¹ Rupu velena kamuna eve renagio,''Ethori aunaauna pa?'' ² Setepano neiwao,''Wala avaku e amaku,igo amonagiku; Vewaa Palauna ia amari Abraham elenai eve vamagio Mesopotamiai ealu wai thaonai,kapinai Haran ai eve aluo; ³ evaila iwao,' Gemu alimapara ono kali wania e wala walamu,ono vethoa oa alimana ana varipamu.' ⁴ '' Thaonai iana Chaldean alimaparana ekali waniao Haran ai eve aluo;wanai ealuo mulinai amana ewaregao,Palauna ealimaparai eveamai agiao,avanai evanamona mui goalunia. ⁵ Waua vagi nee venia gena,noaia vagi manori gelegele gagena gaua pene ole aua.Namu ia eilagavu-lewana Abraham noai nauna thaonai-iana alima pene venia e kalakalana ia mulina na pige veami auri geria. ⁶ Palauna ia eveaina ethori venia wai,ia kalakala na alima poluai pige alu kirikiri,avanai vi vi maulina pige rawalia pige vagaro oneri e pige gurugu ria rigolo maparari inavu vai vai. ⁷ 'Namu geala veniani alimaparana thauna pana vaaithoria Palau neiwao,mulinai ila pige thoa rai ekapuai thau pige airupuali veniku.' ⁸ Thaonai Palauna Abraham peritome rovana eveniao,thaonai Isaac ewalao,garo aula vaivai mulirai eperitome ao;Isaac na Iakobo eva walao,Iakobo na kwalu vele ri kapanana lualua eva walarao. ⁹ '' Repana kuine Josepha elenai geve maauo,Aikupito ai gevoi agiao;namu Palau ia laganai ¹⁰ kepi maparari thaorana elauawai.Palauna maanai josepha evegala gaua vagio e thaoneka eveniao Aikupito geria vele Parao vilanai auna na kawana rakina eveniao gena numa rinaa ri veia maana Aikupito maparana thaonai. ¹¹ '' Thaonai roge ekwarao Aikupito maparanai e kana anai,vi vi kamu vagi ewalao,ia amari gani gani rawali rawalina egauao. ¹² Namu Iakobo eamonagio Aikupitoai gani gani gauna wara,ia amari euuthai rao geria thoa rai maamana. ¹³ Geria thoa vaga lualuanai Josepha wala avana elerai eve vamagaio,thaona na Josepha gena numa auri Parao na eripathao. ¹⁴ Josepha wala avana euulavu ule rao ila amari Iakobo pige vaila pige veamai Aikupito ai,ma wala walana maparari auri,kapana aula oioi apuna e imaima. ¹⁵ Pe Iakobo ethao Aikupito ai evewarega,ia e ia amari. ¹⁶ Ila geve amai agirao Shechem ai Abraham na alima evoiao Hamor nauna elerai avanai gekuli rao. ¹⁷ Ilagavu orana eveaviwai,Abraham eilgavu veniao ilagavuna aunilimalima gekamuwai e gevogo vogo wai Aikupito ai, ¹⁸ pene thao ma vele apua elaa rageo,evele na Josepha nee ripatha. ¹⁹ Ia gera aunilimalima eva raava rawai ia amari eva gaiirawai wala reparepari elori pige vagiri pigene mauli. ²⁰ '' Wa ora rai Moses ewalao; Palau vilanai ia ewala ralema ralema amana gena numa thaonai vue oioi apuna geia marao. ²¹ Gau kerunai geve oleao laganinai Parao vele nauna vavinena na enau vanagiao evakamuao ia naunai. ²² Moses ethaonekao Aikupito geria thaonekai,ia iwa vagi gena ulavunai e gena thoriai. ²³ '' Namu ia emi ola rageo rigolona kapana vaivai thaonai valavu emi rawalio wala avana Israela kalakalana vagaa pene thoa ia aliri. ²⁴ Eiathao thaonai Israela auna apua nori olema namanai geuamagi venia wai, Moses na galamana ealao Aikupito auna evagiao: ²⁵ ia euamagio thaonai ia wala avana pegere uamagi ripa Palau imana na ila evai rairawai,namu ila noai geuamagi ripa wai. ²⁶ Rapa eluvao au lualua eiarao geve vagi wai thaonai,ia ethao pene vaila pikapikari e pene vamaino ri,neiwao,' Au mui pe ma wala avamui; namu raagauna gove vagini?' ²⁷ Namu galama eva wala auna na Moses eroli gerevagiao,neiwao,'Goi riaina iavu evenimuo thai pono ia maamai? ²⁸ Goi oririwani thau ono vagiku,walagani Aikupito auna ovagia veaina?' ²⁹ Mose euleo ethori eamonagiao mulinai;ia ethao Midiana alimapara nai eve alu vaalu auo,wanai eve garawao melo maluane ri lualua eve vawalarao. ³⁰ '' Rigolo maparari kapana vaivai geva nagio,aneru apua ia elenai eve vamagaio kapu leanai Sinai golona laganai,alovana muu egalawai vailianai. ³¹ Moses na alova eiathao,avana emalele agia wai;eve thoa avi avio pene ia nama nama,thaonai velegaua karona elaa rageo,neiwao, ³² 'Thau mui amamui geria Palau,Abraham,Isaako, e Iakobo,' geria Palau. Moses enukeo nee ririwao pene iatha. ³³ '' Velegaua na evaila iwao,' Gagemu tamakari ono alavagiria, repana goi oruao avana wara veaa alimanai oruao. ³⁴ Thau geku aunilimalima geria vi vi auna auna paiatha Aikupitoai; Geria agi paamonagia,gaurai thau pami rivo ila pana vairairia;ono veamai evanamona, Thauna goi auumunia ono thao Aikupitoai.' ³⁵ ''Moses ia geruatha, gevaila thorina,'Goi riaina eva iavumu thai pono ia maamai?'