¹ Eto nau tunga unmbari embomei, na ahari kihi ungota dei kajihana amite oroho kajihena eremite aingeto enana ahari heriso amina ungota hotembari ke sokova na ehi jene ambu ove te avo ujau ereto hotembari javotoho be avo hotembava. ² Eto Mama Otohu ta kiane kiari embo ototohu mamahu na ke do ijie ra avo ungona ahako hotembihe ungotenau orekari embo Bada Iesu na ungo doeto irisova amita ke Mama Otohu ta agigi ari embo na hande eora avo be kiova ahari ere ona. ³ Eto ke kihi be kesoa amo evira, iji tutumo puvurou amo urumbari embomei avo purusora.Eto embomei eremina enana ta ado bisi ta ujeje sasamuna avo ue iriora amina ungo ganini na urumbihe. ⁴ Eto enana na ke einge aisora, ''Bada Iesu egerembeto purisi oje ena amo davore? Iji amite Nangota epe mane sasari uera eto puto oroho emite donda peae be amo mahu ihikari ta uhu te enda te irerembihe uija hajire vahi amina pere mihia.'' ⁵ Eto enana sasau be jene ora amore Mama Otohu na mahu be mahu tohota ke amina uhu te enda te enu umo jota peu eto puto bivihaja amo umo ado avo siriketo umbuto tahavota eto enda avo enu ijekihaja. ⁶ Eto Mama Otohu ta ke na iji amite enda emo umo na usu pesu ena amo jai buenga na endahe peae erevi iketo ahuruke na. ⁷ Eto Mama Otohu na ke vahi emina uhu te enda te avo i na undukasuja amo ari sasamuna embomei ta kasari te usu pesu iji avo simba ue jigito mihia. ⁸ Eto ungo ke erevi ingito ingarako eto mo dainge joru pambavo nau tunga umbari embomei, eto iji vahi avo Mama Otohu ta dei amo jua pajire be ra ainge dombo jua pajire be amo iji vahi. ⁹ Eto Mama Otohu tohota oje ari aita amo mane seima be hae euja eto embo nei uhoho na seima seima hae ari ke ijie hotembasora. Rate Mama Otohu amo jo ojogo be na no dei puvuja. Amita be avo Mama Otohu ungo embo nei uhoho sari ari amo uje ae euja, rate embo peae amita rumu au enana ta jo avo ahereka ra uje euja. ¹⁰ Avorate, ungote nau tihi jigari embo Bada Iesu ta purari iji amo hajire inono pegene embo aingeto purusuja: Eto uhu peae ita mihera amo havi pajire ijie irae pambasora. Ainge dombo uhu ta iji, hariga eto kuro peae be mihera amo i na evekasuja eto enda emita jai te endahe te pisara te endahe emita vasiri sasamuna amite i na irae evekasuja. ¹¹ Iji amite donda peae be erevi dei enge ta setira asuja, eto umo embo deire amo umo kegoea te? Eto Mama Otohu ta wasiri jajavotoho amina ungo eto kito javotoho na irivujo. ¹² Ungo re Mama Otohu ta purari iji aravo keisi umbasi uve eto simba evujo. Eto iji amikote, uhu re ih peri na setira aisuja, eto uhu ando bisi amore ih bevere pajire be amina sisasuja. ¹³ Rate tohota noma ungotenau hena ari amina eria re ungotena re uhu te enda eha te aravo simba ora, wasiri daroho ere ora amina mahainge irisora. ¹⁴ Avoeto, nau tungambari namei kamei, ungo aravo iji erevi keisi umbasi ere ova, eto umo etokito javotoho be aisoa eto bouka ambu Mama Otohu hena ta peka ga purusoa. ¹⁵ Ainge dombo, Iesu ta jamojamo ari avo ungotenau ,orekari embo ainge avo kivujo, do ungotenau namei Pol na ungo hena kajena ainge ra, do Mama Otohu na siro ikenu ena aravora. ¹⁶ Pol na tohota ahari aita ke emore peae kajihaja, eto ke nei uhoho amo gaiha be siro hirikari sago ae ra. Eto ke mane ingiora eto mane tuneketo iriora embomei amina ke erevi sokovana eora, eto enana na buka nei uhoho amo ainge dombo avo eora, enana eongana setira eora. ¹⁷ Avoeto, namei kamei, ungo mahu nangona ke ari ingari ava,ungo eongana simba evujo embo ta ke sokova amina ungo tihi taisora eto umo aro no humota ari Iesu hena ta avo mane beasuja. ¹⁸ Rate ungotenau tihi jigari eto orekena embo Bada Iesu amita jojogari ari eto kiari aita irivujo. Eto jakeka ari umbari amo Mama Otohu peae oroho eto iji mahainge ta ra. Avora!