Pasal 28
Paulus Lei Malta
1
Nena huhufako neju bapa, neru, bai kei Malta petu.
2
Bapa te-e petui ne-jatete huhufa. Rapa bapale tete pa teniko nenafatene i kei fu-po we-e pa nolela tafa.
3
Pu Paulus rine kelo pa kapatifui ra, ra-etiko iu keto, Paulus noke kopewa.
4
Pu tebafai tekarete i-i weko Paulus noke, tewowo nie: "Kebawei bamua keba teba kejipate tebie, kei, jafui kekahuhufato, para Peba Te-uma pewati kewawale."
5
Pa Paulus i-i kehinapa leti-ra, pa ke-jauratuka.
6
Pa tenira, noro e-etuna rakuifa kewawale. Pa tejoko jopa, tekarete, no-keke jauratuka, kaipa tehie, kebawe keba-te.
7
Habaraka kebarube petui hatu keke, Kebarubei batikeke Publius. Ne-kelo huhufa pa baheto ne-jakelepa nenane.
8
Pui Publius reke noepa kei pa hupokeli-i. Paulus keti ja-keke; lupopo jakele pa nokekeve pa keleko kenohae.
9
Jalelepai kapa teba noe kau ja-petui to pa tera keleko te-nohae.
10
Nei tabeja bamua tete-e, pa pu nenate, jalelepa nene tetupi.
Paulus Tiju Roma
11
Ke-heto tohepa nenaia ne-e tu-u ka Aleksandria to pu ba-lelakui kefei petui. Tui Diskoro bilate kefako.
12
Nele Sirakusa pa baheto neteneia.
13
Keiapa nena bafa, ko neneju Regium. Ba-upa fe-lopeka pa fefepepeupa nenakoneju Putioli.
14
Kei tebapa lupopojate-e nefi, pa tewo wako kopa nelopa tenei ba napaheto. kaipa nene Roma.
15
Jopalala te-efu pife nene teri pa tejakoto netefi Forum Apius pa Tres Taberne. Pu Paulus te-kefe, Janawo kewaete Tata kaipa hupala keke nave.
16
Nenako neju Roma, Paulus teniko kewofalei pau tena tabateu kekehekamo.
Teba Yahudi Te-e Roma Kopate Pitewa
17
Ba-hetopa Paulus teba huhu Yahudi keraki ko telu, pa Paulus kelo: "Johane, tebapa nenewe jafeu nileka na leja jobepakama nene, pakei ni-teke Yerusalem pa ni-tekeni teba Roma.
18
Pu ni-telafu, hupala tetei ni tekefufute, kei niwe jafefeura nilekako aha ana nitejati ni-wuwule.
19
Pakei teba Yahudi piputela pa peanya ni-teketute kebatete-ho, pa kei tebapa ninei nilelekale.
20
Peanya niwa, u-e-nifefe pa pi-epanetete, kei ni-pule Israel ni-lofefeleko ni-atete."
21
Keteipa pi-tete nowea: "Ropu meme wa Yudea-to neroka, para jopalala nebafawera baura to jafefe mepemei hohokakeleka.
22
Pa ne-putu neruru meape, hupala meme none, kei ja-lomawe neru, lomemamepe kenera me- tehalaete."
23
Kaipa bau teruko Paulus,pu batenikoi tojupa teba fananau tete je-kelei. Pi ke-nalui pa Tata Paike kenalui te; pa Musa ma keke bamua pa teba puha roputepa ke-ena Oke-i ketejiji. Jakenalu wa fetahapa pa wakote rale.
24
Jakenalui-i tekau keteji tekau ketejika.
25
Kaipa teluei temepu pa janaura teweka. Pa Paulus pitiwe kelafai: "Pife keke kele Letu Keke wa bapuhakei Yesaya te jobepakama nenei konaia kokotu:
26
Meme tepawe, pa meponawewe: Elue pa elue, pa ealolulule, e-fue pa e-fue pa elulukale.
27
Kei hupala tetei po, pa loi jateriri-i rampapi, pa luto tete pomotu; u-luto tetepa tefufuka pa lo-tetepa teririka pa hupala tetepa tehietapepe, kaipa teputo te-Ni-leko nohae-e.
28
Peanya elulu, janaheve wa Tata toi tenarue teba papahi pa tei teririte."
29
[Pa Paulus piti kela noia, kaipa teba Yahudi temela hupala wowopa.]
Paulus Tata Pifeke Kenalui Roma
30
Paulus felaro hitu kelei pa kewo jafui; teba lelepa topae ke.
31
Jaura faweka pa Tata pifeke kenalu pepefai pa Tata Okei kenalui.