¹ Pentecost garona ekwarao garonai ila maparari gekoukouo kapu apunaimo. ² Nori rau rau kupana galavu apua eveamaio thagila raava veaina,e ila gealuo numana thaona maparana eraka lova ao. ³ Ila elerai alova veaina matha geve ware lovo lovo ole,ila apuri apuri thaarai gealu auo. ⁴ Veaa palaunai ila gevonuo ma karo vairai gethoriwai,veaa palauna na evaila rawai veaina. ⁵ Palau gena aunilimalima vanua vanua maparari, ekupa kapulenai gealuni e Jews aunilimalima ri Jerusalemai gealu wai auri. ⁶ Egalavu geamonagiao,uuma gethoa avi avio ge aovo aovo repana ila geamonagirao geria vanua karorai gethori wai. ⁷ Ila geve vakalio;negeiwao,''Auna auna ila maparari Galileia karonai gethorini pa? ⁸ Wa raagauna ila gamonagirana, apuri apuri thai gawala rageo vanuari karorai gethorinia? ⁹ Parthian e Medes e Elamites,e Mesopotamiai gealunia, Judeai e Cappadociai, Pontus e Asiai, ¹⁰ Phrygia e Pamphylia, Egypt ai e Libya ava vairi e Cyrene thao venina e au wari wari Roma na geve amaio, ¹¹ Jew e Proselytes, Cretans e Arabians, gamonagi rana thai gemai vanua karorai Palau gena ulavunu geilagiani.'' ¹² Ila maparari geaovo aovo e geve vakalio;maauri geve vailawai,''Egau ganina raagau?'' ¹³ Namu vairi geve galaigai negeiwai,'' Na pege niuniu wine na pevagi ria.'' ¹⁴ Namu Petero kapana na apuna erua agirao, karona eva rageao, evaila iwarao,'' Judea aunilimalima mui e Jerusalemai go aluni maparamui, ethori muina pigo ripatha; thau geku thori igo amonagi ria. ¹⁵ Eaunilimalima nori pege niuniu na gothoriania veaina,evanamona pe pogipogi valivu valivuna roera. ¹⁶ Namu epe peroveta auna Joel na eilagi thalo thaloao: ¹⁷ 'Palau neiwao, garo kapi kapirai,'Thau palauku pana lavu gatha aunilimalima maparari thaarai. Mui naumui maluaneri e vavineri pige peroveta,gemi au valivu pige maa vanagi, gemi au ola ola ila nivi pige nivi agiri. ¹⁸ Auna auna thau geku veala veveni auri thaarai e vavineri wagaro rai thau palauku pana lavuga raia,ila pige peroveta. ¹⁹ Kupa uunai vailia pana vamagairia e vailia alimaparai,lala,alova e kovu. ²⁰ Garo pene make pene muuna e vue pene make lala kapi Velegaua gena garo evirigiao garona pene veamai. ²¹ Wagaro anai riari velegaua tharanai gegogoni ila pene vamauliria.' ²² Israela aunilimalima mui ethori igo amonagiria: Iesu auni Nazareta ia aunilimalimai Palauna eva gapitore agimuio olema nanamarai e vailia e vevakali vailiari Palau na eva magairao nuanuamuiai ia thaona na, mui ripamui. ²³ E au eve veni vanagi agiao Palau gena uamagi maavuai e thaonekai;e mui, rova nori ripamui aurana satauro ai go naero rageao ewaregao. ²⁴ Namu Palauna eva laai waiao, warega vi vina thaona na elauao, repana warega noai gena iavu pene rogo kikilagia. ²⁵ Davida na ia eilagiao, 'Velegaua thauna aiani thau vilakuai,ia thau imaku ripana epinai pe thau paana ala laiwa laiwa. ²⁶ Gauri pakurai thau thaoku enamao e mathaku evereleo.Emaina thau auniparaku wara veraramaniai pene mauli. ²⁷ Thau palauku olopu wagari poono veniri,pa goi gemu veaa melona apuna poraga peene iatha. ²⁸ Mauli olemana ova magai venikuo; goi vilamuna thau thaoku namana pono vavonua.' ²⁹ Vewala, thauna mui availa thakwa thakwa muini Davida olemana,pe ia ewarega e gekulia,e ia gena kalani veole egaroa ia elerai gauna era. ³⁰ Gaurai,ia peroveta auna apua ealu e eripa Palauna ia eilagavu venia garo apua ia kalakala na apua gena vele aluaunai pene alu. ³¹ Iana eiathao vilari garorai raaga pene wala e Keriso gena laai wai ethoriao,pe ia olopu wagari elerai nee ri waniao,o ia auniparana na poraga nee iathao. ³² E Iesu-Palauna evalaaiao,thai mapara maina gaiathao. ³³ Gauri pakurai,pe tou laai mai Palau imana ripana gena avanai eilagavu veni maio gauna veaa palauna amana elenana,elavugathao pogo iatha e pogo amonagia. ³⁴ Davida Iesu kupai amana na eve tou ragea veaina nee verage,namu ia neiwao,'Velegaua geku evailao,'' Imaku ripana avanai ono alu ³⁵ pene thao gemu vukuku auri goi gagemu ole auna patana pana oleria.'' ³⁶ Gauri pakurai,Israela numa auri maparari pigo varipa ria Palauna ia vele rakina e Keriso eveniao,Iesu na muina go satauroao.'' ³⁷ Ethori geamonagiao,ila thaori geve aoleao,thaonai Petero e veunagi auri gerenagi rao,'' Vewala thaina raaveaina pagara ala?'' ³⁸ Thaonai Petero na ila evailarao,'' Igo valavu wai e apuri apuri, papasito iavuna pigo gapia Iesu Keriso tharanai pe, galama mui pene vuligiri,e veaa palauna gena veveni elemuiai pigo rawali ria ³⁹ Repana ilagavu pe mui gemi e mui naumui e kapu rauai gealuni auri e aunilimalima maparari velegaua ia gera Palau pene gogo.'' ⁴⁰ Thori ia vogo thaorana Petero eve vamagaio e enogi nogi rao,''Emoira kalakala na thaona na veva mauli pigo avua.'' ⁴¹ Gena thori geamonagiao e gegapi rageao ge papasito rao,wagaro anai aunilimalima maparana thagana oioi geria mauli velegaua geveniao. ⁴² Maauri geve veni vagio keriso gena veunagi auri geria vevaripai e koukou ai,parawa ala avaluanai e veni vuavuai. ⁴³ Aunilimalima maparari elerai kali ethoa oao,vailia irau irau Keriso gena veunagi (apostles) auri thaorana gewala wai. ⁴⁴ Geve vauna aunao auri gekoukouo e garia gau maparari apuna mo, ⁴⁵ geria numa e rinaa gevoi agirao aunilimalima geware venirao, veaolea auria mai. ⁴⁶ Garo mapara rai gau wauna mo pakunai rupuai geve veni vagio. Ila maina geria numa thaorai parawa geala avaluarawai, geve gani veveniwai verele e manau auria ila, ⁴⁷ palau geva rageawai aunilimalima maparari geva nama thawai veva mauli gerawaliwai auri velegauna ila auri eva vogorawai.