¹ Hambaru jo ta ke avire akari iji ambota amita keika ra, tota pe avomane ra. Mama ta athe ai pambora avire Mama ta pure embo ami samuna vujekari ta ara-ira jua petapataora ami kosari re mane humbatora. ² Amita pe re, endata samuna vujekari ira-ara amomo toae ehere? Mama thamotha ari embopo amita sasamuna avire maha tufari ra, avo eto othembari ai re mane mehetuja. ³ Rate endata samuna vujekari ai re sasamuna avire othembari ami jua tapa tapa mihirou pambatora. ⁴ O bull eto goat amita sasa-a ami sasamuna avire mane tofatuja. ⁵ Amita tho ai, Mama ta meni enda ai vuvuto avo, ke evi ena," Samuna vujekari ta ira-ara amite overe hijeri avo uje nio mane, rate ando avo hijei ufana; ⁶ samuna fukari evekari amita overe amite, samuna othembeto toari ta overe nimo hana ina ae. ⁷ Thoro engato ena, ' Kijo, namore imara unga ta kikiva kajari ai namo ke re hijeri thorari ra, nio uje pe avo ana ue, Mama ithareta.'" ⁸ Ke ithare ta avo ena, "Samuna vujekari ta ira-ara, eto overe, samuna fukari evekari, eto samuna vujekari ta overe avo nimo uje ae. Angato nango nimo hanaina ae." Amita pe avo enda ta ke ta hambaru jo tara. ⁹ Thoro ena, "Koa, namore imara, nio uje avo ati". Ara ira kithita avo humbuto afimbeto ambota avo hijou ukaja ue. ¹⁰ Amita uje nangore kuvinekeija, Jesu ta ando iji tapa pe hijoaja ami. ¹¹ Eto ke pe, Mama ta pure embo ami re ivito-ereto pure tofota re atuja Mama ithareta amitae. Samuna vujekari ta pure avire thoro thoro atuja te sasamuna avire mane humbuto afimbatuja. ¹² Rate Bada mi iji tapa pe ami ira-ara ena ami petapata afurukena, ejo Mama ta ingere pe ai arumbena. ¹³ Avo ena iji te, kuma ue amiha tofota kitofo avo au theki jauka ara ue. ¹⁴ Tofota ando avo hijina ami avo kosari ufora avo natofo ta akari meheri ta. ¹⁵ Eto ahihi otofu ami nangotae kuthuja. ¹⁶ Ithikari ta evi ena, "Nau jo komo ta avo harikatona, iji ambo ai, Mama mi ija. Nau ke pirisa avo jo totofota ai kajatona. Eto siro-musu totofota ai kajatona." ¹⁷ Amita ambo ai, "Totofota sasamuna te vasiri enite-kanite avo othembeto toano mihae atuja." ¹⁸ Eha othembeto toari amiha ai re, samuna vujekari ta ira-ara avire mihae ra. ¹⁹ Avo eto, nau nanimone, thuriato uketo Mama otofu pe ta ansa ai thorare Jesu ta sasa-a ta ivo ami. ²⁰ Ando visi tofota ami po eto afurekari avo humbuto afimburaja, reki eha te natofo meheri ta. ²¹ Amita pe avo tofo avo Mama ta pure embo amita siro ra mamota oro ai nangota javo ai, ²² ningote thorare jo kepe ari kao thamotha ari ta jo ai, eto nangota jo komo avo ekesekau, othembari sasamuna ta nangota ando-ufu avo umo akari pe ai kuthatora. ²³ Kuthureri ambota avo ufaha uja avo mane toati ora te jikito thuriatora, amita tho re God tofota jo ta unsukari avo ufaha aja avire thomotha embo ra. ²⁴ Enso-hoi avo hondate atora, jingato aro tunga humbari eto vasiri akakari ai mehetora. ²⁵ Pe ufo ta ari angato, tapata eto thurukari avo mane toati ora te, eto mine-inga ue ivo humbare, iji vuvuto use uja avo fuketo kove. ²⁶ Ke pe avo kera avo toto ondesa ue sasamuna ta jo ai meheto ra avire sasamuna kuvinekari ta ira-ara avire wuthi atuja. ²⁷ Rate ningote fuketo kore, meme oferekari amite i vevereami God ta kitofo avo evi atuja. ²⁸ Moses ta ke kuina ari embopo avire ethotho o ethotapa ami harikaro jo ari kao mane ambureti ora. ²⁹ Avo eto, God ta meni avo jauketo samuna ora embo amomo meme mo theka jei humbau eto tofota sasa-a ta re samunasira atuja sasa-a ami kuvinekuruja ami overeketo humbari ta ahihi amomo torato me keri mo hijei? ³⁰ Eto nangore kora avo ke aja avire," Meme mine hijeri avo naura; mine tavisekatona." Thoro ena, " Bada mi embo meni tofota avo sirikatuja." ³¹ God ta ingere ai vari avo joru atora. ³² Eto othembejo, ejefa ari humbae kithi ta meheri povu safufu amita jo ai vuvaha. ³³ Iji eni ami ningo humbuto unuba te meme ufai hijoara, angato nongo ningo avo meme ufara embopo amikao hondate eto ufava. ³⁴ Avo samuna mi pundureri amehera avo eto jothafava, eto imbu-fambu ningota avo ufore, ningore hanaina avo kaiva. Amita pe avo, ningo avo vorereto kiava imbu-fambu akakari eto natofota avo humbatova. ³⁵ Avo eto ningota ke pe ari avo mane toati ore, amita mine overekari avo pemi aise are. ³⁶ God ta uje avo ehena avo eto kuma uve mihirovo ke harikuraja avo hijou humbave ³⁷ "Iji topota amita jo ai, vuvuroja uve ari avire enda ta ambu vuvuretuja. ³⁸ Rate avo nau akari ta jo ai amiha avire tofota thomota ari ai aithe re atuja, thomota ari avo toatuja kito nau ahihi embo ami re hanaina mane atuja." ³⁹ Rate nangore thomotha ari avo toto samuna thambari embo-meni mane ra. Ajireketo nangore thomotha ari mi ahihi embo jo ta avo orereto kuma ari embo-menira.