¹ Ekalesia oreana Epeso ai ena aneru ini ba tore henia toma: Hisiu hituosi imana idibana ai e dogo taomu bona gold lamepadia auhituosi, bogaradiai e loa tauna ena hereva bini: ² "Mai dibagu emu gaukara bona emu hededegwa bona emu haheauka, bona karadika taudia o dadaraidiamu. ³ Dibagu oi na o haheaukamu, o hisihisimu badina lau ladagu dainai bona so hesikumu. ⁴ To inana na lodulai henimumu emu lalokau gunana vada o rakatania. ⁵ Ba laloa vada o morutania gabunai. Ba helalokerehai emu gaukara gunadia ma ba kara. Bema lasi, lau na baina vasi bona emu lamepa gabuna amo baina abia oho - bema oi basio helalokerehaimu neganai. ⁶ A emu sina bina: Nikolaita taudia edia gaukara o inai henimu, lau ese danu na inai-amu. ⁷ Mai taiana tauna ese Lauma ena hereva ekalesia oreana ediai baine kamonai. Kwalimu tauna lau ese maoro baine henia mauri auna amo huahua na baine ania, Dirava ena paradaiso lalonai. ⁸ Ekalesia oreana Semurana ai ena aneru ini ba torea henia toma: Gini-gunana bona gini-gabena, e mase bona ma e mauri lou, tauna ena hereva bini: ⁹ "Mai dibagu emu hisihisi bona emu ogogami (A oi na taga taumu), bona ere dika taudia sibodia Iuda taudiai e hahelaomu, to idia na lasi. A, idia na Satani ena dubu taudia. ¹⁰ Bavabi hisidia na garidia basio gari. Aitaia! Diabolo na e hegaegaemu umui haida dibura rumanai baine koumui bena baine dibaganimui, bona ba hisihisi dina gwauta. Ba heabidadama ela bona mase, bena mauri ena kwara-havava baina henimu. ¹¹ Mai taiana tauna ese Lauma ena hereva ekalesia oreana ediai baine kamonai. Kwalimu tauna na mase iharuana ese basine hadikaia. ¹² Ekalesia oreana Peregamo ai ena aneru ini ba tore henia toma: Dare kahana kahana e abia tauna ena hereva bini: ¹³ "Emu noho gabuna na dibagu, ena terona na eneseniai. Dounu oi ese lau ladagu ba hekamo tarika-tarika bona o abidadama henigumu, egu hereva e gwaurai hedinaraiva mai momokanina tauna, Antipa bogaragimui ai, e alaia mase, Satani ena noho gabunai. ¹⁴ A gau ta ta na lodulai henimumu: bogaragimui ai haida ese Balaam ena hahediba herevadia e badinamu, una tau ese Balak e hadibaia bena hekwakwanai gauna ta Isaraela taudia, edia dala ai etoa bena idia ese kaivakuku iboulaina vamudia e aniva bona e heuda hanaiva. ¹⁵ Haida danu dekemui ai ese Nikolaita taudia edia hahediba herevadia eabi dae. ¹⁶ A helalokerehai! bema lasi, baina vasi haraga dekemui, udugu darena amo baina tuari henidia. ¹⁷ Mai taiana tauna ese Lauma ena hereva ekalesia oreana ediai baine kamonai. Kwalimu tauna na mana e hunia gauna, baina henia bona nadi kurokurona ta baina henia una nadi ai lada matamatana ta e hetore, ta asi dibana herevana a iabina tauna sibona mai dibana. ¹⁸ Ekalesia oreana Tuatira ai ena aneru ini ba tore henia toma: Dirava Natuna, matana na lahi hururu-huruna na heto bona aena na auri labora-labora e kimore-kimoremu na heto, ena hereva bini: ¹⁹ Mai dibagu emu gaukara, emu lalokau, emu abidadama, emu heduru bona emu haheauka. Emu kara gabe dia ese emu kara gunadia danu e hereamu. ²⁰ To inana na lodulai henimumu: Asio gwaua tubumu hahinena Iesabel, sibona peroveta hahinena ai e hahelaomu. Egu hesiai taudia e hadibadia kereremu bona e hakaudia kereremu bona kaivakuku iboulaidia vamudia e animu bona e heuda hanaimu. ²¹ Lau na ena nega vada na heni baine helalokerehai, a ena lebulebu karadia irakatanidia seuramu. ²² Aitaia! Lau ese gorere patana ta ai baina tahoa kau, bona ia idia e heuda hanaimu taudia basie helalokerehai negana ai idia danu baina hahisihisidia bada. ²³ Lau ese natuna danu baina aladia mase, bena ekalesia oreadia iboudiai na bae diba lau na taunimanima edia lalohadai bona lalodia (kudoudia) na tahumu, bona umui danu ta ta davamui baine henimui ta ta ena kara, ena kara hegeregeredia ai. ²⁴ A umui hahidaosi Tuatira ai unu hahediba herevadia asio abidae, bona Satani ena dobu gabudia asi dibamui taumui - emu ai na tomu, 'Lau ese maduna idauna ta pagamui ai basina atoa kau.' ²⁵ A vada oabia gauna ba kahua tao tarika-tarika ela bona lau baina vasi. ²⁶ Kwalimu tauna egu kara baine badina ela bona dokona tauna na siahu baina henia. Ia ese tanobada besena baine lohiadia, ²⁷ auri itotohina amo baine regudia. Uro e huari kohikohimu na heto ia ese baine huaridia. Lau danu siahu unuhetomana Tamagu ena amo vada na abia. ²⁸ Bona hisiu bada danu baina henia. ²⁹ Mai taiana tauna ese Lauma ena hereva ekalesia oreadia ediai baine kamonaia.