¹ Oweno zo ge ewiya kere daung gairo eyero siniya, agore emo tumodiyaore apakana tumodiyao agera besai, ago oweno meko gehiwao aeno dago hawinasani, nupe emo ena taung puro hititi nowa, ami gipao oweno meko ra awiya gipaya giro, gipao meko awiya ago yari neya. ² Emo dubu awiya kotumao agera sisigao ware, nao meko agera neya awiya oko gaya zawagari niya. ³ Emo dubu gipao gehiwao gipiti nowa awiya emo bauno hina ati yao gazi nasani, nupe, name emo bauno geme gosi nename zawa gaitini, name tumodiro nename, ami nona minao ena puro hinapiti nasani Tuwa Tutu eno dange sero mini nanemese pugaina awiya dema oko minaese gazi nowa. ⁴ Nona apakana Tuwa Tutu zo yena awiya ingwaing gege ara, atu meko zo oko mitiya, aung ara. Arare name Tuwa eno isa sero, nu eno dange sinasani minari nename aungna gazao zo oko mititya. ⁵ Tuwa Tutu ra ge aungne, isa naname aungne, ami noi Tuwa ra beraung ra nona awiya pewa noiya. ⁶ Ni otao mani ena ra beraung ra atu ge ewiya tugata yari nesa, ni awiya Yesu Kristo ra sou mani me ara. Ge ingwang waing name nigiro tumodiro noname aungne, nigao ingwang waing ena, ni nigiro ago nosa aungne, ami ni eno putoung baina nibaung pugari niya. ⁷ Tangi eungna ge unge memeko bauno zazai zo aratapu nowa awiya bauta potero ni ake pariye. Ni zoma Tuwa Tutu ra nao wowosewa awiya denero agoye. ⁸ Name taung piti ewiya soremaya tau yaise taung naname deni nome awiya ingwaing niya, arata name ititi naname dena name Tuwa ra nao ingwaing ra tau yaise deni noname, ami ingwaing nona apakana aungna niya. Daba hingao ge, mitao naname heme mitename eungne agore mitari nename aungne, awiya ititi ra nao ami hingiro mitoiya. ⁹ Ge ewiya ge me gege ara, name apakana ge ewiya nigiro tumodiyari nename ami ingwaing nibaung yari niya. ¹⁰ Name nonaka aeno gehera nasani buro tauya noname ara. Tumodiyao naname awiya Tuwa Tutu mitao gege mitoiya, aungna hina atu mitoiya ara, nu awiya emo bauno apakana aungna soremao emo ara, arata, emo bauno nami nu tumodiro nowa, nu awiya ago dubu aungna soremao emo nibaung ara. ¹¹ Bowi ewiya kere daung gairo tugata nasani, emo bauno apakana awiya gipe ago yae. ¹² Mani ena ni giro mani maingko kaka nibaug sari neya, arata ge agera oko nigi, ni mani maingko oko ara. Ni zoma, Tuwa ra tumodiyao emo, bauno eno ititi ingwaing ge nina, nao nina, hina aratamao nina, tumodiyao nina aungne Tuwa ra beraung ra atu etetero mitao, nao ingwang waing nina awiya gipe emo bauno giro nao nina awiya ago yae. ¹³ Na oko mena bao yana giro, ni emo bauno eno Tuwa ra bowi zaza gairo, ge susuwa zawa gaiti nasani, nupe otao mani hina aratapu nasani nao, awiya ago gipi neung. ¹⁴ Be mamono nina ziye atu nago paka newa, simai zozo ni eno propet ge zo sena, ge awiya Tuwa Tutu ra ho ingwaing ni eno pugaina, arare ni ho ingwaing awiya oko hunge. ¹⁵ Ni nona awiya kora yero diyaye. Ni nona aungna mokora atu mitasani buro nasa, buro nina aungna me ingwaing kasa yai, emo bauno ni saore gari neya. ¹⁶ Ni buro nesa aungne gipao emo bauno gipi nesa aungne, awiya diti ake nasani oungne neung. Buro awiya susungno yao gege neung. Ayero nari nesa ami, ni sorepu nasani, nupe emo bauno ge nina nigiro ago neya awiya dema sore mari niya.