¹ Emore Iesu Keriso God ta meni, amita duru peni amita ihikari ra. ² Ke mahu peroveta Isisah na kajari ra, ''kivu, Nanena nau duru hande ari embo ikehene tombu vuju no ta ere pahua, amina no embo sija aisuja. ³ Duru ikari embo na jajage ojagatambuta eria ingavu, 'Bada ta purari ta embere sirikevujo; amita embere evu tambu ai.''' ⁴ John puvuna, ojaga tambuta bapataito ue ari sapura janderekari ta duru avo hande ena ⁵ Judea enda tapa eto da Jerusalem amita embomeni tapa avo pahuera enana ta sapura vujekasi. Eto umo jorden jota eto enana tapa avo bapataito uera. ⁶ John ta asukare amo o camel ta hoga amina arira eto ainge uhu ta pupuri amo ainge o ta hogara eto amita indari amo iruha te o boruga tera. ⁷ Amina jajage ena embo nau ambota pupuha amita sovera amina nau amo dembarira, eto ainge nanena amita utu goru ta esi avo sijekari haite manera, ⁸ Nanena ungo avo umo na bapaito ehena, te embo amina amo Ahihi Otohu na bapataito asuja. ⁹ Iji amikote iesu da Nazareth, Galilee hena avo toto puvunu eto amo Jorden umo aita John na bapataito ena. ¹⁰ Eto Iesu umo huta eto vivihinu, uhupe hirikena eto ahihi otohu di dipo ainge eto avohena vena. ¹¹ Eto jage wahai uhu ita puvuna, Umo nau tungaumbari meni bera. Na umo osa be ereona. ¹² Ainge uve ahihi na tihi jigito umbuto degi ojagatambuta aita pambuna. ¹³ Amo iji 40 ainge degi ojagatambu ta mihinu , satan na etokiari ta ikena. Amo o pepeni ando ae amiga mihinu anera na simba ea. ¹⁴ Eto John kasari ta ikea amikote, Iesu ta Galilee puvuto God ta duru pepeni avo ijihaja, ¹⁵ einge ena,''Iji do ari avo puvuto araha ehija eto God ta hotari ahumpa ere ua jo haperekihe, duru moha be avo kebe evujo. ¹⁶ Eto Galilee eva ahone ta hae ue, amina Simon te, Simon ta name Andrew te eva ta monga gosikiho kina, amita be avo enana amo eva o timbari embopo ra. ¹⁷ Iesu na enana ta degi ena, ''have, na ambo ururovo nane ano embo timbari embopo ave.'' ¹⁸ Eto enana sau be monga toruhe avo ambo ea. ¹⁹ Eto Iesu hae eto isapa ie, James Zebedee ta meni te, amita namei Andrew avo kogaja ; enana amo enga jo ta monga ihirihe mihia. ²⁰ Amina enna jage enu, enana ta mamo Zebedee, pure embo oru ea amiga toto avo ambo ea. ²¹ Eto enana Capernaun puvua, eto Janguindari ijite, Iesu na Jakeka bande aita pambuto ahepoekena. ²² Enana amo amita ahepoekari avo ingito ke irae uera, amita be avo amita ahepoekari avo embo tihijigari ta sovera ikari na eora ainge mane. ²³ Ainge unu embo wahai Jakeka ari ta bande jota amina ahihi sapura te amina ue segigi ijie, ²⁴ Ena,dago umo hena do aro kio, Iesu Nazareth embo? Umo dago teterekasi puve te? Umo amunure amo mahu kogona. Umo re God otohu eto puvuha. ²⁵ Iesu na ahihi sapura avo peikihe einge ena, ''Ke toto embo evi toto arahata puvura. ²⁶ Ainge enu ahihi sapura amina umbuto gosikenu vovunu, embo avo toto arahata puvuhe gagahe pajire ena. ²⁷ Embo tapa be ke irae ue, mine ara embo etoingia, '' Embo emo deire? Ahepoekari eha soverate? Amina ahihi sasapura ke gainha ikehei avo ambo ore!" ²⁸ Eto amita duru na sau be Galilee ta degi tapa aita pajire ena. ²⁹ Eto jakeka ari bande toto araha ta puvuto ,enana Simon te Andrew teta bande ta James te John te ga wahaita pambua. ³⁰ Simon ta imbohi avo ambure ue mihinu, Iesu eo ingina. ³¹ Ainge eo puvuto amita ingeni ta jiginu erena, eto amita ambure irae enu, enana simba ena. ³² Hure wahai amikote, iji vovunu, enana avo hena embomeni ambure neiteneite, eto ahihi sasapura na orembari avo umbuto puvua. ³³ Da pajire amita embomeni tapa amo keisi orope ta puvua. ³⁴ Amina ambure embomeni korere hajire neiteneite avo enu kokojekea eto ahihi sasapura na pundurari amo kurumbenu arahata pahue mane ke ara peikena amita be amo deire amo enana mahu kiarira. ³⁵ Amina ihobete ereto, iho ungate pambuna, degi jamojamo aita pambuto pari ena. ³⁶ Simon eto nameikamei avo ambo uera amite avo jombure uera, ³⁷ Enana na awo hambuto ke einge ea, ''Embo meni tapa umo jombure ereora.'' ³⁸ Amina ijija, ungote tapa degi nei ta pambare, da engihi ta mihera ai pambavo duru hande ane. ³⁹ Aravo ijie na re puvuhana. Avoeto degi Galilee ai pahue, Jakekari bande ta duru hande ue, ahihi sasapura kurumbena. ⁴⁰ Kinise umbari embo wahai amina avo hena puvuna. Amina avo etoingari kaiketo ijie,Humotepai ue avo hena etoingari ena,'' Emo no ujebe kito amo na au hoga to javotoho aisona.'' ⁴¹ Amita jo jojoga ari orembehei, Iesu na igeni jujurikihe avo hame ue ke einge ena, ''Na aravora ona. Hoga ta javotoho ari umbujo.'' ⁴² Iji wahai kinise amita hogat ta avo pambuna eto amo hoga ta javotoho umbuna. ⁴³ Iesu na ke gainha ikenu umbuhunu, enu pambuna, ⁴⁴ Avohena ke einge ena, '' dodo kea evi mane embo neinei mane ao ingosora, rate pambujo , priest na umo kioi ,eto God ombari avo ikihe Moses na ke avotari ikena avo javotoho umbeva avo eto.'' ⁴⁵ Rate amina embomeni tapa enu ingihara , eto degitapata duru hande ea, eto Iesu na ea da tapa ta teho horari haite mane ena. avoeto amo degi teho ai ta mihio embomeni tapa na avo keisi degi neite neite aita eto puvuhera.