¹ Ada toboke gahaia orogi nigo ragi mati ganaga ragohi ahe badina vara daure iai ada ororo ara. ² Ai ade tobo rageme mu bina batahunu ai ogona vera pitoroka iabamu inu. ³ Ai golo ue mati siliva iabara ramu daure gahanu, daure a gagae kiare mati misike isa vene nagate. Akamu vata ada o iaganiva aki kamugei ihie maguri dainehe. ⁴ Nigaha ai meve kine gahavaia iau damune rame nivima. Ai gegehe ineme mare mati me kine gahavaia iau nina koure ra Rohi Bauge ihikone ge auki sirivanu badi vara aka iau damune mohi geige veitera. ⁵ Vata ada a maguri uiare avahu ge mage iege ai vagatane mu tobo raganu netuare vani vahe. ⁶ Koita daure gahi gevare , amu mati koita mage gahi gei hoeke gevenu. ⁷ Di ogonane ama uhu berebe kisa ate Rohi Bauge orogarei. Ana eragima gege biava ra au gege make dainehe ge auki uhuia uhuia uma. Auki uhu berebe kiki vera ate ganai veni mati ihie veni va orogare. ⁸ Ata tage uhu berebe mati hero kisa badi vara Rohi Bauge ororo vera kahi kahi kahe ra. ⁹ Do ogonanuhea ia negu ava madama ragohima. Bebe daure gahi geima nune nune sigoa raki. Eraga berabe ketake biavara mu eramanu. ¹⁰ Onakiki vera di ogonanuhea huhu mati uhu berebe uhurage Perovata gahavaia iabaki Rohi Bauge ihehe harimage roege. ¹¹ Eragiahe nomu roege uhu berebe kiege gahavaia be Rohi Bauge hedoke iau gasina. Iakamu Iobu uh berebe ve iakamu ihinu, Rohi Bauge uhu anana iaka dibanara au uhu dauve mati au vagahu e. ¹² E ada hege di ogonanuhea, a negu ominuo be vime vava mati vata adaoi se iaga nune bei. A ito gei, ama bina itosa, a veite roege auma bina veite goisa. Anegu berabe bauge derikehe ai ragime. ¹³ Iau vagahe be huhunage ge, auma Rohi Bauge imigisa be hegiri viege, auma Rohi Bauge mage gahisa. ¹⁴ Iai vagahe be na dikai ma, auma aena gahavaia ihiro gevege iauma ai dainehe Rohi Bauge imigisa mati oil va au ahatane mage gahisa Rohi Bauge ihehe. ¹⁵ Uhu kobugava imimi vara dika koita mage gahigavara mati iaheiahe vara. Au daure ve inuhati Rohi Bauge moimi. Rohi Bauge na au daureve ari geisa. ¹⁶ Bebe iau daureve gagae ro geiare mage miahe mage koita imimi vera herotera. ¹⁷ Eduge tage no nagate au imimi hero vareige veni ra tau abigaga mati bata agorokiva au gorogu veite. ¹⁸ Auka imimi vi goirage va raki baoragi ge veni ki uguhanu vata ada o idi tahaka va iabaki maka te gahanu. ¹⁹ Di ogonanuhea, iai vagahe be vadibu uhura uiege be ramu ti mi goiragi orogisa. ²⁰ Koita be na ti iahegare nisigami goiragi ma koita e Horu aena auki e hoge uhura maguri gahanu.