¹ Pooro, Paidubui Iesu vadei ovadue mereeka, Iehovaro iraromoi everai potiodai nu taana uubii ne'eito Ifisas ado Iesu niiro tuunioha hivioi iraromou moiri. ² Orovaabai nio rautuka via mioire, nimo himia Abiai Iehovaire via Paidubui Iesuirei ne'eida. ³ Nimo Paidubui Iesu, nuu Abiai Iehova painai emaraahuedu, mabu tuunioha nuu ne'ei uriio orovaabai naanai Iesu rautu inimotiodairi. ⁴ Hepu gemai iorovahoroida nuuro gi'epu iraromoida nimo tauoha pinimidai nuu ne'eida taanaha mane'idioumo via mamaa naana ai tataha. ⁵ Iehovaro nimo ioboduti tatahaida tauoha piniahuurai Iesu gaboida nuu mereeito manaraahou moiri, nuu himia gee'ii iraromo miamiaida. ⁶ Ka nuuri Iehova nemaraahueumo mabu nuu meree ohio kaa'ui firii hi'aha inimohairi. ⁷ Iesu orai hepuito iooruediida nimo firii tauo pinivai, aa'o nai everaika, nimo inaaimoi mamaai tauo pinimovoru, nuu iraromo geemai ioo'ai everai porododiai. ⁸ Nuu mia geemai nimoido iobodii everai odobuaito modobo biaka. ⁹ Iehova himia goroida iaraahoi iraromoi pinimobodii nuu gee'ii ma aairi, Iesu ado, ¹⁰ hivio mabui oohiai vouaida Iehova pleeniida ii'aa everai tuunioha naanai kopiha ivohiiai ouka, nuu eraarai oo'aa ne'ei naanaire via hepui naanaiire, meree kaa'uro eraara ma aairi, aa'o merei Iesuka. ¹¹ Tuunioha naanai Iehova pleeniire via disisiniirei modoboida orododiai kaumo. ¹² Nimo nuu uubiito manarahou moiri Iesu gaboida pinivohiiai nuu taitaito, ka nuuado nu ma nemaraahueumo. ¹³ Ka nioro vadeipi hi'ai ioroovai moiri noi nuu uubii pii'iumo, nio oroi'ioi imovoi vadeipi. Nioro Iesu orohaaito iahoou moiri nuu stampai nio ado tauo povatiai, aa'o nai everaika, nuuro poromesi imaai tana uriioi tauo pimotiodai, ¹⁴ aa'o uriioi mabui everaika, Iehovaro nu uubii poromesi imaai nuu ne'ei naanairi fridomui imohai ouka. Iida nuu mai painai nemaraa hueumo. ¹⁵ Aa'o nairi mooro nio Iesuido iraromo pupuoire via Iehova taana uubiire, nioro gi'epu imai everai inoroovaida, ¹⁶ Mo Iehovaido keito vadei emadohomai biaka via moo iruudemeida nio tuunioha hivioi aha niahoutika. ¹⁷ Moo iruudemeida ainooradueka, Iehova via gee'ii abiairo mia iraromo uriioire via nu tiinoi goroi ii'aa naanai nioro koriha ma ia'aaumoi uumoi ma imohairi. ¹⁸ Moo iruudemeida ainooradueka Iehovaro nio kaukaui idomai ma ia'erairi ka nioro uumoo mai'iumo nio nuuro na'u mabu iahoo via nuu ne'ei gee'ii geemai mai oibotaimo, ¹⁹ via nuu pupuo eraarai nuido iraromoumo uubiida ova'ati everaire. ²⁰ Ihu atuu eraarairo pova'ati Iesuado, nituoida ioveibua via Iehova tuu hi'ai hapuoida iovomi'ei nuu pai eraarai oo'aa vatiida. ²¹ Aa'o ne'ei pai uubiire, bubu bubuire, via eraaraire tuunioha Iesu goroida pideea. Ka nuuro doo'ou e'idioumo uubi behaiha iarodioi bia ouka ii didimoi oobodutii vooudui uubii rautu atuu everai eraara aai ouka. ²² Iehovaro tuunioha naanai Iesu otoi goroida pideea ka tanamotoito nuuado pimoha nuuro epuu ma aairi. ²³ Tanamotoi nuu duupiika, aa'o ne'eida nuu haupoha e'idioiri tuunioha naanai orova'atii oukaumo.