¹ Gebutari embobo gupusitera embo da yaida, edo gebutari atopapasigari itoyaida gumbara. Embomai awa tumondari pitawa budo gumbara, edo bajina siroroari gae tara. Embomai awa itarikumbari etero pitawa - patawa eira. ² Jiwaebemi awamaneda tumondari pitawa awa ambo ambo ara, edo embomai amimi aro gebe awa pitawa aina. ³ Embomai ainda tumondari pitawa mi aro imo ambo ambo ata. Iji borerebe embomai ainda wasiri pitawa awa matawa itaina. ⁴ Mamo anera kotopu mane jimbo bebegae edera awa dowaede. Ata piyouri Tartarus wotoro ipatai bundedo doro isiworo katari gumundevira. [1] ⁵ Dango, butu jimbo edevira awa dowaede. Ata, Noah awa wasiri davebe gido dedegosisira, ae embomai ipada edo tote ainde daedo, ijida siroro ari dauma pisiri gupusira angode. ⁶ Edo dango nasi Sodom ae Gomorrah de awa esiri popo esiri embomai awa bega esisina, embomai jimbo wasiri era awa buro engo awamane da yaida gumaina awa gorote. ⁷ Ata lot awa, jimbo bebegae embomai mi eoro memesi tamundesisira. ⁸ Awatedo embo davebe awa, embomai ainde daedo isima edesisira, ata ainda asisi kanabudo esisira ainda be awa embo ainda buro beae eite ge beae tedesitera. ⁹ Ata siroro arida mai da yaida arapa be isira embomai wasiri davede awa toregaina, edo embomai wasiri bebegae de awa dudunu aira katari ijide. ¹⁰ Eiyawa ge be idegedevira embomai wasiri bebegae mata edeora ainda yaida. Embomai ainda gorobada petedo, embomai wasiri davede dedogaedo ededera. ¹¹ Anera mane awa goroba bajina bedera, ata embomai bebegae era awa budo mamoda katarida piae edera. ¹² Ata wo mane eiwa ta buro bebegae ango aintedo gupusitera. ¹³ Embomai awa buro bebegae ango awa ande ederi awa dave gae. Embomai awa sito toto ari. Awamane da bebegae edera ainda mina awa bara. Embomai awa dubodave iji dade tambare awa dubodave tambera ango kotembedera. Embomai awa jitari dave awa eoro bebegae edevira. Embomai awa awamane da wasiri bebegae awa eite imondemane injido kumdo eite isima edera. [2] ¹⁴ Embomai ainda jisimoka ipuda arimi inono ari, embomai awa jimbo beae edo inono aede. Embomai ami embomai neinei wasiri davebe ae era ango awa eoro awamane ambo ambo edera, ata awamaneda do awa ango arate esitera. Kinapeina eiyawa bega ari! ¹⁵ Embomai eiyawa begata dave awa dodo Beor da mai Balaam amboambo esitera, embo awa bebegae edo ainda gano budo evira. [3] ¹⁶ Ata embo ainda bebegae awa gido sisira wo donky mi opu emboda awa jigama edo tesiri ainda buro bebegae awa doturisira. ¹⁷ Embomai eiyawa gogoro ung itae edo gosi birigi tara mi budo amdevira angora. Munya awa embomai ainda sia ari isira. ¹⁸ Embomai awa ge dariga ge sitera. Embomai ami embo jipapa pisida mi jisi doritera. Embo nenei wasiri bebegae dodo adu tumai esitera awa dango jisi doritera. ¹⁹ Embomai awa awamaneda udegari pipisitera, ata embomai awa buro begae da buro ari embomaira. Embo awe buro begae edevira awa buro ainda kera ari embora. ²⁰ Embomaim awa buro bebegae dodo adutumbara ata tekago buro bebegae ara gido buro bebegae gisi edera awa tegada ata amboda awa badari edo beae be awa ara. ²¹ Davebe aesira awa embomai awa itari dave tambari da ge awa gido dodo wareregedo aimbaetera. ²² Embomai einda yaida ge eiyawa gebe berarira:" Sino bero tugedo dodo amdo tekago oweregedo injidevira, edo pu kain edo tekago debuda amdevira."