¹ Na Pita, Yesu Kristo ra aposol, ami nige Tuwa Tutu ra gerao dubu soma sero daedae yero miteya aeno imagi ewiya nena. Nige Pontus, Galesiya, Kapadosiya, Eisia, Bitiniya, atu miteya aungna imagi ara. ² Nige awiya, Tuwa Tutu Mama ra gao kasayao ra miteya, ge dimao ninage eno Oweno zo mena nige gausero dubu ewe pugai miteya, anasani Yesu Kristo ra hu zo nige mena saeti pewa teya. Mono ninage mokora atu babinai, ho ozao nige aungne mitaise ³ Tuwa Tutu, Yesu Kristo ra Maung, ami yazo bowi re pupu nasani yawa yawa yaise. No eno oko, nu ho amao nuna baina nibaung ami, name eno wuire nao awiya pugai pename, arare name dubo eto aung, nona panemase senu mitoiya awiya name maung nename ara. Yesu Kristo maga yaora atu seka yero iropungna, aeno gege name nona apakana awiya maung yari nename. ⁴ Nona maung yari nename awiya oko besugari niya, oko beingti yariniya, oko disari niya. Nona awiya gerao ninage sero aodiwa unditi ra atu mitoiya. ⁵ Tumodiyao ninage eno Tuwa Tutu ra putoung zo nige goma gaeti, nige nao seka besugao bera kasa yaise sosero benero neya awiya diya miteya ara. ⁶ Saineba, mou mawe beraung giti ami nige pupuni, nige hoamao tapu neya, arata, nige bowi ewiya nigiro, yawa yawa baina nibaung neya. ⁷ Mou mawe kasa niya awiya tumodiyao ninage gaero gari butuniya ara, goli awiya nu besugari niya, nupe iyaong ra pugari neya awiya nu tiwari niya, arata tumodiyao ninage awiya tauya nibaung ara. Tumodiyao ninage aungna me awiya, be Yesu Kristo kasaye daung gaiti nari niya, be awiya nu nige bowi pasore nasani, nige eno waegao zeyang zeyang re pugaiti nasani, yazo ninage po hitari neya. ⁸ Nige nu oko gigiwa, arata nige nu aratapu nowa, nige heme nu oko gosineya, arata nige nu tumodidi nasani yawa yawa neya. Yawa yawa ninage awiya, mani zozo giro saineyao teng oko. ⁹ Nige heme tumodiyao ninage aungna me pupuneya era, me nuna awiya, ititi ninage magayao ra atu soremi nao seka pupuniya. ¹⁰ Ititi ra nao seka heme ninege pupuneya ewiya, gitau ago propet dubu Tuwa ra, nona ewiya kauyero atata betata babuze nibaung yewa ara. ¹¹ Kristo ra Oweno zo kotumao awiya ago gipena, aeno ago nona awiya be noune kasa yariniye, nupe emo awe kasa yari niye awiya gari kauyewa. Kristo yang yang biyang yang tamai aungna bautara,soma goli ma goli ziwari nena, awiya oko kasayao mitinu, Oweno zo mena ago gipena. ¹² Ago buro yewa awiya, aka ago soremao ra buro oko yewa, ago nige sore mao ra buro yewa, ayero mena Oweno zo ago gipena. Bowi heme unditi ra Oweno zo emo uwini sineya nige nigiti neya eungne, nupe, nona nomi kasayai angelo dubu gari diya ma diya nauwi, aeno propet dubu ge ewiya sewa ara. ¹³ Arare sosero benere nasani, kotumao ninage yepu tauyai, dopero baingtae. Goli ma goli ziwinai Yesu Kristo ra bao be ami nige eno, waegao zeyang zeyang re puro bari niya, aeno tau yero dopepu. ¹⁴ Heme ewiya, nige ge dimao ra mani awiso ware, nao memeko nige gitau zawagao aung mitasani yewa, awiya nupe oko ago yepu. ¹⁵ Arata, emo awe nige yause nuna hina gaiya, nu awiya dang nibaung ara, arare nao ninage apakana awiya deka dang nibaung mitaise. ¹⁶ Ge zo eyero gayao mitiya. "Na dang mitona re, nige deka ayero dang mitiungpu." ¹⁷ Nige nu eno eyero sari neya,"Mama" nu awiya emo zo ra aratamao oko ago noiya, nu aratamao nuka nuna gege ago nasani, emo sero sero aungna buro awigairo gosi noiya, arare angyao eungna mokora, be bainare awiya nige Tuwa Tutu awang nasani neungpu. ¹⁸ Nige nona ewiya gipu zawagae, nige bata mani, mamono ninage, aungna nao memeko awiya denero puro nowa, awiya zuma zo goli ta, silwa ayao, mena meko yero aung yari niya, ami oko nige zuma gaena. ¹⁹ Nige awiya Kristo ra hu pewa yao nibaung ami nige zuma gaena. Kristo awiya sipsip seka baya ine, yang yang aung, beingti aung, bozo iso aung. ²⁰ Tuwa Tutu tangi ewiya oko yaore, Kristo awiya tangi eungna mou dimaise mena gipenu mitoiya, arata heme besugao bera etu nu kasaye kakame gaiya. ²¹ Nige nuna hina atu dopero Tuwa Tutu tumodidi nowa ara, Tuwa Tutu nu be dekaka magayao ra atu uwenu iropungnu, nu eno yazo bowi re, aungne waegao zeyang zeyang re pugaina. Nu ayai nige putoung re Tuwa Tutu tumodiyaese aeno buro ayena ara. ²² Nige geme agoyao ra gabu ra atu ititi ninage teya pewa tiya. Otao mani aratapu nasani nao gabu, ami buro ayetiya, arare nige mokore, susukare, otao mani aratapu nasani neungpu. ²³ Nige nao sekara mokora atu, mani wuima ine yero kasa yero miteya ara, nige awiya nona he mena meko nowa aungna atu oko kasateya, nige awiya nona he mitao gege mitoiya aungna atu kasa yero miteya ara. Nona he awiya, Tuwa Tutu ra ge naore mitao gege mitoiya ara. ²⁴ Taung piti awiya pugitau ine, simaore, waegao zeyang zeyang re nuna, awiya pugitau wui ine. Be pugitau so noiya awiya, wui nuna warasa gaiti noiya. ²⁵ Arata Tuwa Tutu ra ge awiya be aung mitao gege mitoiya. Bowi ingwaing nige eno mena tugata yewa nige nigiwa, awiya era.