Pasal 1
Tata Letuke Keloko
1
He Teofilus, ropu nine lopanai jalelepa Yesus janoloi pa ja Kenalui-i japu nilemotu,
2
wakoto ba Ke-e. Pui pi Kewele Letukeke te-teakokeke keki-i.
3
Te tei no-Keke kenalu pu jano fefe kelokoka, pa janokoli nawapa no-Kenalu, kei kelefuto. Pa ba 40 no-lalafa Ke-nalui pa Tata Paike pikelei.
4
Bau pui Ko-patelupa jataepa, te e-ke-ku Yerusalem eweliteteka, pa ele-eiako Ai jakelokoi tojuju, kei - nowea Ke-loko - "kei elo Nia.
5
Kei Yohanes e-papa kele ehe, pa jokau Letukeke pa ehehele."
Yesus Eti Peta
6
Teba lumei tehowe: "Tata, Me-pule Israel paike pemumupena.?"
7
Ke-lote: "Mepupuka pu pa ba, kei Ai-wo lokotu ma-Keke.
8
Pa ma ewewele, anara Letukeke heto pu-era, pa pive Keke ewahaha Yerusalem pa Yudea tupa pa Samaria pa wakotete fito hupetu."
9
Piti-i Ke-lapa, tekare-epa Ke-moe, pa atu Ke-topepe.
10
Tekare-eke peta pu Ke-ei-i, teba hitu-u rotutupa tere te-ho,
11
pa tenite-te: "He eba Galilea, jatuko erupa kale-ekule peta.? Yesus-i, e-kelufatepa ke-eti petai, Ke-totolera efufu anara Ke-eti petai."
Teako Keke Tejoe
12
Kaipa teako-keke temepu petu tenie Petu Zaitun te Yerusalem, habaraka tejaipa te Yerusalem.
13
Tejakote novepa, te-eteme jatokoho, je tete-e. Tebafai Petrus tena Yohanes, Yakobus tena Andreas,Filipus tena Tomas, Bartolomeus tena Matius, Yakobus Alfius oke, pa Simon keba Zelot pa Yudas Yakobus oke. n
14
Telupa hupala alipa lupopoja bamua tete-e, teume kau pa Maria,Yesus make, pa Yesus johake.
Matias Tekeko Kehe Yudas Jeke
15
Pui Petrus kaloru johake lumei hou, teba nawopepei aha 120, pa kelote:
16
"He johane, Ropu Ole nukotu netete-papa, kei Tata Letuke loko Daud tete Yudas, keba rube pu Yesus tekei.
17
Lopafu keraketiko nebafawea pa nelupa napa janorone."
18
Yudas-i janofefe kelokakako janapepei haturiu jeta kele, kaipa kekoheti rube kekupa, pa hu-keke kitajeko hu-tofu kefatato.
19
Ja-kelei-i tebapa te-e Yerusalem-i terifata, ko hatui pilatetepai tenie "Hakal Dama", tipepei Hatu Hi -
20
"Pa kei putuko Mazmur ropui: Tunaiau fate kekei roropa koko, pa toi teba te-e-eka pa: Jano koli kekei tebahi hehe.
21
Peanya tebafa pu Tata Oke leipa tetopa nelupa lunewe bau nekeko kelala-ne,
22
kei pu Yohanes teba pakelepa tehe-e pa wakote ba Yesus ne-kelofatepa ke-eti peta, ko Ke-lefutoi nelupa pitenene."
23
Kaipa teba hitu noteru: Yusuf tenie Barabas pa Yustus-ra tenie, pa Matias.
24
Lupopo jatete-e pa tenie: "Tata fau, neba hupalawe Me-fupa, teba hituwe bau no Me-pupu,
25
ko janokoli-i kewewe, kei hahake janokoli Yudas lufati pa ketikoti jekewole."
26
Kaipa teba hitui lele-tete pa keba wei Matias pa noiau ketilala hahake teba nahipapaheto.