-auna pe ia Palauna na euuao ulavunu lualuai pene vele e pene vevai rai. Palau aneru imanai eve vamagaio Moses elenai muu thaonai. ³⁶ Moses na Aikupito na evai rairi,vevakali viliari e vailia maveva kali agiri eva walarao Aikupito ai,wapa rawa paranai,e kapu leanai rigolo kapana vai vai thaorai. ³⁷ ''E Moses namo Israela auri evaila iwari,'Mui thao muina peroveta auna apua pene vamagaia,thau veaiku.' ³⁸ Eaue ia kapu leanai alukou thaonai(in the assembly in the wilderness) Sinai golo nai aneruna ethori veniao,ia amaria ila gethoa kouo,e auna na mauli thori thori egapirao ia pene veniria. ³⁹ '' Namu ia amarana noai gegapi rageao;ila elerana geroli paauao,ila thaorai ila valavuri gelavu ulewaio Aikupitoai. ⁴⁰ Wa oranai Aaron gevailao, 'Thai gemai Palau vairi ono maneri pe thai pige vai mai.Namu Moses na Aikupito na thai evai raimaio,auna thai nori ripamai ia elenai raaga pewala.' ⁴¹ Pe ilana poromakau apua gemaneao e veveni gauna apua geve amai agiao ekaivakuku geveniao,gevereleo repana ila imarana gemaneao gauna. ⁴² Namu Palau eala iwao ila eva makerao viu vue uluvu ai geai rupu alivenirao,peroveta auri geria aloalo na eilagiao gelegele nai,'Israela numana aumui igo amonagi rigolo kapana vai vai kapu leanai,thau poromakau govagi rawai gauri go venikuwai pa? ⁴³ Muina Molech gena rupu gogapi rageaoe Rephan palauna gena viu,e kaivakuku go mane rao gauri go airupu alivenirao;e thauna mui anatou vanagi mui Babylonia mai igo vanagia.' 4 ''Ia amari valavu thao rupuna gegapia kapuleanai,Palau ethori wai veaina Moses thaona na,eiathao veaina pene varua. 5 Kapinai ia amari, Joshua gena vevai kapulenai vua laiwa laiwa rupuna gerawaliao gethoa agiao alima gegapiao.Palau na ealima egapiao gealu agia wai auri elerana e egiu rai rao ia amari vilari aiairai.Vua laiwa laiwa rupuna emia wai pene thao Davida gena lagani ai, 6 ia Palau maanai evegalao,e eve renagio pere nama kapu apua pere avua pe,Iakobo gena Palau pere alu avana. 7 Namu wape Solomona na Palau gena numa evaruao. 8 '' Peiatha thaonai,gau uunaivagi ealuni auna ia nori aunilimalima na numa geala rana numarai ealuni,peroveta thorina, 9' Kupa thau geku terona,e alimapara thau gageku ole alina kapuna.Raa numa veaina thau geku goina poro varua? Velegaua neiwao,pa thau geku pikapika kapuna raagau? ⁵⁰ Thau imakuna egau maparari naa maneri pa?' ⁵¹ ''Mui awa awa aunilimalima mui,thaomui noai go peritome ri e egamui,vanagi vanagi veaa palauna gova waiani;amamui geala wai veai veairi vagi go maulini. 2 Ari peroveta auna apuna mui ama muina noai gelivua? Thakwa thakwa vagi auna gavunai peroveta auri geve amai reparepao auri gevagi rao; e mui evana velewa wai aumi e mai ia govagi vunia aumui, ⁵³ mui aneru na rova geva rua go rawalia, namu noai goroana ole.'' 4 Evana rupu vele rana ethori geamonagiao thaonai,ila thaori geraava gaua vagio,ila ruari Setepano elenai gegala vekiirao. 5 Namu ia,repana veaa palauna na eva vonuao,kupa eai rage veniao Palau gena vewaa eiathao; iana Iesu eiathao Palau ripana gena avanai eruao. 6 Setepano neiwao,'' Igo iatha,thauna kupa aiani peve alapa,e aunilimalima nauna Palau ripana gena avanai eruao.'' 7 Ethoriai rupu veleri maparari egari gekana gavurao,gegogo makala wai,ge kulu veniao ganina apunai. 8 Vanua thaona na gekere rakwa raiao,vauna gethapa wai.Maarana geiathao auri geria ligo thaai rapuari geala vagirao auvalivu auna apua tharana Saulo (Saul) gagena repanai gethava alirao. 9 Vauna gethapaa wai thaonai,velegaua elenai egogo ragewai neiwai,'' Iesu Velegaua o,palau ku ono vaia.'' 0 Setepano euialio thaonai egogo makalao, '' Velegauao,egalama ila elerai poono oleaua.'' Ethori eilagiao mulinai,eai mauo.