Garo imaima mulirai,Ananias rupu velena kamuna,vanua veleri e Jews gavurai pene thori auna apua tharana Tertullus geve amaio Caesareai.Eilana Paulo gena ala kepi thoriri geve amai agirao Kawana elenai. Paulo kawana vilanai erua raio,Tertullus na eilagi ra'avao e kawana evailao,goina gaurai ia maino pa rawalia,e gemu uamagi namai ulavunu nanamari ia gera alimaparai gewalani; gemai vevanama kamuvagi e oulavunu agirana gauri mapararai ga gapi ragemuni Felix velemu. Pe, thauna goi pa'ana rogo gaugaumu,thauna goi anogimuni ono amonagi vethaleva mai. Eau thaina paga rawalia ia nori aunilimalima,iana Jews maparari ealimaparai peva galamari.Ia Nazarene oleana apuna geria vevai auna apua. Ia mai rupu ene vara'ava peiwa thaonai paga ligoa. /8 Paulo goina pono renagia ethoriai thaonai,goi pono ripa ia ra'a kepi eala agiao.'' Jews maparari ekepiai gekoukouo,geva auna auna nia ekepi iana evawalao wara auna auna. 0 Namu kawana na Paulo etharo ali veniao pene thori, Paulo neiwao,'' Thau ripaku goi ealimapara gena vevaithori auna rigolo vogo vagi poalu agia,pe thau ma'auku ana veilagi magai goi elemuai. 1 Goina pono avu iaiatha thaonai garo nori kapana na e lualua mulirai thau ave rage ole Jerusalemai airupuali ulana na. 2 Thau rupu thaonai geve rawalikuo thaonai,thau auapua goi noai gaila vevau'uo e olea apua na'a vagalama rao,rupu thaonai pa vanua thaonai. 3 Thau elekuai ekepi geilagiani gauna veva auna auna ari gauna. 4 Namu thau ave ilagi raini goi vilamuai,ila geria thoriai thau pege ilagiku Nazarene oleana,pege ilagia veaina thau ia amari geria Palau a'ala venia ni.Thau geku veva auna auna guguluna vagi rova elenai e peroveta auri geria aloaloa ai. 5 Palau elenai ila geria veraramani emiao veaina thau mai,gauna wara thakwa thakwa e moira auri ila pige laiwai waregana. 6 Pe gaurai thau vanagi vanagi avewalavini uamagi vethalevai Palau e aunilimalima vilarai. 7 Rigolo vogo mulirai veva ava aveamai agirana geku alimaparai e veva ava moni ai. 8 Eolema thauna avamagai ao,Jews Asia na geve amaio thau gemi rawalikuo rupu thaonai vethaleva velewanai,nori u'uma thaorai pa ilavevau'u apua thaonai. 9 Aunilimalima ri evana goi vilamuai thau kepikuai geilagikuni,pene ila mageria thori. 0 Jews gena alu kou kamunai ra'a kepi a'ala agia ige ilagia repana e auria mo goi vilamuai pege rua rai, 1 pa pene ilana thau ethori galamanai geligokuo,gauna era,Thau ila nuanuarai arua agogo rageo naiwao ''Thakwa thakwa auri e moira auri ila waregana pige laiwai,gaurai thau egaroa gova aithorikuni.''' 2 Felix rau vagi eolema ge va ripa kuneao,kota eole vanagiao magaro apuathai.Ia neiwao, '' Veali velena kamuna,Lysias Jerusalema na ro pene veamai mui gemi thori pana vagegelatha.'' 3 Iana tipura veia ma auna evailao Paulo pige kana oa,namu gena ala laiwa laiwa pige kouri repana auavana vairi pige veamai thaonai gena ririwa gauri vairi pige venia. 4 Garo vairi gevanagio mulirai,Felix magarawana Drusilla,ia Jews vavinena,Paulo unagina geu'uo ila veva aunaauna keriso elena na thorina geamonagiao. 5 Namu Paulo ria gealu ao wai thaonai,Paulo na alathakwa thakwa,nua gaua,e vilari garori vevaithorina (judgment),Felix nuana erageo neiwao,'' Ono thoa gerevagi evanamo. Namu paka ia pana rawalia avanai,goi unagimu pana u'u.'' 6 Ia gena uamagi thaonai Paulo na ia moni pene venia,unagina eu'u wai gealu ao alu aowai. 7 Namu rigolo lualua gevanagio mulirai,Porcius Festus na Felix kapuna egapiao kawana rakinai,namu Felix Jews geriana ethaowai,pe Paulo tipura numa thaonai ekali waniao.