¹ Nianaamuo, Paidubui Iesuido pupuo iraromo uubiito arahoida, nio eremahibidio everai uubiado idobuti naa biaka. ² Naana hiiro dubui motoito nu himia naana miamiai rautu avioroa, naana tataha dubui nu himia naana memeiho memihoi rautu ioroi ouka. ³ Miamia naana rautu dubui nooro everai avemaa, ''Oua siai ohuida emi'ei, kaida naana memiho memiho rautu dubui ma emaa, ''Ire'iida otiidioa'' o everai avemaa, ''Oua hepuida emi'ei,'' ⁴ nio himia avororoibota tidiodu.. Memiho uriioi iraromoi avaaidu.. ⁵ Mo gi'epu nianaamuo, oroovidiodu, ihu hepu geemai ohuida naana tataha uubii nihimia pupuo iraromoi modoboida Iehovaro aipirubomai nu pai eraarai oo'a vatii ii'a naanaida nuido gi'epu iraromoumo uubii rautu eraara ma aai moiri. ⁶ Inaivia nioro ni imaabeumo biaka.. Nio bo'uioro ivareedioumo via kotoida ide'enaumo.. Naana hiiro uubiika. ⁷ Nio paina miamiai ni hi'airo mamaa pimovaimo. ⁸ Baiboroida ihu everai'o iaroo, '' No himia gi'epu eremai everai noo taitai merei gi'epu ma emai.'' Aa'o nai avobodoodu eeka nio mia naa aikaumo. ⁹ Ii nioro miamia uubi behaiha gi'epu avimaidu, ka nio sini komiiti aikaumo via bubui ihebuti uubiito iahoi oukaumo. ¹⁰ Bubui tuunioha ibodooida kaa'ubuo hi'ai avehebia, ire bubu to'oi tauo ihebuti vaaka. ¹¹ Ihu everai'o ivii'aadu, ''Dubu rautu oobo ova'oiaute,'' atai via, ''Mereata nituoha aamadiai aute.'' Ire bubuotiida atai avobodooa iida atai avehebia, niiti tuunioha tauo ihebuti mama vaaka. ¹² Ka nuuri ooraduuti everaiha ma ova'ati mabu uubii fri ivadio bubuiro nimo tuunioha jaj aai ouka. ¹³ Iehova jajmenti uubi imodobuaumoi uubiido ovouka. Ubii gi'epu imaida no jajmentiida wini ii'i ouka. ¹⁴ 14 Mo nianaamuo, na'aiboi oo'ai voua, mereataro ihu everai avooraduea nu pupuo iraromo rautuka, inai via eksiniito edeea tataha.. Ire pupuo iraromoiro nu oroi'ioida edeeai aviaia.. ¹⁵ Uubi aamiai naana tataha via iiho duu tataha ive'idiodu. ¹⁶ Tama naana ovaabai tataha via iiho duu omoha tatahaida na'aiboi oo'ai voua nooro mereatai ihu everai avemaa, ''Odaua miahaka, gua'o aai bia ouka via no nioipii puuru haka. ¹⁷ Ee ka pupuo iraromoi atuu everaika, nooro eksiniida edeea tatahara, nu orova'atii bia ouka. ¹⁸ Ka mereataro ihu everai avarooa, ''Pupuo iraromoi noo ne'ei daaka, eksinii mo ne'ei daaka,'' No eksini tataha pupuo iraromoi ma obodiia, i moovia pupuo iraromoi eksiniida obodii nouka. ¹⁹ No uumo avo'a Iehova ka'uubuo behaka; no uumo hi'ai iree vo'a. Memiho uriioi rautu uumo hi'aka inai ni tamai tooito aiaromoho dio kaumo. ²⁰ No niora uumo ii'i, avaavo dubuo, eksiniito orova'ati tataha pupuo iraromoi hobou naaka. ²¹ Nimo naniai Eibraham na'aiboida ereedeea Iehova rautu taitaiha.. Nu himia hi'a merei Aisak, Iehovaido omohairi totoi ohuida aipaa'uai.. ²² Ka avia'aadu, pupuo iraromoi eksinii rautu kopiha porova'atiido, via eksinii iorova'atii modoboida nu pupuo iraromoi geema hi'a pii'i. ²³ Ka Baiboroida ii'a everai aha porododiai, ihu everai'o iaroo, ''Eibrahamuro Iehova orohaito iahoi modoboi nuuro uumo pii'i Eibraham miahi'a mere ataka,'' Ka nu aipahoumo Iehova ovaabai mere ataika. ²⁴ Ka avia'adu, nimo himia eksiniito iva'ati modoboida ivohiaika nimo Iehova taitaito, ii iraromo pupuo behai haito biaka. ²⁵ Atu everaika, Reiheb dudududui modoboi poraa'oiai oobo ataka, nuuro Israel uubi idomai uubi gee'ii rautu pimidai ka nuuado pitiodai gabo ataiha. ²⁶ Duupii uriio tatahara, ihiai ouka, ka pupuo iraromoi atu everaika, eksini atahara, ihiai ouka.