4
Kaĩ (Caim) kia Abeli (Abel)

1 Adaõ òtaòta Eva wana riwinyre tahãwyy wana kia tii rabytònyre. Eva uladu iribi reare kia rarybere: —Deuxu Tyhyhykỹ wikòhenadỹkỹna wana, waritxòre hãbu ijõdire. Kia tii tariòre rininire Kaĩ my. 2 Irahudi ixyby rariòrenyre, Abeli inire, Kaĩ seriòre. Abeli heka budoeni-dinodumy raremyhỹ, kia Kaĩ tahe oworudumy raremyhỹ. 3 Bede irehemy rỹimy raremyhỹ. Txu sohojiu Kaĩ su aõnaaõnaõ rimyre kia Deuxu Tyhyhykỹ-ò idi robenyre. 4 Abeli tahe, komy budoeni riòre ruare rimyre, kia rirubunyre kia Deuxu Tyhyhykỹ-ò awityhytyhy-di raubenyre. Deuxu Tyhyhykỹ rabedesare Abeli ki kia ixiwena-di, 5 Ka Kaĩ rihitxinyre kia ixiwena. Kaĩ reburere kia taòsỹna riteburedỹỹnyre. 6 Taita Deuxu Tyhyhykỹ rarybere: —Aõherekibo kai tebureteri? Aõherekibo aòsỹna teteburenymy tariateri? 7 Txibo kai biwinybe wana aõ òbitimy, kia butxuenymy atxiberi; kia kai tahe ibinamy texiywinyke, kia iurenana heka òraruna ijòtybònaki ratxireri araraò my. Tii aramykemyreri, kia kai tahe tuu mahãỹnanyke. 8 Tai Kaĩ rarybere Abeli-ò, iseriòre: rykake syraro-ò. Kia iny inatxi boho syraroki ratximyhỹrenyu, Kaĩ rihetenyre Abelii, taseriòre, kia rirubunyre. 9 Irahudi txioromy Deuxu Tyhyhykỹ rỹỹraxire Kaĩ-ò: —Titxibo Abeli, aseriòre rare? —Reeryõre. Rirawyònyre Kaĩ.-diarỹ aõbo waseriòre sodadu rare? 10 Taita Deuxu rarybere: —Aõherekibo kai tuu tewinyta? Su ribi, aseriòre hãlubu ryryreri, rexiòwynykremy rexitòenyreri. 11 Iurenana heka kai ibinamy matxuhokre kia tiu ixyby suu-ò alòbròõna. Kia aseriòre terubunyteu, suu tary riraynyre ihãlubu riõkremy. 12 Kai suu biywinykre tamy bobrokremy, tii tiu aõ tai ruhunyõtyhy. Kai mariamy mabekre bede bedemy ikiemy bexiwòmy. 13 Kaĩ rarybere Deuxu Tyhyhykỹ-ò: —Diarỹ tiu waòlududỹỹõna kaa rarytxyna utxiehekỹ. 14 Wiji kai tiwateònyteri ka su ribi. Kia arariamy ararekre bede bedemy ikiemy arexiwòmy kia ako ribi arexiwòmy. Kia aõtxile inyõ watxi reakre kia warubudỹỹmy reakre. 15 Ka Deuxu Tyhyhykỹ rirawyònyre: —Kia tuu butỹỹnyõkre. Kia txibo inyõ ararubunykreki kia rururenykre debò inatxi sõemy iny mahãdu sỹreny, òwyna wesemy. Kia ilemyta Deuxu Tyhyhykỹ deòsinaõ ritidire Kaĩ-ò kia inyõ itxi reakre wana irubudỹỹõkremy. 16 Taita Kaĩ ròhònyre Deuxu Tyhyhykỹ bire ribi kia rare Node bede-ò, kia Eden ibràra weribi-ò.

Kaĩ riòreriòre
17 Kaĩ kia tahãwyy wana rariòrenyre kia rininire Elaõ (Enoque). Irahudita Kaĩ hãwã riwinyre kia rime Elaõ, tariòrem-di. 18 Elaõ, Irade tyby rare, Irade, Meujael tyby rare, Meujael, Metusael tyby rare, Metusael, Lamei tyby rare. 19 Lamei ihãwyy inatxi ijõdire: ijõ Ada inire, kia ijõta Zila inire. 20 Ada iriòre sohoji ijõdire Jabal inire, kia ihỹỹnareny mahãdu, broreni riumydỹỹnyrenyre kia breò riòremy rỹimyhỹrenyre. 21 Jabal iseriòre sohoji ijõdire Jubal inire, kia ihỹỹnareny mahâdu kia ibutumy wiuna riwodỹỹnymyhỹrenyre harpa kia juròna. 22 Zila, iriòre sohoji ijõdire Tubalcaim inire, kia heka womati-di aõmysỹdỹỹdu rare, kia aõnaõna riwinymyhỹre womati òtaòta-di. Tubalcaim iseriòre terỹ ijõdire Naamy (Naamã) inire. 23 Tiu txuu Lamei rarybere tahãwyy boho-ò: —Ada kia Zila, wadee boholabenyke; Lamei hãwyy boho, bimywiwibenykre aõmybo ararybekre. Rerubunyre sohoji hãbu kiemy dori riwaykydesenyre, rerubunyre sohoji weryrybò kiemy dori riwawotõmonyre juròna. 24 Kia debò inatxi sõemy iny rurukre Kaĩ rubu òwymy, taita, txibo inyõ riwarubunykre wana, kia 77-my sõemy rurukre iny rubudỹỹdu sỹ mahãdu. 25 Adaõ tahãwyy wana ixyby rariòrenyrenyre. Tii rarybere: —Deuxu wadeke riwahinyre ixyby kuladuno Abeli deròwymy rarekremy, kia Kaĩ rirubunyre. Kia rininire Sete my. 26 Sete sohoji uladu tybymy runyre kia rininire Enos. Kia ka bedeu heka kia nii Deuxu Tyhyhykỹ, riòrarunyre kia rauhemy rarekremy Deuxu my derina rỹimyhỹre bedeu.