¹ Riai eve vauna auna ni neinia, Iesu Keriso ia Palau nauna,e riai amana eulamagiani ia mai melo eva walao melona mai eulamagiani. ² Palau nauna maparari raa pe ulamagi iwari, ia na aripathao tharaparana era: Palau iana aulamagiani thaonai gena rova mai pe gapirageri. ³ Palau ulamagina olemana era: ia gena rova pe roana oleri. E ia gena rova ila nori ia gagaua. ⁴ Riari, Palau elena na gewalao auri ilana, alimapara iavuna geiwani. Ewalimuna alimapara eiwao,ia gera veva aunaauna maina. ⁵ Alimapara riaina eiwathao? Eve vauna auna ni Iesu ia Palau nauna auna na. ⁶ Auna era nalu e lala iavuna thaona na eveamaio: Iesu Keriso. Ia nori nalu mo thaona na eveamaio, namu nalu e lala thaorana. ⁷ Ia gau wau oioi na geilagi magaiani: ⁸ Veaa Palauna, nalu e lala. Eila oioi wara thori koukou ai. ⁹ Pene aunilimalima na ia pige ilagi rairia, Palau eilagi raiani auna ia iavuna eiwa vaginia. Palau eva magaiani ina ina wara era, ia au ilagi lovolovona ia ewala auna ia nauna Iesu Keriso. ¹⁰ Auapua Palau nauna elenai eve vauna auna ni, ia Palau inaina na ia thaonai emiani. Pene aua nee veva auna auna ni ia Palau na eva wala, ia wapa auna, repana ia nee veva auna auna ni, Palau ilagi lovolovo na auna Iesu Keriso elenai. ¹¹ Veilagi lovolovo auna era: Palauna ia mauli vanagi vanagi eveni rao,e emauli wara ia nauna thaonai. ¹² Nauna eroana oleani auna ia elenai mauli emiao. Nauna nee roana oleani auna ia mauliai pene ve rapu. ¹³ Egau maparari paalo venimui pe, mui pigo ripa mui mauli vanagi vanagi pigo vaia-mui gemi Palau nauna tharanai gove va aunaauna ni aumui. ¹⁴ Enua gaua ia vilanai iana pagapia pe, pene ia gena ririwai penogia ia pene amonagiria. ¹⁵ Pene ia aripani ia eamonagirana, gera noginogi thaorai, ia peripa vethaleva ia gera nogi mapararai ia pene vageleria. ¹⁶ Pene aua wala avana egalamani, namu nee waregani, ia Palau elenai pene veni vuavua pe, Palauna gena mauli pene veni waia. Galama thaorai warega noai gerawalini, auri thauna ailagirana. Galama apua gauna nara warega eva walani; gaurai thau na nori galamana ailagiani Palau elenai pene veni vuavua agia. ¹⁷ Nori mauli thakwa thakwa wara galama, namu galama apua gauna nara warega nee vawalani. ¹⁸ Ia ripari, Palau elena na ewalani auna ia noai galamana. Palau elena na ewalani auna, Paluna ia eroana oleani, Satani na ia peene varaava ripa. ¹⁹ Ia ripari ia Palau elena na aveamaio,e ia ripari vethaleva ealimapara maparana ia Satani iavuna thaonai emiao. ²⁰ Namu ia ripari, Palau nauna eveamaio ia valavu ulu evenirao pe, ia aripathao ia auna auna.E maina ia, ia thaorai auna,ia nauna Iesu Keriso.Eia Palau auna auna e mauli vanagi vanagi. ²¹ Nauku kaiva kuku elerana pigo thoa gerevagi.