¹ Iesu Keriso iha-hedinaraina herevana, Dirava ese e henia asi vanahana bae vara gaudia na ena hesiai taudia baine hamaorolaidia. Bena ena aneru e siaia ena hesiai tauna Ioane e haheitalaia. ² Ioane ese Dirava ena hereva bona Iesu Keriso ena hereva bona e ita gaudia iboudia ai e gwaurai hedinarai. ³ Ini peroveta herevadia baine duahi tauna baine namo, bona bae kamonai taudia danu bae namo bona ina buka ai e tore herevadia bae badina taudia danu bae namo badina be ini gau iboudia ai be varamu negana vada eme kahikahi. ⁴ Lau Ioane, ekalesia oreadia hituosi Asia ai: Harihari bada bona maino bavabi e nohomu, e nohova, bona baine noho, bona ena terona vairana ai e ginimu laumadia hahituosi edia amo, ⁵ bona Iesu Keriso ena amo, ia na gwau maoro tauna namona, bona tore-isi lou roboana mase amo, bona tanobada pavapava dia biagudia. E ura henidamu eda karadika na rarana amo e huri oho tauna. ⁶ Ia ese basileia ta e karaia ena hahelaga tauda ai e halaoda Dirava bona Tamada ena hairai bona siahu bae mia ela bona hanaihanai. Amen. ⁷ A itaia, ia na ori amo be maimu, mata iboudiai ese bae itaia e gwadaia taudia danu bae itaia. Tanobada bese iboudiai ese ia dainai bae tai. Momokani, Amen. ⁸ Lohiabada Dirava na e tomamu (e gwaumu) "Lau na Matamana bona Dokona," Ia na e nohomu, e nohova, bona do baine noho, siahu idoinai Diravana. ⁹ Lau, Ioane umui tadikakamui hisi-ani ai bona basileia ai bona haheauka ai, Iesu bagunai, motumotu ta ladana Patimo ai na nohova, Dirava ena hereva bona Iesu ena hereva e gwaurai hedinaraiva daidiai. ¹⁰ Bena Lohiabada ena dina ai Lauma ese e rohegu bena murigu ai gado badana ta, kibi regena na heto, na kamonai; ¹¹ eto, ini ome ita gaudia na buka ai ba tore ekalesia oreadia hituosi dekedia basiai lao, ekalesia dia bini. Efeso, Semurana, Peregamo, Tuatira, Filadelfia, Laodikea. ¹² Bena na gini kerehai, e hereva henigu tauna baina itaia nato. Bena gold lamepadia hahitu na ita, ¹³ lamepa bogaragidiai ta e gini, e kara taunimanima natuna na heto, ena dabua na lata, ela bona aena, kemena na gold torana e gegea. ¹⁴ Kwarana bona huina na kuroka-kuroka, mamoe huina na heto, eiava snow na heto. Matana na lahi na heto. ¹⁵ Aena na auri labora-labora e kimore-kimore na heto, lahi ai e havevea gauna negana ai gadona na sinavai momo regedia na heto. ¹⁶ Imana idibana ai hisiu hitu e abi. Dare ta kahana-kahana mai ganodia gauna, uduna amo e lasi. Vairana na dina e tara na heto. ¹⁷ Ia na itaia, bena aena badinai na goru diho e kara na mase na heto. A ia ese imana idibana taugu ai e dau kau, eto,"Asio gari. Launa matamana bona dokona, ¹⁸ bona mauri tauna lau, na mase, to a itaia, na maurimu bona baina mauri hanaihanai! Mase key na bona mase taudia edia gabu key na na imagu ai. ¹⁹ Una dainai, ome ita gaudia ba tore, bona e maimu gaudia bona do bae vara gaudia bini. ²⁰ Hisiu hitu imagu idibana ai o itamu, bona gold lamepadia: Hisiu hituosi na ekalesia hituosi edia aneru, bona lamepa hituosi na ekalesia oreadia hituosi.