¹ Ni emo zazai eno matu ge oko se, ni ago eno eyare ge sinasani, maung nina nibaug nono yero samodedu nosi, deka ayero ago eno ye. Emo seka eno eyare ge sinasani, meta mani ,tato mani nina samodedu nosa deka ayero ago samode. ² Bauno zazai eno eyare ge sinasani, ai nina samodedu nosa deka ayero ago samode, bauno didi deka, nu numono nina sou yero samodedu nosa deka ayero ago eno ye. Tuwa ra beraung ra atu nao ingwaing ra gabu ra samodao buro awiya yari nesa. ³ Bauno noi, ibono mamaga nowa ago nata mitowa ayetuga giro sorepu neung. ⁴ Arata bauno noi zo nu imono samono ta nupe, ewowo nuna mitaya giro, ago zawagasa ago garo moko agera aungna atu gitau samodao buro awiya zayero yaese. Aiyamono, mamono agera gitau ago eno samodao buro yewa, aungna ambeyang awiya, ago bauno noi aeno samodao buro yaese, Tuwa Tutu ra beraung ra nao awiya ingwaing nibaung, Tuwa nao awiya arataungno baingtiti noiya. ⁵ Arata bauno noi zo, iu nuna magayai, nu nata nibaung mitasani giro, nu eyero yaise. Tumodiyao nuna apakana Tuwa Tutu hina pugairo, asoko nuna ta dora botiyo nuna, apakana awiya Tuwa zo gege nu sorepu nari niya ayero tumodiro, be apakana pingre, iyare, nu Tuwa atata nasani isa gege sinaise. ⁶ Ora noi zo nu iu magayai, nu taung ra aratamao apakana awiya ago nari niya awiya, nu zo seka mitiya, arata, nu awiya bauno magaya ara. ⁷ Bowi ewiya mani bauno eno se nigiro, ago Tuwa eno isa sinasani, inzao ge aungne, nupe megamaga aung mitae. ⁸ Arata mani zo nu saisibuna nuna ta nupe dubu nuna garo moko nuna aungna miteya awiya oko kora yero diya yari niya awiya, tumodiyao nuna beseti nu nao meko nibaung zo emo diga oko nowa awiya yetiya ayari niya. ⁹ Ni ago noi dubu aungna yazo deni nasani giro, bauno noi awe dangwang sixty daigairo hititi niya aungna yazo gayari nesa, nupe bauno noi awe iu dekaka gege atiro mitawe maga yenu nu mitiye aungna yazo gege gae. ¹⁰ Bauno noi awiya nu nao ingwang waing gege noi, yazo nuna ingwaing mitoiya, nao eyao eno sinena, nu mani awiso nuna kora yero diya noiya, nu gigi esewa kora yero samodedu noiya, nu tumodiyao emo bauno ra te sai noiya, nu emo bauno mou ra mitowa awiya sorepu noiya, nupe nu awiya nao ingwang waing apakana anasani mitoiya, bauno noi eyetugao aungna yazo gege dene. ¹¹ Arata yazo deni nesa aungna moko ra, bauno ena ago deka noi wata, ago taung seka miteya ago aungna yazo oko gayari nesa. No eno oko, ago ibono seka atao ra aratamao kasa noi, ago Kristo bauta poti nowa. ¹² Gabu aungna atu ago daba hingao ge ibono gitau atiwa aungne sewa awiya bezero ago moure nowa. ¹³ Ago kimasi nasani garo toyao zo baina nowa, agege oko, ago garo toiti nasani otao mani ena ra unge nigiro, ago otao mani eno bauta ge sinasani hungugu didinowa. Nupe ago ge ena memeko age saine yao teng oko awiya sinowa. ¹⁴ Susuwa aeno, aratamao nana nibaung awiya, bauno noi taung seka miteya awiya apakana ibono atiro, awisore yero, garo moko agera kora yero diya nasani mitaese, ayero nari neya amizo, oweno meko toiro bo name oko gera yari niya, no eno oko, nao memeko naname hina oko mitiya. ¹⁵ Naname ena mena Tuwa bauta potero, Sanda ago neya. ¹⁶ Tumodiyao bauno zo ra gare atu bauno noi zo mitai giro, nuka nune noi awiya kora yero diya yaise, ayero yari niya ami suwao otao mani eno mou oko pugari niya, nupe ayari niya amizo, suwao otao mani tebe miteya ami noi ena nata nibaung miteya, diya yao mani aung, awiya diti yero gosi nasani sorepu nari neya. ¹⁷ Simai nami buro ingwaing nowa awiya kora yero samodedu nasani, zuma agera pugaiti neungpu, simai dubu Tuwa ra bowi sinasani nowa aungne, nupe Tuwa ra nao ingwaing emo bauno gipiti nowa aeno sinena. ¹⁸ Tuwa ra ge papiya ra atu ge zo eyero gaewa mitiya, "be wo bulumakau raisi piti kewi nari niya, be awiya nige be nuna oko gazepu" arare "buro mani deka nu zuma nuna paise sao ara." ¹⁹ Nige simai eno hisipatao ge sero nu oko pu gera gaipu, zoma mani eto ta etama, ami ge awiya dong dotaya giro oungne nige ge sepu. ²⁰ Simai ena pasena yaya, ago pungno ge buro yari yero giro, simai apakana aungna beraung ra atu pugairo ge buro yepu, otao mani agera giro, angwang yero agore nao awiya oko yae. ²¹ Na Tuwa Tutu aungne, Yesu Kristo aungne, Angelo dubu nuna gerao, aungna beraung ra ni eno ge tauya nibaung sinena, ni buro ge apakana pugena awiya kora yero diya nasani, mani apakana aeno nao beraung dekaka neung, ni emo babuze aungne, dubu nika nina aungne, aeno gege nao ingwaing oko ye. ²² Ni oko mena emo ra ziye atu nago paka yero emo awiya Tuwa Tutu ra buro yaise sari nesa. Nete emo ena ra pasena hiti nina tame yowese ni nao awiya oko yari nesa. Ni nika ni kora yero diya nasani, Tuwa Tutu ra beraug ra pewa yero mitiung. ²³ Ni ou tebe mini nosa, nao awiya heme duwari nesa. Ni wain maingko dema mini nasa ami moko nina sorepu nasani nupe, yang yang nina tame mitoiya awiya tunari niya. ²⁴ Mani ena pasena nowa pasena agera awiya mena kasaye daung gaiti nowa, pasena ayao awiya mena gitau kasaye awega ziwega yao ra beraung ra noiya aine ara. Arata pasena ena ami zo, nowa pasena awiya hungao mitema ame kasaye daung gaiti nowa ara. ²⁵ Deka ayero, nao ingwang waing ena awiya mena kasaye daung gaiti nowa, arata nao ingwang waing ena awiya oko mena kasaye daung gaiti nowa, arata nao ingwang waing awiya oko ayero hungero mitari neya.