¹ Gi meh khaav le' swndraan dé' Phra' Yésu Khrit, Koon Phra' Cav. ² Meh taam Aiséya gôn lav phwan krloh Phra' Cav kooc uun, "Yèèng, Ô' phuam srông gôn srông khaav dé' Ô' yoh kaal bor, gôn yo' ge ci haang ngoor an bo dé'. ³ Siang dé' môôy gôn hèd hlian dah p'té' lm'maak sah, 'Haang ngoor dé' Ông Phra' Phu Pén Cav an hôôc; Tèèng ngoor yoh dé Ge an s'gar."' ⁴ Coon gaay, tèèng rid Baptisama yat dah p'té' lm'maak broom pa' soon Baptisama lwang kaan pic hrñwam hmang rap kaan jeh hrlo' 'maap. ⁵ Gôn twng lôôc dé' mwang Cudia pa' Cérusalem go' hlian yoh coro ge. No rap Baptisama caak ge dah ôm Codeen, phwa saraphaap hrlo' 'maap dé' no. ⁶ Coon séh tèd khum khuul ud pa' c'me' hriat guang ge meh hmpuur, ge be' hoh pa' ôm phreng meh swng mah. ⁷ Ge p'kad lav sah, "Ah môôy gôn ci gaay kwnhni ô' meh gôn ah rit am nad maak lwwn ô', ô' am thro' rod ci cu' kah c'me' keep dé' Ge. ⁸ Ô' an bo rap Baptisama yo' ôm, 'Nai Ge ci an bo rap Baptisama yo' Phra' Hmmaal Borisut. ⁹ Dah môôy mw gni' Phra' Yésu go' gaay caak Nazarét khvèèng Gèli'li, hôôc Ge go' rap Baptisama caak Coon dah ôm Codeen. ¹⁰ Ñaam Phra' Yésu phuam reh khwan dah ôm, Ge go' guuñ Savan hmpaang hôôc Phra' Hammaal hmwan siim pung twwr juur thwb pwr veey Ge. ¹¹ Ah siang hlian dah Savan, "Mé meh Koon yo' Ô' raak. Ô' bo hrñwam yo' Mé srme'."

¹² Hôôc Phra' Hmmaal go' tuul hrñwam an Ge yoh dah p'té' lm'maal. ¹³ Ge yat dah p'té' lm'maak gal puul mw Sataan go rod hyua. Ge yat broom tô bri', pa' ah Thévada gooy pèlèl yèèng Ge. ¹⁴ Nam bang grwb Coon hôôc lèèv, Phra' Yésu go pa'kad khaav le' dé' Phra' Cav dah khvèèng Gèli'li. Ge lav sah, "Véla go' rod lèèv, p'té' Savan dé' Phra' Cav go' léh lèèv. ¹⁵ An pic hrñwam hmang hôôc dwwm dah khaav le' ni'." ¹⁶ Nam Ge phuam ñaang roh bwp th'lé Géli'li, Ge guuñ Saimon pa' Andru hèèm dé' Saimon phuam séh moong dah tha'lé, no meh gôn sook ka'. ¹⁷ Phra' Yésu lav yo' no, "Gaay, yoh hrèc Ô', hôôc Ô' ci tèèng an bo meh gôn sook gôn hmwan sook ka'." ¹⁸ Ca' 'man gni' no go' plah moong hôôc yoh hrèc Ge. ¹⁹ Phra' Yésu ñaang yoh dèk, Ge go' guuñ Cém koon Sévi'di pa' Coon taay dé' ge, no oor yoh dén siliing moong dah c'loong. ²⁰ Ge hèd sna, hôôc sna go' plah yông dé yat dah c'loong broom pa' maav yo' no caang, hôôc sna go' yo' réc Ge. ²¹ Hôôc no oor yo' gud dah mwang Khapeniam, dah mw Sabét, Phra' Yésu go' gud dah rôông sala pa' thédsana 'mook tiin. ²² No oor yo' dé viir dah hrlo' 'mook tiin dé' Ge, nèèv Ge thédsana 'mook tiin no hmwan swng Gôn ah rit am nad am hmwan bwng tham ma'caan. ²³ Dah c'man