¹ Ulamagi aumui, ia eilagavu thaorai aaluo, ia evamilo rana gauri maparari thaorana evethaleva auniparai e palauai. Veaa maulina mo pevai vaia Palau kalinai. ² Thai gemai ovua pigo ala maavuri. Thai na auapua noai gava raavao. Auapua gavaa noai gaveniao paauapua thaana na noai garulu vanagio. ³ Ethori thauna ailagiani nori mui ava raava muini, repana thauna mui availamui mui thai kutoumai ai, pe ia pe waregakoukou e pe mauli koukou. ⁴ Thau geku veraramani kamuvagi mui elemuiai e thauna mui avaragemuini. Thau ailiga gauavagio. Verelena avonu vagio lewana vewaunagi thaorana avanagini. ⁵ Macedoniai gave amaio thaonai, auniparamai noai gepikapikao. Namu, tharapara ia vogoai kepi garawalio gau kerunai e kali gau thaonai. ⁶ Namu Palau, moira thaorai eve vailigani evailigamaio Titus gena kwarai. ⁷ Nori Titus mo gena kwara na thai iliga garawaliao. Titus na vevagaua erawaliao mui elemuina gauna na mai thai evailiga maio. Mui gemi veawari thaguguna, venuavi, e gemi vevalavu thao thau elekuai. Pe thau averele gauagauani. ⁸ Thau geku aloalona eva veugamuio, thauna naa veva vua agiani. Auna auna thau ave olomario thau geku aloaloa na mui eole veugamuio, namu ipo velova upaupanai. ⁹ Thau evana avereleni repana nori mui govi vio gaurai, namu mui gemi venua vina mui gowala waio. Muina Palau venua vi na apuna goripathao, mui gau waua noai gova regatha repana thai pakumaiai. ¹⁰ Palau thaonai venuavi rana wala wai eveamai agiani e nama evaguguluani nori vevavuai. Alimapara venuavi rana warega eveamai agiani. ¹¹ Igo iatha, Palau thaonai venuavina na gaukamu kamu wauna peva wala mui thaomuiai. Mui iwa vagimui gemi ririwamagi thaomuiai gauna na mui eva magaimuini mui lewalewa mui. Mui iwa vagimui gemi kali, thoa rarama, ririwamagi, thaonai rova pene veole. Gau maparari thaorai mui maaumui gove ole magaio mui lewalewa mui ethoriai. ¹² Auna auna thauna mui aalo venimuio, nori kepiaualagi pakurai, pa kepiai getipurao, namu mui gemi ala nanamari thai elemai ai muina pigo ripari Palau vilanai. ¹³ Egauna thai vevailiga garawalio.Thai maaumai gemai thao vevagaua thaanai, thai gave verele gauavagini repana Titus gena verele, repana ia palauna mamilagina muina govanamao. ¹⁴ Thau mamilagiku noai geraavao ia elenai ave vaoloa agimuio. Veaina mo,gau maparari gavailamuio wara auna auna, Titus elenai gava ragemuiwai pe auna auna. ¹⁵ Gemi veauava ia elenai ipo iwa vagina maparamui gemi vegapirage evalavu thaorana, kaliai e manuarage muina govai rageao. ¹⁶ Thau avereleni repana thau geku veraramani kamuvagi mui elemuiai.