¹ Iesu na degi avo toto, eto enda Judea amita ugoro ta pambuna, eto degi Jordan ovitiho aita pambuto mihinu embomeni isapamane be avo hena ehako puvua. Amina enana ehako ahepoekena amita be amo amita ari ainge euja avoembo. ² Avoeto pharisee embomeni na avo hena puvuto avo etokiari ta ikihe eto ingari ea, "Eto embo na amita jimbari pamone avo toasuja amita ke avotari amo avorete?" ³ Amina ke mine ena, "Moses na ke mo do ara enu?" ⁴ Enana na einge ea, "Moses na avora ari ikihe embo amina jimbari poekari ta ahari avo kaeto avo evohu amo ikau pambasuja." ⁵ "Amita be amo ungotapa ta jo amo gainha be avoeto ke avotari amo kajena," Iesu na enana hena ke einge ena. ⁶ "Rate iji kihi be kihita donda tapa irerembena iji te, "God na enana ove ena embo eto pamone. ⁷ 'Aravo eto embo na amita mama eto aja avo toto eto amita ae ga kaju aisuja, ⁸ eto heriso rate visi wahai aisora.' Avoeto enana kihi heriso avo mane ra, rate visi wahai ra. ⁹ Avoeto God na umbuto wahaita kaju ejija, embo amuna mane kahekasuja. ¹⁰ Ainge eto enana bande ta horeto mihio ambotani na ehako ke wahai avo eto ingari ea. ¹¹ Amina enana ta degi ke einge ena, "Embo amuna amita pamone jimbuna avo toruhe eto pamone nei jimbasuja amo tiha paiha ke avotari avo poekehija. ¹² Eto ainge pamone na amita ivu avo toto embo nei jimbasuja, amo tiha paiha ke avotari na eria avo poekasuja. ¹³ Eto embo meni na meni undi umbuto Iesu ta degi puvuho avo Iesu ta ambotane na ere to ohimbea. ¹⁴ Aenge eo Iesu na kito,tumo eto ambotane isembena eto einge ena tovujo meni isasaharo nau degi puvurore ungona mane peikasova eto Bada ta hotari amo embo amina meni isapa sira asuja amina horasuja. ¹⁵ Na ke be ungota degi erena,ambo meni isaharo ainge eto na humota eora ainge ko aisuja amo Bada ta degi mane pambasuja. ¹⁶ Meni isasaharo ohimbeto umbuto ingeni na ohoru ta tembeto javotoho ari ikena. ¹⁷ Eto Iesu enda neita pambasi unu,embo na kito tutuveto puvuto paunge teteri eto ke einge ea,ahepoekari embo javoto na ari do eto irari daroho umbano.? ¹⁸ Iesu na ke ena,''do avo embo na javotoho ke ere''?embo tapa amo javotoho manera,God wahai avo javo tohora. ¹⁹ Eto ke pepeni amo umo kiari ra ,mane tao pehasuja ,mane tiha aisoa,pegene mane aisoa,embo neina ke be aro au ingito avo mane jandiriketo sokova aisoa,eto mama te aja te otohu ejo. ²⁰ Avora te, na kihita meni singa ta mihahena amo ke tapa emo, amo ambo ambo ue na ahepoekari embo. ²¹ Iesu na embo avo kouge tunga javotoho ue ke einge ena vasiri wahai avo ae tohea,avo eto no hajavaja tapa amina ombuto umbuto osaga embomeni ta ikejo,eto Bada ta irari degi ta no donda isapamane mihia avo horeto umbasoa. ²² Embo amina ke avo ingito tohota hajavaja indoko avo hotembihe osaga kogue pambuna. ²³ Iesu na overe keto ambotane kogue ke einge ena, hajavaja embo na daingeto Bada ta degi horau, amo gainha be ra, ainge iji haja. ²⁴ Ambotane na ke avo ingito mana mana uo Iesu na ke ehako einge ena, nau meni undi, Bada ta degi horari re gainha be ra. ²⁵ Eto o Camel na poma ho ta horeto pambari haite manera, ainge ko haja vaja embo na Bada ta degi aita horari amo gainha be ra. ²⁶ Ambotane na ke ainge mahu ingae avoeto embo amina nau ari sapura oreke to umbasuja ainge ea. ²⁷ Iesu na ambotane poeto