¹ BOLO isi TIMOTI loea IESU KELISO hauve avale ata lola DILAVA ataea BILIBIENISIoe uvale, lalaiga lo kisai ko hanaviva elo dikini dikinesi ekalesia la keneni laiga lo levaleva ko hanaviva lalai. ² Daa olalela lailoi mama DILAVA isi lailoi kosive IESU KELISO kea la huhugei la hoeaseavege lale udua ave. ³ Daa vali bahata la huhugei DILAVA hoeaseavai lalai imiliaviva. ⁴ Daa vali bahata sisilai lalai guliguliava. ⁵ Kosealelu da memila lae loi laa haivelu nonau dua ke louive, ige lake evisi kele melialoho ave kotala laa meliai uva guligulile. ⁶ Katealelu daa huhuige DILAVAu au kotou dua kele laa agigei melitisi ige au loivale kela laa kalevelivelu bele. Isito au laa agisi melitivaga IESU KELISOu dobai loi. ⁷ Dii uvu bahata laele ulu keluga daa vali baita laa huhugei lalai guliguliava, ige DILAVAu lailo dulugei. Au lovi vai damuge laa daa duluage lai lovive ke ave da memila dibulae ue solisege laa daa duluage daa kotou dua loui ata haiveva, isi da ave dibulae usege laa ketale daa duluava. ⁸ DILAVAu dibage daa louale kou leleve, IESU KELISOu au uvu lameale ke late dii uvu laele ulu. ⁹ Daa lalai guliguliai olale laa voleali sisilai vole dulugei, vole hoeaseavai udua ave. Lale katea tiluaga DILAVA avale kele lulele kitae agive. ¹⁰ Isi lale lulele kele huhuai luleleige aveve oleve keu duave, isege oleve keu toelave lale aveve dua ula aluaga IESU KELISOu loivale kela lai aveve keale nivele duai ui. ¹¹ Lale katealuaga IESU KELISO kele lai aveve keu bahataeale nenive ula DILAVAu ivi vai duatisi. ¹² Di kakoluvuia da olale huhuave abo daa vai dibulae vaeavale keu kotou dua ke bavue solilu, isito kotou dua keu ata bahata keneni bavugeitilu, kenenia nona valu. ¹³ Ige ata bukatea isi gamania ou kosivea luleleige dau IESU KELISO hauve ala age abo daa ivai dibulae vaeavalu. ¹⁴ Da dibulae ui vabu solisi ata haiveva, ige evievi ata volea abota vabue solisi meliai ata haiveva. ¹⁵ Evievi atake volea hauai dalu mainai loui avoe, loeale hauvai bolo leiviai taevei, isege volea huhui duale hauai tieviva. ¹⁶ Ata ddea dalu olai kateale ava, kosealelu abo ivage dilavala au hau ke vai damulu ige da hauve ava. Nonave loui ata haiveva ige DILAVAu koto keu leleve ula. ¹⁷ Abo dalu ola solivale ata kea abo huhui lelevele KELISOu nona loui ata haive soliva isito loui avoe bolo dibulae usege lai hauai bolo leviai ata kitae olisi, ige valivelu bolou lailolai mainai. ¹⁸ Isito keta duave da aveveabe ke evisi sisilalu volea abo uvu leleve ke ulale hauiva isege volea eve huhui selele hauiva isi abo uvu sele nona keta loui haiveva daa ke evisi sisilalu. ¹⁹ Daa huhuige daa dibulae usege laa dalu guliguliava ige IESU KELISOu munana tuvu daa duluage abole dibulale daa hanavage dale loi. ²⁰ Daa dii uvu bahatale huhuige daba IESU nona kole matiai ba hauve kalevalivelu bele, isito dale hauve kele melitavai hauve ai di aveve kele IESU KELISO ivi letatavai daa uge keu duave daa voeleige keta duave, daa olai vali bahata KELISOu ivi loui letatavagei. ²¹ Dau di uveve ke huhue solilu da uge KELISO aule dati ui daa voelege keta duave dale kele eue tai u dua ai. ²² Katealelu daa malomalo kitae alu, isoho daa uluaga KELISO lovi age lovive keule daele kitaeai. ²³ Isito daa huhui abutialu da olale voeleai IESU KELISO tii uge keu duave baua. ²⁴ Isito da vatae uluaga laa dulugei keta duave isito da voeleige oleule laa dulugei. ²⁵ Katealelu daa huhuige daba voelealivelu bele isito daleba laili ui laa dulugei ige lale lai evievile meliai ba sisilave. ²⁶ Iale vali voleo abo daa hanavage dale deiai laeloige lale totaba daa ivave IESU KELISO ivile. ²⁷ Isoho daa loivao daa loiesoliva, isito ivalivelu daa loiesolige IESU KELISOu au kotole louale ke ula ageve. Lale kateige dale ke evisi huhuige laea uvu igalile IESU hau aeviva isi kotove dua loui ata haiveva ige abo evisi evievi ata olisi. ²⁸ Isi ata volea laa agigei toelatigei kotou toela lalai louge ke vabuiavevale isito lai evievile meliai uve, ige laa agigei toelatigevale keale ke ivai huhuige DILAVAu meli lamei, laa agigeito ke agigei toelatievei. ²⁹ Lalai uvu vai IESU KELISO vileo vaeavale kelu laba lova ulalivelu bele isito lale DILAVAu isivi olavele vateu tuvu agisi tigeve. ³⁰ Da memila vateu tuvu valeke laa ivalu isitota daa aike vateutuvu vale kotala ivalu daa vateu tuvu vale ke late lale ba lata agive ave vali koletele.