¹ Jeims, Iehova ova'ati meree ataka via Paidubui Iesuire, gee'i vadeka nio hepu geemaida iorovodau- dioumoi tuoro aavaido. ² Moo nianaamuo, nioro gee'iha mai nioido hiirohiiro oromodobua naanai oroohoumoida. ³ Nio uumo mao'ai Iesuido pupuo iraromoi oo'airi ire naanai nuuri orooho oukamo. ⁴ Oromodobua naanai tuunioha moropoi'o kaame nio vatii ataado ma ereedeeau moiri via haupoha ma eremahibidiou moiri, naa ata tana ogoihoka. ⁵ Mereata wisdomuri avaia, Iehova haido ma iruudemeai ma omohairi, nuuro miahi'a orovaabai iraromoida omohai ouka, ahorobo tataha. ⁶ Inai pupuo iraromoi rautu ma iruudemeai, pauopauo iraromo tataha. Pauopauo iraromo rautu merei konoboiro ma ovidiaitutii auboi everaika, paraka hi'aha. ⁷ Aa'o mereiro iraromo aute nu Iesu ne'eida ansai eidai ouka; ⁸ nu netoanetoa iraromo mereeka, iraromoi kaa'ubuo ne'eado edeea biaka. ⁹ Naana hiiro tataha ekalesia gee'iha mai Iehovaro ni ohuito ivioida, ¹⁰ via naana hiiro ekalesiai rautu gee'i mai atuu everai Iehovaro ni avivo'uoa gorohi'aito, mabu ni papaa'uuo goroida ma otiumoi paravasii everaika. ¹¹ Hivioi eraarahi'a ioroida tuunioha papaa'uuoi tuatua hi'aha ivaika. Aa'o paravasii tuunioha ire'iida oomo'autii haka. Naana hiiro merei aa'o everai oorabuaika nu odau hioi ipihi'aida. ¹² Pupuo iraromoi emahibairi naana ohu odau merei gee'iha maaika. Aa'o emahibo naanai oropoi'o didimoi, Iehovaro uubii poromesi imaai oroi'ioi nuuro nuuado eidai ouka. ¹³ Erematuhiai ooida mereataro ihu everai aroo naa biaka,'' Mo Iehovaro nematuhia vaaka,'' mabu memiho uriioiro Iehova ematuhiai bia ouka, via nuuro mereata ematuhiai buai bia ouka. ¹⁴ Erematuhiai meree kaa'ui nuu himia iraromo naana memihoi modoboi ooika, sataniro nu ma ematuhiairi. ¹⁵ Ka ematuhiaida siinii nuuro nuuado komit aika, ka siinii geema ii'iida iihiairo oobodiika. ¹⁶ Aa'o nairi mo gi'epu nianaamuo, erematuhiai hia'e omoha naa biaka. ¹⁷ Tuunioha miamia gi'epu naanaire via memiho keeke tataha gi'epu naanai Iehova pai eraarai oo'a ne'eida io'uodio kaumo. Aa'o ne'ei naanai eehei imioi Abiaika. Nu ne'eida sens rautu biaka via erehe'euti du'omu rautu biaka. ¹⁸ Nu himiahi'a nioida pinivou oroi'iohi'ai uumoo manii'u moiri, mabu tuunioha nu idodiai naanaida epuu hi'ai nimo'o manideeairi. ¹⁹ Mo gi'epuhi'a nianaamuo, ihu nai nio uumooka; Dubu kaa'ubuoha marorovai, ooraduei everaitoito, uduo hoviri tataha. ²⁰ Mabu dubui uduo iraromoi Iehova ne'ei ova'ati hi'ai biaka. ²¹ Aa'o nairi memiho ova'ati naanai ma itaumai via memiho oroi'ioire. Hambol oroi'ioida goroida iedeeaumoi vadeiha ma eidai, mabu nuuro nio oroi'ioida ideeai ouka. ²² Nio paidubui vadei oroovidio beha uubi biaka ii, ododiai uubika, himia avaavo orododiai naa biaka. ²³ Oroovidio beha bo'uro voroovidioa via ododiai tataha, aa'o merei garasiida oohoi miahi'aha ma oromoiboi merei everaika. ²⁴ Ma oromoiboi ka ivodauo, inaivia nu garasiida ivoromoiboi everai dodo ii'iika. ²⁵ Ii uubii firii ivaidio bubui miahi'aha bo'uro vomoiboa, via ooradue nai aha ivododiaia, dodo ii'i tataha, aa'o merei nu himia ova'ati miai modoboida Iehova ne'ei orovaabai eidai ouka. ²⁶ Mereataro nu himia totoobei kontrol ai tatahaida avaia mo ekalesia mereeka, no ire ekalesia painai hobou naaka via no himia avaavo orododiaika. ²⁷ Ekalesia oroi'ioi Iehova iraromo hi'ai ihu everaika; abiara maamura tataha mere keekeire, maamio tataha dububaire via dububai tataha maamioirai ma ivaabai, via hepu geemai mama naanaida ma iivatuei.