kito ke einge ena, embo ga amo ari inono ae ra God ta degi ta amo donda tapa ari inono ra. ²⁸ Peter na einge ena, dago haja vaja toto avo umo ambo ere ora aenge ena. ²⁹ Iesu na ke einge ena, na ungota handa ke be ere ona embo amina nau ke ta javota orope tohija na ambo ue puvuha amo iji ambota hotari umbasuja. ³⁰ Embo na mane ehako hundred ainge enda eita mane umbasuja. ³¹ Avoeto, embo meni amina kihi euja amo ambo aisoja. ³² Iesu na ambotane tihi jigito degi Jerusalem vivihinu ambotane mana mana ue jopapa uo, Iesu na ambotane ta handa pure derami amita handa puresuja avo enu ingia. ³³ Ke evi ingivu jo, degi Jerusalem pambaso ra aita embo ta meni avo priest pepeni te Judea ta ke pepeni embopo ta ingeni ta ikau umbuto pambuto eto taro amburoja umbuto da Rome embo ta ingenita ikasora. ³⁴ Aro Rome embo na taro pehaja ue, amo Embo ta Meni ta handa amo urumbihe hamo ta isuva ue tasora aro peheto iji three amita ambota erasuja. ³⁵ Zebedee ta meni heriso James te John te na hotembea eto ahe poekari embo dago do asi uje ere ora avo inena ao arote ainge eo. ³⁶ Iesu na einge ena,'' do ana uje ue ereve''? ³⁷ James te John tena einge ea, umo heteto tihi jigari ijite ao dago nei ingeni anga ta eto ingeni be ta urumbeto embomeni simba ahere te. ³⁸ Ainge eo , Iesu na ena, ungo eto ingari ke erea amo umokiara, avo eto na anguhu ta indesona amo ungo indari haite re. eto deina bapataito aisona amo ungo amina bapataito ari haitere, amita ke be amo na amburesi ue memega keisona amo ungo memega kiovo te? ³⁹ Enane na ea, nango arihaite ra, enu Iesu na ena, na anguhu deita indesona amo ungo ai indesoa eto dai bapataito aisona amo ai bapataito aisova. ⁴⁰ Eto embo amina nau ingeni anga ta eto be ta irari amo mane ikasona te amo mahu God na sirikari ra. ⁴¹ Ambotane nei na ainge amina ingito James te John te ta handa jo memega ue ra. ⁴² Eto Iesu na ambotane ta handa einge ena, ungo kogova amo enda nei embomenina embo pepeni eto tihi jigihere embo meni ta degi osaga ikagora. ⁴³ Ambo to ungo ainge mane aisova, eto embo amina eita tihi jigari aisi uje aisuja amo ungota pure ari embo aisuja. ⁴⁴ Eto embo amina ungo na tihi jigari uje aisuja amina ungo tapata ke agoi aisuja. ⁴⁵ Eto embo ta meni na embo pajire angeko tihi jigesi puraera te amita vasiri na embomeni ta ari sasapura avoembo tapa toreketo umbasi puvu na. ⁴⁶ Ere puvuhume da Jerico jota puvuto, Iesu te ambotane te aenge to puvuhore embo menina na kesi ambota puvu a, eto Timeas ta meni Bartimaeus nta tihi sapura eto karu embo amina embere titi ta arumbeto mihia. ⁴⁷ Avo Nazaret ta Iesu amita purari duru umbuto jajage eto ke einge ena Iesu David ta Meni na jo e. ⁴⁸ Enu embo menina mane jage aja uje ue ra, ehere ahako vasirina ahembe eto ea, David ta meni na jo e. ⁴⁹ Enu Iesu na ingito heteto avo einge ena, embo tihi sapura avo evu puvuroi eo ambotane na ehere ingito puvua. ⁵⁰ Iesu napuroja enu, tohota hogata ombari avo houketo iketo avo erito Iesu ta degi puvuna. ⁵¹ Iesu na einge ea, do ana uje ue ere, amina einge ena ahe poekari embo nau tihi re javotoho au kione. ⁵² Enu iesu na amita degi ke einge ena, ''Umo na humota ere oa avo no tihi javotoho ehija avo eto degi kogue pambujo,'' ainge enu tihi hirikenu, Iesu ta ambo ta pambuna.