-keloko pa kololala teba-tu; pipate watakoko-e pa hupala heve wa Tata, Ai nene, pa wa Tuhan Yesus Kristus.
8
Lopana pinaheve niwele-ete Tata wa Yesus Kristus te ebafai, hupala nave e-ei wapa wukote fito hupa.
9
Kei Tata, hupala hevepa jano niloele Oke pifeke, kei jalotopanifu, pakei lopopoja nile-ele e-nioele:
10
Lopopoja nile, bamua Tata pule loniweko ni-rere-eale.
11
Pa nipule e-nifefele ko pinaheve noleka newelele ele ko nave penunu,
12
kei, u-nile-e ebafai pa hupalanave nelupane neve pewenunu, kai hupalanave e-e pa hupalanave nine.
13
Ebaletu, ni-pule, u-elolo, kei kau nipulefe nilolo eale - pakei wakoto uawe jafawekotu - u-ebafai houi ritou nififi, anara teba Yahudi hi-hou.
14
Ni-hapo nilemotu teba Yunani, para teba Yunani-ka, keite teba ritopute-e, para te teba ritoputeka.
15
Peanya ni-puto Pifekewe ni-nalulu-e para eba le-ele Roma.
16
Kei hupala nine nave ko Pifekeke, kei Pifekekei Tata naveke ko teba kelofefe kei teba keji, lopana teba Yahudi, pa teba Yunani rai.
17
Kei topepei Tata bamuake, wa hupalanave pa kekakakoti hupalanave,ana putukotu: "Teba bamua hupalanave pa tete-ete."