¹ Eto Jangu Indari iji puvuto irae enu, Mary Magdala pamone eto Mary James ta e, eto Salome na pehari hoga mune ari sivo avo koro na ombuto umbua, Iesu ta hoga ta hoga ta ikaro te ijie ea. ² Eto Sunday iho be te, iji eha vivihunu, enana use ta pambua. ³ Enana na ke mine ara ijie einge ea, " Amina use ta peikari koro peni, amo jigou ahone ta pambau?" ⁴ Rate enana tihi ikeo pambuna, avo koro amo mahu jigari ahone ta pambuto mihinu kia, eto amo peni wahai be ra. ⁵ Enana na use panga jo ta horeto, singa wahai ombari usasa te avo avo ingeni be ta arumbeto mihinu kia, eto enana tututu ea. ⁶ Amina enana ta degi ke einge ena, "Mane oju aisova. Iesu Najareth embo, i atahu ta teo pehena avo jombure ove te. Amo mahu erehija. Amo ei ta irae ra. Avo ikehere serekehija besi avo kivu. ⁷ Rate pambuvu, amita ambotani eto Peter evu ingore, amo kihi Galilee pambuha, ungo enu ingihava ainge. ⁸ Enana araha ta puvuto use toto uhuveto pambua; ando tata tata ue pejaja ea. Enana ke mine ara embo nei ta ae toa amita be avo ungo oju ea. ⁹ Sunday iho be te, amo erena amita ambota, amina kihi Mary, Magdala pamone amita ahihi sasapura 7 ainge kurumbenu arahata puvuna, avo hena puvunu kina. ¹⁰ Eto amina pambuto ambotani nei nei enu ingia, sipuri ue osaga kogue mihia amita jota. ¹¹ Enana eo ingia amo mahu erena ainge pamone emina kina, rate enana kembe ae ea. ¹² Amita ambota amo hajire nei ai ta enana heriso ta puvuna,enana degi peni ai pahuo. ¹³ Enana na pambuto ambotani tapa avo eo ingia, rate enana kembe ae ea. ¹⁴ Iji amita ambota, Iesu na ambotani 11 avo indari indesi arumbiho enana ta degi puvuna, eto enana isembena enana ta ke be ae ari eto jo jainha be, amita be avo ami ta pehari ta erena avo ke be ae ea avoeto. ¹⁵ Amina enana ta degi ke einge ena, "Enda tapa ta pambuvujo, Duru Ke Be evi evujo enda tapa ingore. ¹⁶ Amuna ke be ue eto bapataito aisuja amo kojari umbasuja, eto amuna ke be ai aisuja amo kasari hetasuja. ¹⁷ Eto hajire erevi ke be ari ereve kebe ari embo ta degi puresuja: Nau javo ta enana na ahihi sasapura kurumbasora. Enana na ke tunga nei nei eha amina aisora. ¹⁸ Eto enana na o koso o avo avo ingeni na jigesora eto umo sapura pehari umbuto puvuja avo indesora amina mane ahumbari umbuto puresuja. Enana na ambure embo ta hoga ta ingeni tembihe penunu aisora amo kojari umbasora. ¹⁹ Bada na ke enana ta degi enu erae enu amita ambota,Amo uhu ita umbuto vihina eto God ta ingeni be aita arumbena. ²⁰ Ambotanina na ereto deki tapata pambuhe,duru kebe evi hande ea,eto Bada enana ga vahiketo pure ena teo ke do ena avo hajire neite neite amina harikena.