¹ Bena siriho ta vada e henigu baina gaukaralaia hahetoa auna na heto. Vada e hamaorogu, eto, "Atore-isi bona Dirava ena dubu bona pata helagana, ba hahetoadia bona lalonai e tomadihomu taudia ba hagaudia. ² A dubu murimurina na basio hahetoaia, badina ina na Bese idaudia taudia vada e henidia. Idia ese hanua helagana na hua hariahui-rua do bae moimoilaia. ³ Bona lau ese egu hereva igwauraina taudia raruosi siahu baina henidia, bona idia edia puse dabuadia e hahedokilaidia amo dina daha-ta sinahu-rua tauratoi-ahui do bae peroveta." ⁴ Ini na olive audia rua bona lamepa rua e atodia kaumu tanobada lohiana vairanai e ginimu. ⁵ Bema ta ese ihadikadia urana baine ura, lahi ududia amo bae lasi bona e inai henidiamu taudia do bae hamasedia. Bena ta e uramu baine hadikadia, ia na ini do baine mase toma. ⁶ Idia na mai edia maoro guba bae koua unu amo medu na basine diho idia edia peroveta dinadia ai. Idia na mai edia siahu ranu bae girodia rara ai baela bona tanobada ai dika gaudia idauidau bae havara edia ura negadiai. ⁷ Edia gwaurai lasi herevadia (haroro) vada bae guguru neganai, dagedage manuna guri dobu masemasena amo e daemu ese baine tuari henidia. Ia ese baine tuari henidia bona baine hadareredia bona baine aladia mase. ⁸ Idia tauanidia badina na hanua badana dalana ai bae mia (anina na Sodoma bona Aikupito toadia) unuseni ai danu edia Lohiabada vada e hasatauroa. ⁹ Badina dina toi mai dina kahana taunimanima haida taunimanima idauidau amo, iduhu idauidau amo, gado idauidau amo, bese idauidau amo ese tauanidia do bae itadia, bona gara ai iguridia do bae laodia-ahu. ¹⁰ Bona tanobada ai e nohomu taudia ese bae moale laidia bona bae hisidae. Idia ese harihari gaudia ta ta bae siai henidia badina be ini peroveta taudia raruosi ese tanobada ai e nohova e hahisihisidiava. ¹¹ A dina toi mai dina kahana ai Dirava ena mauri hodahodana ediai do baine vareai, bona idia na aedia ai do bae ginitore, bona bae itadia taudia na gari badaherea ese bae butudia tao. ¹² Bena idia ese gado badana ta guba amo e kamonai e hamaorodia, eto, "Ini a dae mai!" bena idia na ori amo bae dae guba lalonai, inaidia taudia ese e itadiava lalonai. ¹³ Una hora lalonai tano-laga (heude-heude) badana ta baine vara, bona hanua badadia gwauta-osi amo kaha-ta na baine kohu. Taunimanima daha hitu tano laga (heude-heude) ese baine aladia, bona bae mauri taudia na do bae gari dikadika bona guba Diravana do bae heatolaia. ¹⁴ Dikadika iharuana vada eore. Aitaia! dikadika ihatoina na emai haragamu. ¹⁵ Bena aneru ihahituna ese ena kibi vada e hiriria, bona gado badadia guba amo e hereva, eto, "Tanobada basileiana na vada eda Lohiabada bona ena Keriso ena basileia ai vada eme lao bona ia na do baine lohia ela hanai hanai." ¹⁶ Bena taunimanima badadia ruahui-hani Dirava vairanai edia terona ai e helaimu taudia, vada e goru-diho bona Dirava e tomadiho henia. ¹⁷ Idia vada eto, "Emai tanikiu a henimumu, Lohiabada siahu bada Diravana, o nohomu, o nohova, badina be oi ese emu siahu bada hereana vada oabia bona vada o lohiamu. ¹⁸ Bese idau-idau taudia vada e badu, a oi emu badu na vada e kau, bona mase taudia ihahemaoro henidia negana, bona emu hesiai taudia, peroveta bona helaga taudia, davadia ihenidia, bona unu oi ladamu garina e garimu taudia, maragidia bona badadia, bona tanobada e hadikaiamu taudia ba hadikadia negadia vada eme kau." ¹⁹ Bena Dirava ena Dubu Helagana gubai vada e kehoa bona Lohiabada ena taravatu mauana helagana Dubu Helagana lalonai vada e hedinarai. Kevaru diarina, rege bona guba rahu-rahu, tano lagana ta bona guba nadidia lagana ta vada e hekara. Translation done by: Mr. Peter Vai English on Friday (06/10/23), time: 3.44 pm, ready for quality checking.