¹ Arare nige nao memeko apakana pu ake gaipu, gehiwao nao, dubo dubo nao, awiya apakana dopu. ² Nige mani wuire seka kasayao ine yero, Oweno ra ami mu eno dorabotiyo taungpu,anasani oune nige nao seka ra bayari neya. ³ Anasani oungne, nige Tuwa Tutu ra bayao awiya gaya kasa yari niya. ⁴ Nige bung nuna hina yepu, nu awiya daba naore mitao gege mitao aine ara, arata emo bauno dubu baina nu bereya yenu dowa, arata, Tuwa Tutu zo nu awiya nona nuna me nibaung asero gerena. ⁵ Arare nige deka awiya daba naore aine, Oweno ra putoung ra, nige ami Tuwa Tutu ra dang garo gamari neya, nige ami prist ine yero Yesu Kristo ra soremao ra, Tuwa Tutu eno ititi ra zawing porari neya. ⁶ Tuwa ra ge zo eyero mitiya: "Gipu, na daba zo awiya, garo ra ziwong gerao, nupe zuma hitao nibaung, awiya Zion agira atu pugaiti nena. Mani awe nu tumodiyari niya, awiya nu megao oko pari niya." ⁷ Ni mani awe daba zuma baina ra awiya tumodiyasa, "daba awiya Yesu Kristo ara. Arata, emo garo gapu nowa ami, daba awiya meko sero dowa, daba ami heme garo ra ziwong me yero mitiya.' ⁸ "Daba awiya, nai angyao ra atu miti, emo bauno puma sauma nasani, te gaero zuwero, gerayao tapu nowa." Ago te gaero zuwero, gerayao tapu nowa aungna susuwa awiya, ago ge nuna oko tumodidi nowa, aeno ago anaese Tuwa senare ago anari neya. ⁹ Arata nige awiya, gerao dubu nuna, nige awiya emo Tuwa ra prist dubu, nige awiya emo bauno dang, nige awiya Tuwa Tutu ra nona ingwang waing apakana, aungna emo bauno, arare, emo awe nige mume moko ra atu yau senu kasa yero, waegao ingwaing nuna aungna moko ra toiwa, emo aungna nao ingwang waing awiya gere gairo se daug gaipu. ¹⁰ Gitau awiya nige emo bauno yazo aung ara, arata heme ewiya, nige Tuwa tutu ra emo bauno yazo re ara. Gitau nige hoamao nuna oko pao ara, arata heme ewiya, nige hoamao nuna mena peya. ¹¹ Otao mani, na nige emo esewa ine, nupe emo tebe ema atu nowa aine, yau sinena, arare nige taung piti ra aratamao nomi ititi ninage aungne iwo niye, awiya dopu. ¹² Anasani nige emo diga mokora atu nao ingwaing naya ami zo, ago nige eno emo dubu memeko sarinete, nao ingwang waing ninage giro, Tuwa Tutu ra bao bera atu nu bowi yari neya. ¹³ Nige Tuwa awang nasani, emo yazo ikapariya pungno nige diya nowa, aungna hese mitasani, ge agera ago yepu. Tangi ra emo tuwa awiya, nu gitau yao baina niya, arare, nige ge nuna ago yepu, ¹⁴ anasani, province ninage aungna emo gitau yao aungna hese mitiungpu, no eno oko, ago awiya, emo nao memeko nowa, awiya dero buni nasani, emo nao ingwaing nowa, aeno yazo ingwaing pugaiti naese giginu kasa yero mitowa. ¹⁵ Tuwa Tutu ra aratamao awiya era, nige nao ingwaing naya, ingwaing ninage ami, emo nao memeko nowa, aungna be tapu dari niya. ¹⁶ Nige nete, nage besao dubu sinasani, beso be eungna atu nao memeko nasani mitaneya, nige zoma, Tuwa Tutu ra sou mani ine yero mitiungpu. ¹⁷ Nige emo bauno apakana aeno nao ingwaing nasani, otao mani aratapu nasani, Tuwa Tutu awang nasani, tangi eungna emo tuwa ra hese mitiungpu. ¹⁸ Sosou dubu, nige diya ninage samo dero baititi nasani, agera hese mitiungpu. Diya ingwang waing gege eno oko sinena, diya ninage memeko awiya dema samo depu. ¹⁹ Nige Tuwa Tutu ra kotumao ingwaing aungne nao ingwaing re, awiya gipi nasani samodao buro naya, aeno nige gera gaira narineya, awiya ingwaing ara, Tuwa nao ingwaing ninage awiya aratapu noiya. ²⁰ Nige nao meko yaya, aeno nige dero gera gaira yaya, yang yang tamari neya, aungna me noiye? Arata nige nao ingwaing yaya, aeno nige dero gera gira yari neya awiya ingwaing ara, Tuwa Tutu nao ingwaing ninage, awiya arataungno baingtiti noiya ara. ²¹ Nige samodao buro ayaese, aeno Tuwa nige yausena, no eno oko, Kristo deka nige eno yang yang ayero taungna. Nige ateate awiya ago yaese, gipero doro baungna ²² Nu pasena zo oko yenu tamuwa, nupe, nuna be ra atu, ge hiwao zo oko kasa yenu tamuwa. ²³ Nu eno ge meko sewa, nu ago eno ge meko, ambeyang oko sena. Nu mou mawe tapu nasani, ago gerayao tamaese oko sena, nu zoma, nao nuna pu awigao emo ra nage gaina. ²⁴ Tuwa nuka nune pasena naname taung nuna aungna atu diungno ipasao ra hitina, arare name pasena zoza oko mitiya, name etetero nao ingwaing ra mitari nename. Iso nuna zo yenu name ingwaing yengwangme. ²⁵ Nige apakana wo sipsip zo tara yero bamaingne yewa, arata heme nige nupe kapete gairo bungno maung ninage tameya, nu awiya ititi ninage aungna diya ara.