gni' ah cmbro' yat dah kluang rôông sala dé' no meh gôn yo' hrôôy sua gud yaam hèd ôôr, ²⁴ lav sah, "Phra' Yésu gôn Nazarét, i' tèèng meh yo' Mé? Mé gaay khi ci tham laay i'? ô' neeng sah Mé meh me'. ²⁵ Mé meh gôn môôy Borisut dé' Phra' Cav!" Phra' Yésu leng hrôôy ni' lav sah, "Léd hlian du' caak ge cem!" ²⁶ Hrôôy sua gni' tèèng an ge swndrud kwlvayh hôôc hlian caak ge pa' yaam ôôr siang rèèng. ²⁷ Gôn twng lôôc go' oor yo' dé ngwd, hôôc no go' maañ yo' dé, "gi meh hmeh? Meh nèèv 'mook tiin hmmé' yo' ge ah am nad! Ge tang sang hrôôy sua raay, hôôc no go' hmyèng Ge!" ²⁸ Khaav dé' Phra' Ông go' yoh lih jm'moon dah khvèèng Gèli'li. ²⁹ Nam hlian caak rôông sala lèè, no gaay rod dah gaang Saimon pa' Èèndru', yat broom hni' ah Céém pa' Coon. ³⁰ Dah hni' ma' kwmbra' dé' Saimon phuam sih srma' ywyh, no go' 'mook Phra' Yésu lwang na. ³¹ Hôôc Ge gaay, cap ti' na hôôc tôôm na reh khwan; na go' le' srma', hôôc na go' taang rap sai no. ³² Ñaam matbri' khruk toon buar signi', no oor yo' aar gaay gôn cu' twng lôôc broom pa' gôn hrôôy gud gaay coro Ge. ³³ Gôn pa'lôôc mwang gaay dwn rôôm yo' dah pwrlông. ³⁴ Phra' Yésu go' srnwm gôn cu' maak gôn an le' ah pha' ñad maak nèèv an le' pa' va' hrôôy maak tô an hlian, 'nai Ge am an hrôôy raay ni' srô' hmeh ñoon no neeng Ge meh me'. ³⁵ Phra' Ông réh ngwan sruad, hnoong h'uñ; Ge du' yoh dah 'moon léd rat ngat hôôc Athithaan dah hni'. ³⁶ Saimon broom pa' gôn yo' no yat broom ge go' oor yo' dé sook Ge. ³⁷ Nam no bwb Ge no go' lav yo' Ge, "i' jm gôn phuam sook Mé." ³⁸ Ge lav sah, "An i' oor yo' yoh dah 'moon me' bang, hlian yoh dah mwang yat knvér khi, dwng ni' Ô' tang ci bwan thédsana dah hni' hmwan yo'. ³⁹ Gni' meh nèèv swng Ô' gaay khi." Ge hlian yoh lih khvèèng Gèli'li, thédsana dah rôông dala dé' no pa' va' hrôôy an du'. ⁴⁰ Ah gôn h'ép gaay coro Phra'. ge den kmnuun khro yo' Phra' Ông hôôc lav yo' Ge', "an meh hrñwam gu' dé' Mé, khro Mé srnwm an ô' le'. ⁴¹ "Phra' Yésu ah hrlo' trnèèm, Ge go' hyer ti' yoh cap ge, hôôc lav yo' ge, "Ô' bo hrñwam. Le' cem." ⁴² Ca''man gni', h'ép go' laac yoh, hôôc loh ge go' klèh. ⁴³ Phra' Yésu 'mook ri' yo' ge hôôc an ge gaay. ⁴⁴ Phra' Ông lav yo' ge, "mé ha' lav hmeh an me' dé', hôôc yoh, an pa'lôhit guuñ, thaam Msôés lav uun an mé thé vaay swng loh mé le', an ge meh krloh pha' ñaan an neeng." ⁴⁵ Hôôc ge go' hlian yo' paav lav lwang dé le' ni', lwang gi hnam srme' coon Phra' Yésu gud dah mwang gni' 'maap sm 'maay am bwan. Dwng ni' Ge yat dah ya'. Hôôc gôn yat jwm 'moon jwmhèèng go' hnoong gaay coro Ge.